Пяскоў і Лаўроў заявілі пра неабходнасць «па-мужчынску» трымацца «разуменняў», дасягнутых у Анкорыджы
Расійскае кіраўніцтва ўсё часцей спасылаецца на нейкія таемныя пагадненні з ЗША па ўкраінскім пытанні, дасягнутыя падчас сустрэчы ў Анкорыджы, і настойвае на іх.
Прарыў па Украіне магчымы толькі пры захаванні разуменняў, дасягнутых у Анкорыджы, заявіў прэс-сакратар Крамля Дзмітрый Пяскоў.
Ён падкрэсліў, што Крэмль не хоча публічна ўдавацца ў дэталі дасягнутых дамоўленасцяў, размовы трэба весці ў закрытым рэжыме.
Прыкладна так на гэтую тэму выказаўся і міністр замежных спраў Сяргей Лаўроў. Ён падкрэсліў, што Масква прыняла канкрэтную прапанову Вашынгтона. Паводле яго слоў, «калі падыходзіць па-мужчынску», то пытанне павінна быць вырашана, паколькі расійскі бок даў згоду на ўмовы ЗША.
Кіраўнік МЗС РФ адзначыў, што Крэмль не цікавіць меркаванне Украіны ці Еўрасаюза з іх «пячорнай русафобіяй». Ключавым для Пуціна застаецца выключна пазіцыя Злучаных Штатаў.
Лаўроў кажа, што пасля Анкорыджа Расія была гатовая да маштабнага супрацоўніцтва з ЗША, аднак на практыцы бачыць толькі новыя санкцыі.
«Пакуль на практыцы ўсё выглядае наадварот: уводзяцца новыя санкцыі, ідзе «вайна» супраць танкераў у адкрытым моры ў парушэнне Канвенцыі ААН па марскім праве. Індыі і іншым нашым партнёрам спрабуюць забараніць купляць танныя, даступныя расійскія энерганосьбіты — Еўропе даўно ўжо забаранілі – і прымушаюць купляць утрая даражэй амерыканскі звадкаваны прыродны газ. Гэта значыць на эканамічнай ніве амерыканцы абвясцілі задачу эканамічнага дамінавання», — сказаў Лаўроў.
Цяпер чытаюць
Студэнтак беларускіх ВНУ абавязалі тэрмінова запоўніць анкету з пазначэннем свайго росту73
Каментары