На чэмпіянаце свету па лёгкай атлетыцы Крысціна Ціманоўская пабяжыць толькі ў адной дысцыпліне
У мінулую суботу ў сталіцы Японіі стартаваў чэмпіянат свету па лёгкай атлетыцы. У Токіа вярнулася беларуска, якая зараз выступае за зборную Польшчы.
Чатыры гады таму Крысціна пакінула Алімпіяду ў Токіа. У жніўні 2021-га падчас Алімпійскіх гульняў у Японіі афіцыйная беларуская дэлегацыя спрабавала прымусам вывезці спрынтарку пасля таго, як яна публічна паскардзілася на тое, што яе без згоды ўнеслі ў склад няпрофільнай эстафеты 4 па 400 метраў. У аэрапорце Ціманоўская адмовілася сядаць у самалёт, папрасіла абароны ў японскай паліцыі і атрымала гуманітарную візу ў амбасадзе Польшчы, нагадвае «Трыбуна».
Сёлета на чэмпіянаце свету Ціманоўская мае выступіць толькі ў жаночай эстафеце 4×100 м. Разам з ёй у каманднай заяўцы фігуруюць Эва Свабода, Магдалена Нямчук, Аляксандра Піятроўская, Магдалена Стэфановіч, Марлена Гранашэўская (з іх на дарожку выйдуць толькі чацвёра, калі не здарыцца якога форс-мажора).
Папярэднія забегі пройдуць 20 верасня, фінал жа прызначаны на 21-е.
А чаму Ціманоўская выступае толькі ў эстафеце?
Тут усё проста. Кваліфікацыйныя нормы на чэмпіянат свету — 11,07 на 100 м і 22,57 на 200 м. Ціманоўская іх не выканала. Па сусветным рэйтынгу яна таксама не прайшла (152-я на 100 м і 112-я на 200 м). Польская федэрацыя лёгкай атлетыкі ўзяла спартсменку выключна пад эстафету (індывідуальна ў жаночых 100 м Польшчу прадстаўляе толькі Свабода).
У сезоне-2025 Ціманоўская паказала на стометроўцы найлепшы час падчас чэмпіянату Польшчы. 11,38 дазволілі ўзяць тытул — але не адабрацца на ЧС у індывідуальную праграму. Спартоўка мусіла бегчы і ў фінале на 200 м, але знялася праз дробную траўму. У гэтым сезона яе найлепшы час на такой дыстанцыі складае 23,20.
Беларускія і расійскія каманды на чэмпіянат свету не дапушчаныя.
Цяпер чытаюць
Лукашэнка загадаў прышчапляць нелюбоў да Польшчы пачынаючы са школы82
Лукашэнка загадаў прышчапляць нелюбоў да Польшчы пачынаючы са школы
«У выніку ён сказаў мне: «Хопіць мяне шантажаваць, я хачу палюбавацца гэтымі дрэвамі». Аксана Колб расказала, пра што размаўляла са Статкевічам на мяжы88
Каментары