Якія вакцыны ад грыпу даступныя ў Беларусі і калі чакаюць пік захворванняў
Людзей з груп рызыкі бясплатна прышчапляюць расійскай вакцынай «Грыпол Плюс». За ўласныя грошы можна будзе выбраць замежныя прэпараты. Істотнага росту захворванняў медыкі чакаюць у канцы студзеня — пачатку лютага 2027 года.
Кампанія масавай вакцынацыі ад грыпу пачалася ў Беларусі ў кастрычніку, паведамляюць «Мінск-Навіны» са спасылкай на эпідэміёлага Кірыла Ігнатава.
Бясплатна вакцынай «Грыпол Плюс» расійскай вытворчасці прышчапляюць людзей, для якіх грып асабліва небяспечны:
- дзяцей ад шасці месяцаў да трох гадоў;
- дзяцей ад трох гадоў і дарослых з хранічнымі захворваннямі або імунадэфіцытам;
- людзей ва ўзросце ад 65 гадоў;
- цяжарных жанчын;
- медыцынскіх і фармацэўтычных работнікаў;
- дзяцей і дарослых ва ўстановах з кругласутачным знаходжаннем;
- супрацоўнікаў дзяржаўных органаў, якія забяспечваюць бяспеку і жыццядзейнасць насельніцтва.
Медыкі ставяць мэтай — вакцынаваць не менш за 75% людзей з груп рызыкі.
Для платнай вакцынацыі ў медыцынскіх установах абяцаюць прапанаваць «Інфлювак Тэтра» вытворчасці Нідэрландаў і французскую вакцыну «Ваксігрып Тэтра».
Склад вакцын на сезон 2026—2027 гадоў абнавілі. У яго ўключылі кампаненты супраць штамаў A(H1N1) «Місуры», A(H3N2) «Дарвін» і віруса грыпу B лініі «Вікторыя» — «Токіа». Менавіта такі склад для Паўночнага паўшар’я рэкамендавала Сусветная арганізацыя аховы здароўя.
Цяпер у Беларусі выяўляюць толькі негрыпозныя рэспіраторныя вірусы: парагрып, рынавірусы, бакавірусы і адэнавірусы. Сітуацыю эпідэміёлагі называюць стабільнай.
Значны сезонны рост захворвання на вострыя рэспіраторныя інфекцыі прагназуюць на канец студзеня — пачатак лютага 2027 года. Пік чакаецца ў лютым, калі адначасова могуць цыркуляваць грып, каранавірус SARS-CoV-2 і іншыя рэспіраторныя вірусы.
Прышчэпка не гарантуе, што чалавек зусім не заразіцца грыпам, але зніжае рызыку цяжкага ходу хваробы і небяспечных ускладненняў.
Каментары
Вакцына ад грыпу - развод. Уколяць вадзічку і ўсё адно захварэеш. І сам і куча знаёмых рабілі - і ўсё адно праз аднаго захворвалі. А хто не рабіў, захворвалі не часцей. Наогул заканамернасці не праглядаецца.