Ментусава прыйшла на Венецыянскі кінафестываль у кімано з імёнамі палітзняволеных жанчын ФОТАФАКТ
Вядучая Марына Ментусава прыйшла на прэм'еру фільма «Лісты з маўклівай краіны» Андрэя Куцілы на Венецыянскім кінафестывалі і скарыстала гэту магчымасць для таго, каб нагадаць пра лёс беларускіх палітзняволеных.
Фота: t.me/marinamentusova
Марына Ментусава сама мела дачыненне да гэтага фільма — яе голасам там гаворыць былая палітзняволеная Кася Будзько, якую асудзілі па «справе студэнтаў».
«Сёння сусветная прэм'ера Letters Андрэя Куцілы пройдзе на Венецыянскім кінафестывалі. І я прыйшла туды не адна — са мной імёны Касі і іншых жанчын-палітзняволеных. Спадзяюся, яны аднойчы пройдуць па гэтай чырвонай дарожцы самі», — напісала Ментусава.
Фота: t.me/marinamentusova
Кімано для вядучай, на якім напісаныя імёны палітзняволеных у Беларусі жанчын, стварыла беларуская дызайнерка Вольга Кардаш (KARDASH).
Праца над поўнаметражнай дакументальнай стужкай «Лісты з маўклівай краіны» Андрэя Куцілы працягвалася больш за пяць гадоў. Яна расказвае пра тонкую, але трывалую сувязь беларускіх палітзняволеных з роднымі праз муры турмы — пра тое, як гэта сувязь трымаецца праз лісты. Стужка створана міжнароднай камандай Польшчы, Германіі і Літвы.
Чытайце таксама:
Дакументальны фільм рэжысёра з Баранавічаў Андрэя Куцілы пакажуць на Венецыянскім кінафестывалі
«Бываюць моманты, калі лютая нянавісць засцілае вочы»: Каверын пра супрацу з Ментусавай
«Давайце паліць». Ментусава паўтарыла флэшмоб іранскіх жанчын