Ukrainskija drony atakavali bujny data-centr Śbierbanka ŭ Sarataŭskaj vobłaści

Pra ataku bieśpiłotnikaŭ na Sarataŭskuju vobłaść ranicaj 14 kastryčnika paviedamiŭ hubiernatar Raman Busarhin. Pavodle jaho, u Bałakovie paškodžanyja niekalki žyłych damoŭ, adzin čałaviek zahinuŭ. Miascovyja žychary paviedamlali pra dziasiatki vybuchaŭ.

Pra toje, što hety ŭdar byŭ naniesieny pa data-centry Śbierbanka, spačatku zajaviŭ ukrainski vytvorca zbroi Fire Point. Rasijskaje vydańnie «Ahientstvo», praanalizavaŭšy hieałakacyju apublikavanych fotazdymkaŭ, taksama pryjšło da vysnovy, što na ich vidać paškodžany data-centr, a nieŭzabavie ataku pryznaŭ i sam bank.

U Śbierbanku pry hetym zajavili, što sistemy i servisy nibyta pracujuć u štatnym režymie. Prablem z bankaŭskimi apieracyjami, maŭlaŭ, niama. Adnak, pavodle danych DownDetector, heta nie zusim adpaviadaje rečaisnaści.

Rasijskija karystalniki pačali masava skardzicca na prablemy ŭ pracy sajtaŭ i servisaŭ. Siarod ich — Mail.ru, «Točka Bank», servisy «Jandeksa», prahrama «Kontur» i markietpłejs Ozon. Ludzi nie mahli zahruzić staronki, uvajści ŭ asabistyja kabiniety, adpravić elektronnuju poštu abo pravieści płaciažy. Aficyjnyja pryčyny zboju nie paviedamlalisia.

Data-centr u Bałakovie jašče budujecca, adnak, pavodle manitorynhavych kanałaŭ, asobnyja jaho častki mahli ŭžo pracavać. Košt prajekta pieravyšaje miljard dalaraŭ. Centr raźličany amal na try tysiačy sierviernych stojek, da 120 tysiač siervieraŭ i elektryčnuju mahutnaść da 82 MVt.

Viadoma, što data-centr Śbierbanka ŭ Bałakovie pačaŭ niezadoŭha da ataki terminova zakuplać srodki supraćpavietranaj abarony, piša vydańnie «Važnyje istorii». Kampanija «InfaTech Bałakova», jakaja zajmajecca jaho budaŭnictvam i ekspłuatacyjaj, sa žniŭnia raźmiaściła zakazy na sistemy radyjoelektronnaj baraćby, srodki indyvidualnaj abarony, abstalavańnie dla pažarnikaŭ i zienitnyja srodki. 

Najbolš značnyja zakazy raźmiaščalisia ŭ terminovym paradku 5 kastryčnika — za dva dni da ŭdaraŭ USU pa data-centrach «Jandeksa» i za dzieviać dzion da ataki na sam data-centr Śbierbanka ŭ Bałakovie.

Z 8 pa 11 kastryčnika bieśpiłotniki paškodzili try ź piaci data-centraŭ «Jandeksa» — u Sasavie Razanskaj vobłaści, Kałuzie i Uładzimirskaj vobłaści. Paśla hetaha karystalniki paviedamlali ab prablemach z «Jandeks Pej», «Jandeks Go», kartami, pošukam, hałasavym pamočnikam «Alisa» i vobłačnaj płatformaj Yandex Cloud, jakoj karystajucca inšyja arhanizacyi.

Zboi adčuli i ŭ Biełarusi. U pryvatnaści, uźnikali prablemy ŭ pracy «Jandeks-taksi», a niekatoryja karystalniki nie mahli atrymać dostup da fajłaŭ na «Jandeks-dysku».

• 6
• 1
• 0
• 0
• 0
• 0
• 0
• 2