Markaŭ abvinavaciŭ Google u «infarmacyjnych pravakacyjach suprać prezidenckich vybaraŭ» i choča zrabić ajčynny Raskamnahlad
Biełaruś nakiravała karparacyi Google «list z pretenzijaj ab umiašańniach u vybary», zajaviŭ ministr infarmacyi Marat Markaŭ prapahandystu rasijskaha telekanała Russia Today Kanstancinu Prydybajłu, piša «Pozirk».
Pavodle słoŭ čynoŭnika, pretenzii tyčacca «saŭdziełu kampanii Google u infarmacyjnych pravakacyjach suprać Biełarusi i prezidenckich vybaraŭ u krainie».
Z dapamohaj lista, udakładniŭ Markaŭ, ułady chočuć «źviarnuć uvahu na toje, što idzie zusim kankretnaje parušeńnie zakanadaŭstva», bo ŭ zhadanych «pravakacyjach» udzielničajuć «farmiravańni, jakija sudom pryznanyja ŭ Respublicy Biełaruś ekstremisckimi».
«Uzajemadziejańnie Google z padobnaha rodu złačynnymi arhanizacyjami prymušaje, pa-pieršaje, zadumacca, a pa-druhoje, vielmi mocna adbivajecca na reputacyi samoha Google, — śćviardžaje čynoŭnik. — Chaciełasia b, kab jany prynamsi heta zrazumieli dla pačatku, a potym pryniali adpaviednyja rašeńni».
Markaŭ taksama zajaviŭ ab nieabchodnaści stvareńnia ŭ Biełarusi anałaha Raskamnahladu.
«Zakanadaŭča treba hetyja rečy dapracavać da kanca, pakolki tak ci inakš my pavinny mieć instrumienty, jakija buduć naŭprost uździejničać, jak u Rasii, jość takaja mahčymaść, praz Raskamnahlad», — skazaŭ kiraŭnik Mininfarma.
«U Biełarusi niama adpaviednaj arhanizacyi, umoŭnaha Biełkamnahladu, ale toje, što jaho stvareńnie daŭno naśpieła, ja ŭ hetym nie sumniavajusia», — dadaŭ jon.
Pra jakija pravakacyi havorka, i jakim čynam Google u ich «saŭdzielničaŭ», Markaŭ u kamientary nie ŭdakładniŭ.
Fiederalnaja słužba pa nahladzie ŭ śfiery suviazi, infarmacyjnych technałohij i masavych kamunikacyj (Roskamnahlad) — rasijski fiederalny orhan vykanaŭčaj ułady, jaki zajmajecca rehulavańniem suviazi, infarmacyjnych technałohij i ŚMI. Jon taksama rehuluje abaronu piersanalnych danych i pracu radyjočastotnaj słužby.
Słužba padviedamasnaja Ministerstvu ličbavaha raźvićcia, suviazi i masavych kamunikacyj Rasii. Stvoranaja ŭ śniežni 2008 hoda ŭkazam prezidenta Dźmitryja Miadźviedzieva.
Z 2022 hoda, jak «dezynfarmacyjnaja arhanizacyja», znachodzicca pad sankcyjami ES.
28 listapada minułaha hoda ŭ ofisie biełaruskaha demakratyčnaha lidara Śviatłany Cichanoŭskaj zajavili, što «pieršyja radki ŭ Google nabytyja režymam», i kali ŭvieści ŭ radok pošuku «vybary ŭ Biełarusi», to znajści publikacyi niezaležnych ŚMI pra vybary nie atrymajecca — zhodna z vykarystanymi ŭ roliku skrynšotami, buduć traplacca tolki materyjały CVK, Nacyjanalnaha pravavoha internet-partała i dziaržSMI (pavodle infarmacyi «Pozirku», kali ŭvajści praz VPN ź biełaruskim adrasam, siarod pieršych radkoŭ u vynikach pošuku traplajucca i staronki niezaležnych, u tym liku zamiežnych, ŚMI, častka jakich na terytoryi Biełarusi zabłakavanaja).
Za Łukašenku na «vybarach prezidenta Respubliki Biełaruś» prahałasavała 86,82% vybarščykaŭ, zajaviŭ staršynia Centrvybarkama Ihar Karpienka na pres-kanfierencyi nočču 27 studzienia. Demakratyčnyja krainy admovilisia pryznavać siomyja vybary prezidenta Biełarusi, jakija prajšli 26 studzienia.
-
U Barysavie raspracavali pažarny tank dla samych składanych uzharańniaŭ FOTY
-
KDB abvieściŭ zatrymanych knihavydaŭcoŭ Jaŭdachu, Bahdanoviča i Kołasa ŭdzielnikami ekstremisckaha farmavańnia
-
«U mianie na stale piać hadoŭ lažała papiera ź pieradačaj prava apieki nad synam». Volha Sieviaryniec — pra hady strachu, antydepresanty i nadzieju
Kamientary