КХЛ забараніла мінскаму «Дынама» выкарыстоўваць беларускую мову падчас прэс-канферэнцый
Беларускі журналіст Вячаслаў Федарэнкаў распавёў, што Кантынентальная хакейная ліга ўвяла забарону на выкарыстанне беларускай мовы падчас прэс-канферэнцый.
«Яшчэ адна КХЛаўская навіна апошняга тыдня са знакам «мінус» — фактычна забарона Масквы на выкарыстанне беларусамі беларускай мовы. Спакваля гэта здарылася яшчэ некалькі гадоў таму, калі ліга пераходзіла на лацінку пры напісанні прозвішчаў на джэрсі гульцоў і засекла ініцыятыву Мінска выкарыстоўваць беларускую транскрыпцыю.
І вось — новае: на трэці год пачуўшы, што ўступы на трэнерскіх брыфінгах гучаць на мове Купалы, ліга нечага псіханула, вынесла «зубрам» «строгае з папярэджаннем», паабяцаўшы далей караць расійскім рублём.
Не ведаю, як у каго, а ў мяне гэта выклікала абуранае «чаго?!» І таму, што сумняваюся: ці наўрад аналагічную прынцыповасць Масква рызыкне праявіць у дачыненні, скажам, Хельсінкі або Заграба. І таму, што на секунду ўявіў,
як НХЛ, напрыклад, забараняе «Манрэалю» выкарыстоўваць французскую.
Пакуль не ведаю афіцыйнай пазіцыі дынамаўскага кіраўніцтва на гэты конт, але на яго месцы, прынамсі, паспрабаваў бы пазмагацца. Хоць бы з пачуцця нацыянальнага гонару. Калі перашкаджаюць нейкія пункты рэгламенту (зноў жа дзіўна, што пра іх КХЛ узгадала на трэці год),
трэба дамагацца яго змянення або агаворак для нерасійскіх клубаў, якія спакойна існуюць у частцы легіянерскага ліміту.
Балазе ёсць з кім у гэтай частцы сабраць кааліцыю, ды і самі па сабе мы ў міжнароднай лізе — не свінячы хвосцік. А то так і будзем займацца чыста пісаннем. Хай і на гербавай паперы, але на чужой, на што яе ўладальнік будзе паказваць пры любым зручным выпадку. А яно нам трэба?..», - сказаў Федарэнкаў.
Цяпер чытаюць
«Чаму мы павінны неяк ушчэмліваць сябе?». Дырэктарка РТБД патлумачыла, чаму паставіла спектакль паводле Пушкіна ў адным з апошніх тэатраў краіны, які працаваў па-беларуску5555
Каментары