Папулярны расійскі тэлеграм-канал «Нязыгар» напісаў, што па Мінску паўзуць чуткі пра новую, ужо 19-ю, рэзідэнцыю Аляксандра Лукашэнкі. Маўляў, пабудаваў яе для свайго сябра расійскі мільянер Міхаіл Гуцэрыеў.
«Кажуць, што маёнтак дастанецца Мікалаю Лукашэнку. Тэнісны корт, верталётная пляцоўка, домікі для аховы і гасцей, лазня ля рэчкі, ёсць нават асобны бункер і аўтаномнае сілкаванне электрычнасцю. Аздабленнем займаліся італьянскія майстры», — піша «Нязыгар».
Усё гэта ідзе ў суправаджэнні здымка таямнічай рэзідэнцыі. Канечне, можна было б проста прайсці міма гэтага паведамлення, але ўсё ж нават гэты пост бачылі больш за 60 тысяч падпісантаў.
Насамрэч гаворка вядзецца пра сядзібу, якая знаходзіцца ў Маладзечанскім раёне, пад Радашковічамі. Пра яе стала вядома яшчэ ў 2017 годзе.
Гэта сядзіба «Краснасельскае» раней яна належала Кіраўніцтву справамі прэзідэнта, а потым перайшла ва ўласнасць Гуцэрыева.
Знаходзіцца сядзіба за 40 кіламетраў ад Мінска, а агульная яе плошча складае 11 гектараў. «База адпачынку ў Краснасельскім абышлася ў $40 мільёнаў», — прызнаваўся Гуцэрыеў.
Раней гэты катэдж звязвалі з імем іншага расійскага алігарха, Барыса Беразоўскага, але пацверджанняў гэтаму няма. «Ён там пабудаваў сабе вёску і кайфаваў. Бярозы, рускія жанчыны, свежае марозіва па 20 капеек, чорны хлеб. Ён адчуваў сябе на радзіме», — распавядаў часопісу Forbes сябар Беразоўскага пасля яго смерці.
Вось так чарговая сенсацыя ад «Нязыгара» аказваецца усім вядомай інфармацыяй двухгадовай даўніны.
***
Глядзі таксама: Журналісты «НН» пабывалі ў таямнічай рэзідэнцыі пад Радашковічамі
Цяпер чытаюць
«Набліжаецца момант пералому сітуацыі». Вадзім Кабанчук пра план для беларусаў4
«Набліжаецца момант пералому сітуацыі». Вадзім Кабанчук пра план для беларусаў
У якой разведкі была найлепшая інфармацыя з Беларусі ў лютым 2022 і хто паведаміў Буданаву, што асноўны ўдар расіян будзе на Гастомель. З’явілася вялікая публікацыя1616
Каментары