Kaja Kałas: Rasija praličyłasia, zrabiŭšy staŭku ŭ pieramovach tolki na ZŠA

Viarchoŭnaja pradstaŭnica ES pa zamiežnych spravach i palitycy biaśpieki skazała, što Rasija praličyłasia, pasprabavaŭšy prymusić Ukrainu zdacca praz damoŭlenaści sa ZŠA, pačynajučy ź letašniaha samitu ŭ Ankorydžy.

«Rasijanie chočuć abmiarkoŭvać i vieści pieramovy sa ZŠA, kab mienavita Vašynhton zabiaśpiečyŭ im žadany vynik. Ale ŭ nas jość svaje patrabavańni da Rasii, — skazała jana. — Pasłańnie takoje: vam treba razmaŭlać ź jeŭrapiejcami».

Adkazvajučy na pytańnie pra ździełku pa dyzielnym palivie i enierhietyčnaje pieramirje, abvieščanyja prezidentam ZŠA Donaldam Trampam, pavodle jakich Rasija pastavić 300 tysiač ton dyzielnaha paliva ŭ Złučanyja Štaty i na suśvietnyja rynki, Kałas nazvała hetuju schiemu vidavočnym padarunkam prezidentu RF Pucinu.

«Pytańnie ŭ tym, što jon atrymaŭ uzamien. My bačym, što jon nasamreč uzmacniaje ŭdary pa mirnym nasielnictvie i hramadzianskaj infrastruktury. Abvieščanaje enierhietyčnaje pieramirje z rasijskaha boku nie pracuje», — padkreśliła jana.

Pavodle Kałas, klučavoje pytańnie ŭ tym, što Rasija pavinna spynić ahresiŭnuju vajnu, i tady spyniacca i ŭkrainskija ŭdary pa rasijskich naftapierapracoŭčych zavodach.

«Kali pahladzieć šyrej, bolšaja častka finansavańnia hetaj vajny pastupaje ad nafty. Tamu Ukraina nanosić udary pa hetych abjektach, a Rasija bje pa enierhietyčnaj infrastruktury va Ukrainie, imknučysia pryčynić jak maha bolš pakut ukraincam u budučuju zimu», — skazała jana.

Kałas znoŭ padkreśliła, što mižnarodny cisk treba akazvać na ahresara, kab jon spyniŭ vajnu, a nie na achviaru, kab jana kapitulavała. Mienavita takoj pazicyi, pavodle jaje słoŭ, Jeŭropa niaźmienna prytrymlivajecca.

«Kali b my dziejničali razam sa ZŠA, sihnał dla Rasii byŭ by adnaznačnym: spynicie hetuju vajnu — i ŭsie vašy prablemy z naftapierapracoŭčymi zavodami dy inšymi abjektami taksama źniknuć», — zajaviła jana.

Na pytańnie, ci aznačaje sieryja vybaraŭ u klučavych krainach ES, u tym liku mahčymaje abrańnie Maryn Le Pien prezidentkaj Francyi, asłableńnie padtrymki Ukrainy, Kałas pryznała, što za čatyry hady vajny hramadskija nastroi źmianilisia.

Tym nie mienš, pavodle jaje słoŭ, Jeŭropie nieabchodna vystupać adzinym frontam, inakš jaje źniešniaja palityka nie budzie efiektyŭnaj.

«Mienavita na heta, pa sutnaści, i raźličvajuć rasijanie: što jeŭrapiejcy stomiacca, i tady jany atrymajuć toje, čaho damahajucca. I ja chaču padkreślić: tady ich apietyty tolki vyrastuć», — skazała Kałas.

• 6
• 0
• 0
• 0
• 0
• 0
• 0
• 0