Pucin pasłaŭ u Baku vyrašać kanflikt z Alijevym svajho byłoha adjutanta

U Baku nakiravaŭsia samalot MNS Rasii, jakim karystajecca ministr nadzvyčajnych situacyj Alaksandr Kurankoŭ — były adjutant Uładzimira Pucina, paviedamlajuć «Važnyje istorii». Jon nibyta pavinien pravieści nieaficyjnyja pieramovy z azierbajdžanskimi čynoŭnikami, pieradać asabistaje «pasłańnie» ad Pucina prezidentu Azierbajdžana Ilchamu Alijevu i abmierkavać mahčymy abmien zatrymanymi.

Alaksandr Kurankoŭ. Fota: pres-słužba MNS Rasii

Hety vizit adbyvajecca na fonie rostu napružanaści ŭ adnosinach pamiž Rasijaj i Azierbajdžanam. Raniej Rasija pačała naroščvać svajo vajskovuju prysutnaść u Armienii, asabliva na bazie ŭ Hiumry.

Kanflikt abvastryŭsia paśla padziej u Jekaciarynburhu 27 červienia, dzie rasijskija siłaviki zatrymali bolš za 50 pradstaŭnikoŭ azierbajdžanskaj dyjaspary. Padčas zatrymańnia zahinuli dva braty Safaravy — vychadcy z Azierbajdžana. Azierbajdžanskija krynicy śćviardžajuć, što ich zabili, a Śledčy kamitet Rasii kaža, što adzin nibyta pamior ad infarktu, a pryčyna śmierci druhoha vyśviatlajecca.

U adkaz MZS Azierbajdžana vyklikaŭ rasijskaha dypłamata i zapatrabavaŭ poŭnaha rasśledavańnia. Nieŭzabavie paśla hetaha ŭ Baku prajšli pieratrusy ŭ ofisie rasijskaha ŚMI «Sputnik Azierbajdžan» — zatrymali niekalki čałaviek, u tym liku nibyta źviazanych z FSB.

Taksama ŭ Rasii adbylisia zatrymańni pradstaŭnikoŭ azierbajdžanskaj dyjaspary: u Jekaciarynburhu zatrymali lidara Šachina Šychlinskaha, a ŭ Varoniežy — pradprymalnika Jusifa Chaliłava.

Rasijska-azierbajdžanski kanflikt nabyvaje ŭsio bolš vostry charaktar, a vizit u Baku Kurankova, vierahodna, źjaŭlajecca sprobaj jaho ŭrehulavać.

Kamientary da artykuła