Кіроўца паказаў, як праязджаць новую алмазную развязку ў Мінску. У гледачоў узніклі пытанні
Новая алмазная развязка, запушчаная днямі ў Мінску, адразу стала самай папулярнай тэмай абмеркавання для сталічных кіроўцаў. Прапанаваныя ДАІ схемы, як цяпер праязджаць участак Ігуменскага тракта на скрыжаванні з МКАД і вуліцай Бабушкіна хоць і дадалі нагляднасці, але многім не хапіла «натурнай» здымкі. Карыстальнікі тыктоку гэта недагляд паспяшаліся выправіць. Зрэшты, пытанняў у гледачоў менш не стала, піша Telegraf.news.
Літаральна на наступны дзень пасля таго, як ДАІ абвясціла пра адкрыццё руху на гэтым участку, на відэаплатформе TikTok з'явілася нагляднае відэа, так бы мовіць, «з месца падзей»: адзін з кіроўцаў паказаў на практыцы, як рухаюцца сустрэчныя патокі на ромбападобнай развязцы.
Для аўтамабілістаў, звыклых да правабаковага руху, размяшчэнне патокаў на новай развязцы дакладна можа здацца дзіўным і «няправільным»: пасля выезду на развязку ваш паток апынецца злева, а сустрэчны — справа.
Мяркуючы па каментарах, многія кіроўцы ўспрынялі навацыю Дзяржаўтаінспекцыі з занепакоенасцю. У першую чаргу таму, што такое скрыжаванне для беларусаў — у навінку, нідзе ў краіне з такой арганізацыяй руху больш не сустрэнешся на дарогах.
Шмат каму з ходу аказалася складана разабрацца ў хітраспляценнях разметкі, але, як адзначылі іншыя, калі строга прытрымлівацца разметкі і знакаў — заблытацца складана. Па першым часе на скрыжаванні дадаткова ўстаноўленыя яшчэ і пластыкавыя абмежавальнікі, якія звычайна выкарыстоўваюць дарожныя рабочыя пры правядзенні рамонтных работ.
Некаторыя выказалі здагадку, што складаней за ўсё сарыентавацца на такім скрыжаванні будзе прыезджым і тым, хто перасякае скрыжаванне ўпершыню, асабліва — у зімовы час года, калі разметку занясе снегам.
«Ужо не зусім зразумела, а калі прыбраць адбойнікі пластыкавыя і разметку прыцярушыць снегам, то ўдачы ўсім удзельнікам руху», — з доляй скепсісу напісаў адзін з гледачоў.
Яшчэ больш праблем можа ўзнікнуць, на думку каментатараў, калі на такім скрыжаванні сапсуецца святлафор.
«Калі святлафоры не будуць працаваць, тут аварый будзе — адна на адной», — выказаў меркаванне адзін глядач.
«А калі святлафоры зламаюцца, як там рэгуліроўшчык разруліць?» — задаўся пытаннем іншы.
Зрэшты, знайшліся і тыя, хто падтрымаў ініцыятыву ДАІ. Сярод іх апынуліся тыя, каму часта даводзіцца ездзіць гэтым маршрутам у гадзіны пік.
«Гэта, я так разумею, для павароту налева на МКАД зрабілі, каб не стаялі. Таму што ў гадзіну пік з Бабушкіна на ўнутранае кольца цяжкавата трапіць», — падзяліўся вопытам адзін каментатар.
Многія таксама адзначылі, што для таго, каб разабрацца ў асаблівасцях руху на такім «кітайскім» скрыжаванні (такая схема, сапраўды, актыўна ўжываецца ў Кітаі на магістралях з інтэнсіўным рухам), трэба проста «адзін раз праехаць у абодва бакі — і ўсё стане зразумела».
«Заўсёды ўсе новаўвядзенні ўспрымаюць у штыкі. І нязвыкла, і незразумела, так, магчыма, нешта не дадумалі (паставілі б папераджальныя плакаты з усіх бакоў пра змену і як ехаць трэба, было б лягчэй і больш зразумела, але не факт), а з часам прывыкаеш і нібыта нармальна аказваецца. Так што проста разбярыцеся і прывыкніце, нас ніхто не спытаецца — так пакінуць ці вярнуць як было», — рэзюмавала адна з глядачак.
Каментары
Ужо многа гадоў арганізацыяй руху ў Мінску займаюцца разумныя людзі, недзе з 2010-2012.
Дзякуй вам, хлопцы.
Шмат якіх добрых спраў зрабілі, якія спачатку не падабаліся кіроўцам, але потым выдатна спрацоўвалі.
Спадзяюся, так будзе і тут.
У меня проблем с проездами сложных перекрёстков нет. Главное уметь читать дорожные знаки и представлять себе геометрию.
Но умным людям, спроектировавшим заезд-выезд в магазин Материк и Корона на Независимости – нужно забить в голову гвоздь.