8 kastryčnika kala 16:00 u rasijskim siehmiencie internetu adbyŭsia maštabny zboj. Pavodle danych manitorynhavych servisaŭ, prablemy zakranuli vialikuju kolkaść papularnych sajtaŭ i anłajn-servisaŭ, piša The Moscow Times.
Karystalniki paviedamlali pra niepaładki ŭ pracy T-Banka, MTS-Banka, Saŭkambanka i Alfa-Banka, «Avita», Google, YouTube i RuTube, anłajn-kinateatraŭ Ivi i KION, adukacyjnaha resursu «Dnievnik.ru», sajta Rasijskich čyhunak, niekatorych mabilnych apierataraŭ i internet-sajtaŭ bujnych handlovych sietak, u tym liku «Piaciorački», «Lenty», «Mahnita» i DNS.
Najbolšaja kolkaść paviedamleńniaŭ pra zboj była źviazanaja z «Avita» — za sutki ich naźbirałasia bolš za 14 tysiač. Najbolš surjoznyja prablemy naziralisia ŭ Maskvie i Sankt-Pieciarburhu. Žychary Sankt-Pieciarburha pakinuli bolš za 7,6 tysiačy paviedamleńniaŭ, hałoŭnym čynam pra prablemy z pravajdaram «Skajnet», a taksama «Avita» i T-Bankam. U Maskvie bolš za 7 tysiač skarhaŭ tyčylisia, u pryvatnaści, vobłačnaha servisu Mango Office.
Masavyja niepaładki pačalisia paśla ataki ŭkrainskich bieśpiłotnikaŭ u noč na 8 kastryčnika na data-centr «Jandeksa» ŭ horadzie Sasava Razanskaj vobłaści. Na abjekcie ŭźnik pažar. Paśla hetaha karystalniki stali paviedamlać pra prablemy z «Jandeks.Dyskam», «Jandeks.Dakumientami» i inšymi servisami kampanii.
Nastupstvy zakranuli i inšyja sistemy. U Maskoŭskaj vobłaści paśla ataki stała niemahčyma nabyvać praź internet kvitki na aŭtobusy. «Mastransaŭta» źviazała heta z prypynieńniem pracy data-centra, jaki zabiaśpiečvaŭ funkcyjanavańnie servisaŭ anłajn-prodažu. Pavodle paviedamleńnia kampanii, na adnaŭleńnie sistemy mahło spatrebicca da 24 hadzin.
Jak paviedamlaŭ RBK, u karystalnikaŭ taksama ŭźnikali prablemy z dostupam da sajtaŭ rasijskich ŚMI. Zboi zakranuli RBK, «RIA Novosti», «Kommiersant», «Viedomosti», «Interfaks» i «Viesti». Niekatoryja z hetych sajtaŭ byli niedastupnyja navat pry vykarystańni VPN.
U Rasijskich čyhunkach zajavili, što ŭ niekatorych karystalnikaŭ mohuć uźnikać prablemy pry sprobie zajści na sajt kampanii. Tam heta patłumačyli pracaj źniešnich servisaŭ. Pry hetym u kampanii śćviardžajuć, što mabilny dadatak «RŽD Passažiram» ad zboju nie paciarpieŭ.
Ciapier čytajuć
«Bulba» z Oršy pajšoŭ vajavać za Rasiju — ciapier siastra šukaje jaho ci chacia b jaho pareštki9
Kamientary
Niachaj siadzić adzin pierad čornym ekranam.
A čynoŭniki niachaj nie viedajuć, jakija rasparadžeńni jon chacieŭ addać i nie vykonvajuć ich.
- Darma, synku, aby nie Jandeks.