U ekałahičnaj vinahradnaj haspadarcy Vergenoegd Löw niepadalok ad Kiejptaŭna ŭ Paŭdniova-Afrykanskaj Respublicy kožnuju ranicu vychodziać na pracu kala 800 indyjskich biehunoŭ — paroda kačak, jakuju vykarystoŭvajuć dla naturalnaj abarony vinahradnikaŭ ad škodnikaŭ. Hety mietad užyvajuć užo bolš za 30 hadoŭ, paviedamlaje wp.pl.
Spačatku ŭ haspadarcy było ŭsiaho niekalki ptušak, ale z časam ich kolkaść vyrasła prykładna da 800. Pa słovach kiraŭnika haspadarki Pitera Ściuarta, kački stali važnaj častkaj štodzionnaha žyćcia vinahradnika.
Kožnuju ranicu a vośmaj hadzinie ptuški pakidajuć miesca načlehu i ščylnaj hrupaj prachodziać praz terytoryju haspadarki da vinahradnych płantacyj. Tam jany šukajuć najpierš ślimakoŭ, jakija chavajucca siarod liścia vinahradnaj łazy. Dziakujučy strojnamu ciełu i vyprastanaj pastavie kačkam zručna pieramiaščacca pamiž radami raślin.
Takim čynam haspadarka skaračaje kolkaść škodnikaŭ biez vykarystańnia piestycydaŭ. Akramia taho, kačyny pamiot słužyć naturalnym uhnajeńniem, uzbahačajučy hlebu pažyŭnymi rečyvami.
U haspadarcy trymajuć i husiej. Jany achoŭvajuć hniozdy i jajki ad varon dy inšych drapiežnikaŭ. Paśla pracoŭnaha dnia ptuški adpačyvajuć i kupajucca ŭ susiedniaj sažałcy.
Ranišni marš kačak staŭ i miascovaj turystyčnaj atrakcyjaj. Malaŭničaja kałona ptušak pryciahvaje žycharoŭ i haściej rehijona.
Utrymańnie vialikaha statka abychodzicca daražej, čym vykarystańnie chimičnych srodkaŭ. Adnak uładalniki vinahradnika ličać, što karyść ad ptušak značna šyrejšaja: jany padtrymlivajuć bijaraznastajnaść, dapamahajuć zachoŭvać miascovuju ekasistemu i palapšajuć stan hleby.
Ekałahičnyja padychody haspadarki Vergenoegd Löw adznačyła arhanizacyja WWF, jakaja vydała joj adpaviedny siertyfikat. Kački tut nie prosta zabaŭlajuć naviednikaŭ, a vykonvajuć kankretnuju pracu pa abaronie vinahradnych płantacyj.
Kamientary