Kiroŭca pakazaŭ, jak prajazdžać novuju ałmaznuju raźviazku ŭ Minsku. U hledačoŭ uźnikli pytańni
Novaja ałmaznaja raźviazka, zapuščanaja dniami ŭ Minsku, adrazu stała samaj papularnaj temaj abmierkavańnia dla staličnych kiroŭcaŭ. Prapanavanyja DAI schiemy, jak ciapier prajazdžać učastak Ihumienskaha trakta na skryžavańni z MKAD i vulicaj Babuškina choć i dadali nahladnaści, ale mnohim nie chapiła «naturnaj» zdymki. Karystalniki tyktoku heta niedahlad paśpiašalisia vypravić. Zrešty, pytańniaŭ u hledačoŭ mienš nie stała, piša Telegraf.news.
Litaralna na nastupny dzień paśla taho, jak DAI abviaściła pra adkryćcio ruchu na hetym učastku, na videapłatformie TikTok źjaviłasia nahladnaje videa, tak by mović, «ź miesca padziej»: adzin z kiroŭcaŭ pakazaŭ na praktycy, jak ruchajucca sustrečnyja patoki na rombapadobnaj raźviazcy.
Dla aŭtamabilistaŭ, zvykłych da pravabakovaha ruchu, raźmiaščeńnie patokaŭ na novaj raźviazcy dakładna moža zdacca dziŭnym i «niapravilnym»: paśla vyjezdu na raźviazku vaš patok apyniecca źleva, a sustrečny — sprava.
Miarkujučy pa kamientarach, mnohija kiroŭcy ŭspryniali navacyju Dziaržaŭtainśpiekcyi z zaniepakojenaściu. U pieršuju čarhu tamu, što takoje skryžavańnie dla biełarusaŭ — u navinku, nidzie ŭ krainie z takoj arhanizacyjaj ruchu bolš nie sustreniešsia na darohach.
Šmat kamu z chodu akazałasia składana razabracca ŭ chitrasplacieńniach raźmietki, ale, jak adznačyli inšyja, kali stroha prytrymlivacca raźmietki i znakaŭ — zabłytacca składana. Pa pieršym časie na skryžavańni dadatkova ŭstanoŭlenyja jašče i płastykavyja abmiežavalniki, jakija zvyčajna vykarystoŭvajuć darožnyja rabočyja pry praviadzieńni ramontnych rabot.
Niekatoryja vykazali zdahadku, što składaniej za ŭsio saryjentavacca na takim skryžavańni budzie pryjezdžym i tym, chto pierasiakaje skryžavańnie ŭpieršyniu, asabliva — u zimovy čas hoda, kali raźmietku zaniasie śnieham.
«Užo nie zusim zrazumieła, a kali prybrać adbojniki płastykavyja i raźmietku pryciarušyć śnieham, to ŭdačy ŭsim udzielnikam ruchu», — z dolaj skiepsisu napisaŭ adzin z hledačoŭ.
Jašče bolš prablem moža ŭźniknuć, na dumku kamientataraŭ, kali na takim skryžavańni sapsujecca śviatłafor.
«Kali śviatłafory nie buduć pracavać, tut avaryj budzie — adna na adnoj», — vykazaŭ mierkavańnie adzin hladač.
«A kali śviatłafory złamajucca, jak tam rehuliroŭščyk razrulić?» — zadaŭsia pytańniem inšy.
Zrešty, znajšlisia i tyja, chto padtrymaŭ inicyjatyvu DAI. Siarod ich apynulisia tyja, kamu časta davodzicca jeździć hetym maršrutam u hadziny pik.
«Heta, ja tak razumieju, dla pavarotu naleva na MKAD zrabili, kab nie stajali. Tamu što ŭ hadzinu pik z Babuškina na ŭnutranaje kolca ciažkavata trapić», — padzialiŭsia vopytam adzin kamientatar.
Mnohija taksama adznačyli, što dla taho, kab razabracca ŭ asablivaściach ruchu na takim «kitajskim» skryžavańni (takaja schiema, sapraŭdy, aktyŭna ŭžyvajecca ŭ Kitai na mahistralach ź intensiŭnym rucham), treba prosta «adzin raz prajechać u abodva baki — i ŭsio stanie zrazumieła».
«Zaŭsiody ŭsie novaŭviadzieńni ŭsprymajuć u štyki. I niazvykła, i niezrazumieła, tak, mahčyma, niešta nie dadumali (pastavili b papieradžalnyja płakaty z usich bakoŭ pra źmienu i jak jechać treba, było b lahčej i bolš zrazumieła, ale nie fakt), a z časam pryvykaješ i nibyta narmalna akazvajecca. Tak što prosta raźbiaryciesia i pryvyknicie, nas nichto nie spytajecca — tak pakinuć ci viarnuć jak było», — reziumavała adna z hladačak.
U Minsku adkryli samuju niezvyčajnuju raźviazku — ałmaznuju. Vyjazdžać treba jak by na sustrečku FOTA
U Minsku Daŭhinaŭski trakt złučać z praśpiektam Mašerava KARTA
Z 1 vieraśnia pavialičvajuć košt prajezdu pa płatnych darohach
U Minsku biaspraŭnikaŭ łoviać pa kamierach. Navat tych, chto jedzie z maskaj na tvary
«Ja byŭ suprać, kab mianie mianiali na 20 rasijskich vajskoŭcaŭ. Nie zmoh by hladzieć u vočy ludziam, syny jakich siadziać»: pieršaje intervju eks-mera Chiersona
Kamientary
Užo mnoha hadoŭ arhanizacyjaj ruchu ŭ Minsku zajmajucca razumnyja ludzi, niedzie z 2010-2012.
Dziakuj vam, chłopcy.
Šmat jakich dobrych spraŭ zrabili, jakija spačatku nie padabalisia kiroŭcam, ale potym vydatna spracoŭvali.
Spadziajusia, tak budzie i tut.
U mienia problem s projezdami słožnych pieriekriostkov niet. Hłavnoje umieť čitať dorožnyje znaki i priedstavlať siebie hieomietriju.
No umnym ludiam, sprojektirovavšim zajezd-vyjezd v mahazin Matierik i Korona na Niezavisimosti – nužno zabiť v hołovu hvozd́.