Bojfrend z katałoha — u Kitai nabiraje papularnaść novaja pasłuha

Jak piša South China Morning Post, u kitajskich sacsietkach nabiraje papularnaść niezvyčajnaja pasłuha: žančyny najmajuć mužčyn-madelaŭ, kab sfatahrafavacca ź imi jak z sapraŭdnymi partniorami. Heta nie prosta sumiesny zdymak — na čas fotasiesii razyhryvajecca maleńkaja historyja ramantyčnych adnosin.

Klijentka moža trymać mužčynu za ruku, abdymacca ź im, imitavać pacałunak ci dakranacca da jaho presa. Fatohraf pry hetym kiruje pracesam i padkazvaje, jak stvaryć u kadry ŭražańnie blizkaści pamiž paraj.

Kaštuje takoje zadavalnieńnie niamała. Hadzinnaja fotasiesija moža abyścisia ŭ 8000 juaniaŭ, što prykładna adpaviadaje 1100 dalaram. Možna zamović siesiju na 30 chvilin i zaprasić treciaha ŭdzielnika.

Źjavilisia ŭžo i śpiecyjalizavanyja studyi. Tak studyja Mujiao ŭ Nankinie nazyvaje siabie pieršaj u Kitai, jakaja pačała prapanoŭvać parnyja fotasiesii z mužčynami-madelami. Samy tanny pakiet tam kaštuje kala 1000 dalaraŭ i ŭklučaje dzieviać apracavanych fatahrafij. Samy darahi — kala 3900 dalaraŭ. Za hetyja hrošy klijentka atrymlivaje ceły dzień u vobrazie pary ź niekalkimi kamplektami adzieńnia i 120 fatahrafijami.

Klijentkam prapanujuć katałoh mužčyn, dzie možna padabrać sabie partniora pa źniešnaści, rostu i inšych paramietrach. Košt zaležyć nie tolki ad vyhladu madeli, ale i ad jaho papularnaści ŭ sacsietkach i ŭmieńnia pavodzić siabie pierad kamieraj.

Niekatoryja klijentki prychodziać sa svaimi scenarami. Jany mohuć paprasić razyhrać peŭnuju scenu z ramana ci komiksa albo cełuju historyju. Naprykład, svarku pary i nastupnaje prymireńnie. Studyi prapanujuć i hatovyja vobrazy: ad niavinnaj studenckaj zakachanaści da bolš pačućciovych fotasiesij.

Matyvy ŭ žančyn roznyja. Adnym patrebnyja pryhožyja fatahrafii dla sacsietak, druhija chočuć nienadoŭha adčuć siabie ŭ ramantyčnych adnosinach. Niekatoryja žančyny źviartajucca pa takuju pasłuhu, bo majuć mała dośviedu sapraŭdnych ramantyčnych adnosin i chočuć pieražyć chacia b ich imitacyju. Inšyja prychodziać paśla razryvu.

Jość i tyja, chto vykarystoŭvaje atrymanyja fatahrafii, kab pakazać siamji nibyta bojfrenda i paźbiehnuć cisku z patrabavańniami chutčej vyjści zamuž. Pry hetym siarod klijentak jość nie tolki adzinokija žančyny. Pavodle pradstaŭnikoŭ hetaha biznesu, pasłuhaj karystajucca i žančyny, jakija ŭžo majuć partnioraŭ abo zamužam.

Rynak płatnych kampańjonaŭ

Fotasiesii z «bojfrendam» — tolki adna z prajaŭ značna šyrejšaj źjavy, jakaja ŭ Kitai atrymała nazvu «rynak płatnych kampańjonaŭ». Čałaviek płacić užo nie stolki za reč ci kankretnuju pasłuhu, kolki za prysutnaść inšaha čałavieka, uvahu i toje, što ŭ Kitai časta nazyvajuć «emacyjnaj kaštoŭnaściu».

Tak, za hrošy možna znajści čałavieka, jaki schodzić z taboj u restaran, pabiehaje abo pajedzie na ekskursiju. Takija pasłuhi časta prapanujuć studenty i maładyja ludzi, jakija šukajuć dadatkovy zarobak.

Asabliva papularnymi stali «kampańjony dla pachodaŭ». Za niekalki sotniaŭ juaniaŭ małady čałaviek moža pajści razam z klijentkaj u hory, nieści rečy, padavać vadu, fatahrafavać i padtrymlivać, kali taja stamiłasia.

Jašče dalej hetaja madel zajšła ŭ papularnych u Kitai rolevych hulniach. U ich udzielniki atrymlivajuć piersanažaŭ i niekalki hadzin razyhryvajuć zahadzia napisanuju historyju.

U ramantyčnaj viersii takoj hulni žančyna moža zapłacić mužčynu-viadučamu, jaki na niekalki hadzin stanovicca jaje kachanym pavodle scenaryja. Jon pryznajecca joj u pačućciach, padtrymlivaje jaje, moža trymać za ruku ci abdymać. Asabliva papularnyja historyi, pabudavanyja vakoł idei biezumoŭnaj addanaści: mužčynski piersanaž pry lubych abstavinach zastajecca na baku hieraini.

Pavialičyć

Jak adznačajuć daśledčyki, papularnaść padobnych pasłuh raście na fonie prykmietnych źmien u asabistym žyćci maładych kitajcaŭ. Ludzi paźniej ustupajuć u šlub, a samich šlubaŭ u krainie ŭ apošnija hady stała značna mienš. Adnačasova ŭsio bolš ludziej žyvuć adny. Heta stvaraje popyt na pasłuhi, jakija dazvalajuć atrymać kampaniju i emacyjnuju blizkaść biez doŭhaterminovych adnosin.

I pakul adny bačać u hetym novaje pole dla biznesu, inšyja papiaredžvajuć: kali blizkaść pieratvarajecca ŭ pasłuhu, budavać realnyja adnosiny moža stać jašče składaniej.

• 2
• 0
• 1
• 6
• 1
• 0
• 0
• 0