Erdahan: Biez Turcyi Jeŭropa nie zmoža harantavać svaju biaśpieku
Va ŭmovach niestabilnaści ŭ śviecie i rostu napružanaści ŭ niekatorych jaho rehijonach Jeŭropa moža abapiercisia na Turcyju, bieź jakoj niemahčyma harantavać biaśpieku kantynienta. Pra heta zajaviŭ turecki prezident Redžep Taip Erdahan, vystupajučy na štohadovym dypłamatyčnym forumie ŭ Antalji, piša Euronews.
Redžep Taip Erdahan. Fota: Mert Gokhan Koc / dia images via Getty Images
Erdahan zajaviŭ, što jahonaja kraina moža dapamahčy pieraadoleć hieapalityčnyja roznahałośsi, źviazanyja z Ukrainaj, Siryjaj i handlovaj vajnoj, jakaja ŭźnikła z-za uviedzienych Złučanymi Štatami mytaŭ.
«U čarhovy raz stała jasna, što jeŭrapiejskaja biaśpieka niemahčymaja biez Turcyi. Turcyja hatovaja ŭziać na siabie adkaznaść za jeŭrapiejskuju biaśpieku i ŭ budučyni», — skazaŭ jon na adkryćci trochdzionnaha forumu.
Pa miery paharšeńnia transatłantyčnych adnosin pry administracyi Donalda Trampa Turcyja, jakaja maje druhija pa kolkaści ŭzbrojenyja siły ŭ błoku NATA i raźvituju abaronnuju pramysłovaść, imkniecca da taho, kab adyhryvać bolš značnuju rolu na mižnarodnaj arenie. Tak, Turcyja stała klučavym pasiarednikam u pieramovach pa Čarnamorskaj inicyjatyvie, padtrymlivajučy dyjałoh jak z Ukrainaj, tak i z Rasijaj.
Pry hetym jak Erdahan, tak i Tramp nie raz kazali pra dobryja asabistyja stasunki pamiž imi.
«Ja vieru, što naša supracoŭnictva sa Złučanymi Štatami budzie raźvivacca va ŭsich halinach padčas druhoha prezidenckaha terminu Trampa, u tym liku dziakujučy našaj mocnaj družbie ź im», — skazaŭ turecki prezident i hetym razam.
Havoračy pra ŭviedzienyja Trampam taryfy, Erdahan adznačyŭ, što 10%-ja myty na tureckija tavary mohuć mieć i stanoŭčy efiekt dla ekanomiki krainy.
«My robim usio mahčymaje z metaj nie dapuścić, kab vostraja kamiercyjnaja kankurencyja praz mytnyja taryfy stała razburalnaj, — skazaŭ Erdahan. — Turcyja budzie siarod krain, jakija vyjhrajuć ad hetaha pracesu».
Sam turecki prezident usie apošnija miesiacy sprabuje ŭtajmavać manifiestantaŭ, jakija pravodziać akcyi ŭ padtrymku hałoŭnaha palityčnaha praciŭnika Erdahana, mera Stambuła Ekrema Imamohłu, jaki znachodzicca ŭ turmie.
Čytajcie taksama:
Erdahan padaŭ u sud na lidara tureckaj apazicyi i patrabuje ź jaho 13 tysiač dalaraŭ
Rasii pahražajuć novyja sankcyi, kali nie budzie pahadnieńnia ab pieramirji da kanca krasavika
Rasija patrabuje za mir pieradać joj čatyry ŭkrainskija rehijony