«Sprabujem zrabić jak u Francyi». U Ałbanii piaty dzień sutyknieńni z palicyjaj, pratestoŭcy patrabujuć adstaŭki premjera
Školniki i studenty dałučylisia da antyŭradavaha ruchu, jaki pačaŭsia z pratestaŭ suprać kurortnych prajektaŭ, źviazanych ź ziaciem Trampa Džaredam Kušnieram. Ciapier udzielniki patrabujuć adstaŭki Edzi Ramy, daterminovych vybaraŭ i źmien u adukacyi.
U subotu, 17 kastryčnika, u centry Tyrany piaty dzień zapar adbyvalisia sutyknieńni demanstrantaŭ z palicyjaj, piša BBC.
Pratestoŭcy ŭ maskach kidali kamiani, piratechniku i butelki z zapalnaj sumieśsiu ŭ palicejskich kala Ministerstva adukacyi. Paźniej asnoŭnyja padziei pieramiaścilisia da ofisa premjera na hałoŭnym bulvary stalicy. Pavodle BBC, ludziej tam sabrałasia značna bolš, čym u papiarednija dni.
Palicyja vykarystoŭvała vadamioty i ślezaciečny haz, źjavilisia taksama paviedamleńni pra prymianieńnie humovych kul. Uviečary da palicejskich dałučyŭsia śpiecnaz.
Pavodle palicyi, aryštavanyja 167 čałaviek, paranienyja 132 palicejskija. Siem supracoŭnikaŭ adchilili ad słužby na čas rasśledavańnia mahčymaha pieravyšeńnia paŭnamoctvaŭ.
«My byli mirnymi 135 dzion. Ciapier sprabujem zrabić jak u Francyi… sprabujem zrabić revalucyju», — skazaŭ BBC 19‑hadovy student-miedyk, jaki padpracoŭvaje elektrykam, kab apłačvać vučobu.
Studenty vystupajuć suprać vysokich vydatkaŭ na navučańnie i drennych umoŭ adukacyi. U razmovach z BBC jany padkreślivali, što nie daviarajuć «usiamu karumpavanamu palityčnamu kłasu», uklučajučy staruju apazicyju.
Rama admaŭlajecca sychodzić. Jon abvinavačvaje ŭ biesparadkach apazicyjnuju Demakratyčnuju partyju i nienazvanych zamiežnych dziejačaŭ, jakija nibyta chočuć sarvać ustupleńnie Ałbanii ŭ ES.
Amierykanskaja ambasada zaklikała ŭsie baki da strymanaści, zajaviŭšy, što «hvałt i źniščeńnie majomaści nie źjaŭlajucca hramadzianskaj aktyŭnaściu».
Pratesny ruch, da jakoha ciapier dałučylisia studenty, atrymaŭ nazvu «revalucyja fłaminha». Jon uźnik uviesnu na fonie płanaŭ budaŭnictva elitnych kurortaŭ, źviazanych z Džaredam Kušnieram — ziaciem prezidenta ZŠA Donalda Trampa.
Prajekty achoplivajuć vostraŭ Sazan i ŭźbiarežža pobač z achoŭnymi terytoryjami. Fłaminha, jakija tam žyvuć, stali simvałam pratestaŭ. Miascovyja žychary i ekołahi aścierahajucca źniščeńnia pryrodnych terytoryj, straty dostupu da ŭźbiarežža i parušeńnia ziamielnych pravoŭ.
Rama abaraniaje zabudovu jak mahčymaść raźvivać turyzm i ekanomiku.
Pastupova ruch supracivu pašyryŭ patrabavańni: ad abarony pryrody i prazrystaści inviestycyjnych rašeńniaŭ — da baraćby z karupcyjaj i adstaŭki ŭrada.
Rama kiruje Ałbanijaj z 2013 hoda. Jaho Sacyjalistyčnaja partyja maje 83 sa 140 miescaŭ u parłamiencie, a nastupnyja parłamienckija vybary zapłanavanyja tolki na 2029 hod.
Kamientary
A ŭ Francyi byli spravakavany pierš za ŭsio levymi pra-rasiejskimi siłami
U va što heta pieraŭtvaryłasia dalej užie inšaja historyja))
Pali majno, kab bydo ciaplej - daloka na takim iesadže nie pajedzieš)))