Čamu znoŭ sapsavalisia adnosiny pamiž Rasijaj i Azierbajdžanam. Źjaŭlajucca detali spravy

U Jekaciarynburhu 27 červienia 2025 hoda rasijskija siłaviki zatrymali bolš za 50 čałaviek, pieravažna vychadcaŭ z Azierbajdžana, piša «Baza». 

Pavodle Śledčaha kamiteta RF, apieracyja była źviazanaja z rasśledavańniem zabojstva 2001 hoda biznemiena Junisa Pašajeva kala kafe «Kaśpij», jakoje naležała siamji Safaravych, a taksama inšych złačynstvaŭ 2010—2011 hadoŭ.

U vyniku zatrymańniaŭ 27 červienia zahinuli braty Zijadzin i Husejn Safaravy. Aficyjna SK paviedamiŭ, što adzin z bratoŭ pamior ad sardečnaj niedastatkovaści, a pryčyna śmierci druhoha vyśviatlajecca.

Adnak svajaki śćviardžajuć, što jany byli zakatavanyja padčas zatrymańnia. 

ŚMI Azierbajdžana paviedamili, što zatrymanych źbili, a bratoŭ zabili.

Azierbajdžanskaje vydańnie Oxu.Az apublikavała fatahrafii hiematom na ciełach Ramila i Muchamieda Safaravych (jany prachodziać u statusie śviedak), zatrymany Ajaz Safaraŭ vystupiŭ u sudzie sa śladami źbićcia na tvary. Pry hetym mužčyna zajaviŭ, što «ŭpaŭ jašče da zatrymańnia».

Z čym źviazanyja zatrymańni?

Pavodle viersii śledstva, zatrymanych padazrajuć u datyčnaści da zabojstva Junisa Pašajeva, jaki zahinuŭ ad nažavych ranieńniaŭ u traŭni 2001 hoda kala kaviarni «Kaśpij» (što naležyć siamji Safaravych) i jašče ŭ niekatorych złačynstvach. 

Pavialičyć

Jak adreahavali ŭ Azierbajdžanie?

MZS Azierbajdžana nazvaŭ dziejańni siłavikoŭ «nieprymalnym hvałtam», zaklikaŭšy rasijskija ŭłady rasśledavać parušeńni pry praviadzieńni śledčych dziejańniaŭ, a taksama zajaviŭ «rašučy pratest» časovamu pavieranamu ŭ spravach ambasady RF u krainie.

Delehacyja deputataŭ z parłamienta krainy admoviłasia ad udziełu ŭ 23-m pasiadžeńni mižparłamienckaj kamisii pa supracoŭnictvie pamiž Azierbajdžanam i Rasijaj.

Usie bližejšyja rasijskija kancerty, fiestyvali, śpiektakli, vystavy admienieny ŭ Azierbajdžanie.

U pryvatnaści, admienieny kancert Leanida Ahucina i Anžaliki Varum, Basty, pastanoŭki «Ščaŭkunok», «Dziujmovačka», «Majstar i Marharyta», a taksama vystupleńni rasijskich komikaŭ.

Uličvajučy demanstratyŭnyja, metanakiravanyja i pazasudovyja zabojstvy i akty hvałtu, učynienyja pravaachoŭnymi orhanami Rasii suprać azierbajdžancaŭ pa etničnaj prykmiecie ŭ Jekaciarynburhu, a taksama toj fakt, što ŭ apošni čas padobnyja vypadki nabyli sistematyčny charaktar, admianiajucca kulturnyja mierapryjemstvy, u tym liku kancerty, fiestyvali, śpiektakli, vystavy, zapłanavanyja da praviadzieńnia ŭ Azierbajdžanie pa linii dziaržaŭnych i pryvatnych ustanoŭ Rasii, zajavili ŭ Ministerstvie kultury Azierbajdžana.

Taksama azierbajdžanskija siłaviki pryjšli ŭ redakcyju «Sputnik-Azierbajdžan» (u lutym jaho dziejnaść była prypynienaja pa zakonie, jaki abmiažoŭvaje zamiežnaje vałodańnie ŚMI). 

U cełym azierbajdžanskija ŚMI vystupili z rezkaj krytykaj: rasiejcaŭ abvinavacili ŭ nacyjanaliźmie i pryhniocie małych narodaŭ.

Cieły zahinułych azierbajdžancaŭ addali rodnym. U Azierbajdžanie źbirajucca pravieści ekśpiertyzu pryčynaŭ ich śmierci. 

Pavialičyć

Pavialičyć

A što ŭ Rasii?

Kiraŭnik SK RF Alaksandr Bastrykin daručyŭ pieradać kryminalnuju spravu ŭ dačynieńni da ŭdzielnikaŭ złačynnaj hrupy ŭ Jekaciarynburhu ŭ centralny aparat viedamstva.

Pres-sakratar prezidenta RF Dźmitryj Piaskoŭ zajaviŭ, što Rasija škaduje ab rašeńniach, pryniatych Azierbajdžanam.

«My ličym, što ŭsio, što adbyvajecca, źviazana z pracaj pravaachoŭnych orhanaŭ, i heta nie moža i nie pavinna źjaŭlacca padstavaj dla padobnaj reakcyi. My zacikaŭleny i dalej raźvivać našy dobryja adnosiny z Azierbajdžanam», — skazaŭ jon

• 6
• 0
• 6
• 4
• 0
• 0
• 3
• 0