KNDR abviaściła šerah mieraŭ pa ŭviekaviečańni pamiaci pamierłaha lidara krainy Kim Čen Ira, u tym liku pachavańnie jaho ŭ niatlennym vyhladzie ŭ byłoj aficyjnaj rezidencyi i mahilnym sklepie jaho baćki Kim Ir Siena.
Śpiecyjalnuju zajavu pra heta raspaŭsiudziła ŭ čaćvier Palitbiuro CK Pracoŭnaj partyi Karei pa kanałach paŭnočnakarejskaha ahienctva navin.
Dakumient paćvierdziŭ, što cieła Kim Čen Ira budzie spačyvać u pałacy Kymsusan, dzie byŭ pachavany pieršy prezident krainy Kim Ir Sien, jaki pamior u 1994 hodzie. Palitbiuro nazyvaje pachavalniu paŭnočnakarejskich pravadyroŭ «śviatym chramam idej čučchie».
Palitbiuro taksama pastanaviła ŭźvieści statuju Kim Čen Ira, adnak miesca kankretna nie nazyvajecca.
Dzień naradžeńnia Kim Čen Ira, 16 lutaha, zastaniecca dziaržaŭnym śviatam dla žycharoŭ KNDR pad nazvaj «Dzień puciavodnaj zorki». Dzień naradžeńnia baćki Kim Čen Ira ŭ krainie nazyvajuć «Dniom Sonca», jaki adznačajecca 15 krasavika. Pa ŭsioj krainie taksama steły ŭ pamiać Kim Čen Ira, havorycca ŭ paviedamleńni Palitbiuro.
Paśla śmierci Kim Čen Ira ŭžo było abvieščana, što jaho cieła budzie zabalzamavanaje ŭ pałacy Kymsusan. Ułada ŭ krainie pierajšła da jaho syna Kim Čen Yna, unuka Kim Ir Siena, vonkava vielmi padobnaha da dzieda.
U KNDR kiravańnie krainaj było vyrašana pieradavać u spadčynu, kab paźbiehnuć źmieny kursu, jak heta było ŭ Kitai i SSSR paśla śmierci Mao Czeduna i Iosifa Stalina.
Kamientary