Маркаў абвінаваціў Google у «інфармацыйных правакацыях супраць прэзідэнцкіх выбараў» і хоча зрабіць айчынны Раскамнагляд
Беларусь накіравала карпарацыі Google «ліст з прэтэнзіяй аб умяшаннях у выбары», заявіў міністр інфармацыі Марат Маркаў прапагандысту расійскага тэлеканала Russia Today Канстанціну Прыдыбайлу, піша «Позірк».
Паводле слоў чыноўніка, прэтэнзіі тычацца «саўдзелу кампаніі Google у інфармацыйных правакацыях супраць Беларусі і прэзідэнцкіх выбараў у краіне».
З дапамогай ліста, удакладніў Маркаў, улады хочуць «звярнуць увагу на тое, што ідзе зусім канкрэтнае парушэнне заканадаўства», бо ў згаданых «правакацыях» удзельнічаюць «фарміраванні, якія судом прызнаныя ў Рэспубліцы Беларусь экстрэмісцкімі».
«Узаемадзеянне Google з падобнага роду злачыннымі арганізацыямі прымушае, па-першае, задумацца, а па-другое, вельмі моцна адбіваецца на рэпутацыі самога Google, — сцвярджае чыноўнік. — Хацелася б, каб яны прынамсі гэта зразумелі для пачатку, а потым прынялі адпаведныя рашэнні».
Маркаў таксама заявіў аб неабходнасці стварэння ў Беларусі аналага Раскамнагляду.
«Заканадаўча трэба гэтыя рэчы дапрацаваць да канца, паколькі так ці інакш мы павінны мець інструменты, якія будуць наўпрост уздзейнічаць, як у Расіі, ёсць такая магчымасць, праз Раскамнагляд», — сказаў кіраўнік Мінінфарма.
«У Беларусі няма адпаведнай арганізацыі, умоўнага Белкамнагляду, але тое, што яго стварэнне даўно наспела, я ў гэтым не сумняваюся», — дадаў ён.
Пра якія правакацыі гаворка, і якім чынам Google у іх «саўдзельнічаў», Маркаў у каментары не ўдакладніў.
Федэральная служба па наглядзе ў сферы сувязі, інфармацыйных тэхналогій і масавых камунікацый (Роскамнагляд) — расійскі федэральны орган выканаўчай улады, які займаецца рэгуляваннем сувязі, інфармацыйных тэхналогій і СМІ. Ён таксама рэгулюе абарону персанальных даных і працу радыёчастотнай службы.
Служба падведамасная Міністэрству лічбавага развіцця, сувязі і масавых камунікацый Расіі. Створаная ў снежні 2008 года ўказам прэзідэнта Дзмітрыя Мядзведзева.
З 2022 года, як «дэзынфармацыйная арганізацыя», знаходзіцца пад санкцыямі ЕС.
28 лістапада мінулага года ў офісе беларускага дэмакратычнага лідара Святланы Ціханоўскай заявілі, што «першыя радкі ў Google набытыя рэжымам», і калі ўвесці ў радок пошуку «выбары ў Беларусі», то знайсці публікацыі незалежных СМІ пра выбары не атрымаецца — згодна з выкарыстанымі ў роліку скрыншотамі, будуць трапляцца толькі матэрыялы ЦВК, Нацыянальнага прававога інтэрнэт-партала і дзяржСМІ (паводле інфармацыі «Позірку», калі ўвайсці праз VPN з беларускім адрасам, сярод першых радкоў у выніках пошуку трапляюцца і старонкі незалежных, у тым ліку замежных, СМІ, частка якіх на тэрыторыі Беларусі заблакаваная).
За Лукашэнку на «выбарах прэзідэнта Рэспублікі Беларусь» прагаласавала 86,82% выбаршчыкаў, заявіў старшыня Цэнтрвыбаркама Ігар Карпенка на прэс-канферэнцыі ноччу 27 студзеня. Дэмакратычныя краіны адмовіліся прызнаваць сёмыя выбары прэзідэнта Беларусі, якія прайшлі 26 студзеня.
Цяпер чытаюць
Лукашэнка знайшоў незвычайныя словы для спачування Хаменеі: «вераломная атака»21
Каментары