Abjadnany pierachodny kabiniet vykazaŭsia adnosna dykpikaŭ Stryžaka

Aficyjna apublikavany ŭ telehram-kanale Abjadnanaha pierachodnaha kabinieta Biełarusi tekst nazyvajecca «pazicyjaj nakont etyčnych normaŭ dziejnaści pradstaŭnikoŭ demakratyčnych sił», i ŭ im nie nazyvajucca nijakija imiony, ale čas vydańnia i źmiest dakumienta vyrazna śviedčać pra toje, što tryhieram dla jaho vydańnia stała situacyja z rassyłańniem dykpikaŭ kiraŭnikom Fonda salidarnaści «Bajsoł» Andrejem Stryžakom, pra što stała viadoma ŭčora. 

Andrej Stryžak

U zajavie APKB adznačajecca, što 

«apošnim časam my z žalem nazirajem za tym, što niekatoryja pradstaŭniki demakratyčnaha ruchu, jakija reprezientujuć hramadskaść i pretendujuć być lidarami mierkavańnia, nie zaŭždy demanstrujuć važnyja etyčnyja standarty ŭ svaim piersanalnym žyćci i prafiesijnaj dziejnaści, što prajaŭlajecca ŭ temach chatniaha hvałtu, charasmientu, seksualnaha pieraśledu, jakija traplajuć u publičnyja abmierkavańni».

Na dumku členaŭ Abjadnanaha pierachodnaha kabinieta, «padobnyja situacyi tyčacca nie tolki pavodzin adnaho čałavieka. Jany zakranajuć šyrejšaje pytańnie —

pra toje, jakoje asiarodździe my stvarajem u demakratyčnym ruchu i jakija etyčnyja standarty my raspracoŭvajem i padzialajem jak rolevyja madeli dla hramadstva ŭ cełym i hramadskaj dumki ŭ pryvatnaści».

U APKB ličać, što nielha dazvalać nijakich formaŭ damahańniaŭ, abraz ci prymusu. Niedapuščalna vykarystoŭvać svoj aŭtarytet u hramadzianskaj supolnaści dla pavodzin, jakija pierastupajuć miežy inšych ludziej, prynižajuć abo traŭmirujuć ich, asabliva žančyn, i robiać asiarodździe niebiaśpiečnym emacyjna, psichałahična ci fizična. Kožny, chto zajmaje adkaznuju pazicyju, pavinien razumieć, što ŭłada pačynajecca z asabistaj adkaznaści pierad tymi, chto tabie daviaraje.

Kožny čałaviek, asabliva žančyny i pradstaŭniki inšych uraźlivych hrup, maje prava na pavahu, biaśpieku i abaronu svaich miežaŭ. Nichto nie pavinien bajacca, što zvyčajnyja stasunki mohuć pierajści ŭ hvałt, cisk abo manipulacyi. Ludzi, jakija zajmajuć kiraŭničyja pazicyi ŭ arhanizacyjach abo palitycy, pavinny pamiatać: kali ich pavodziny škodziać inšym, heta ŭpłyvaje na ŭsiu supolnaść.

«My zastajemsia prychilnikami demakratyi, prazrystaści, pavahi i asabistaj adkaznaści. I my ličym, što adkrytaje abmierkavańnie składanych tem — heta nie pahroza, a prajava mocnaj, darosłaj i zdarovaj supolnaści, a taksama admieny kultury zamoŭčvańnia, jakaja jość častkaj patryjarchatu. Kožny z nas niasie adkaznaść za svaje słovy i dziejańni, ale asabliva vialikaja jana ŭ tych, chto ŭpłyvaje na inšych, chto maje aŭtarytet abo publičnuju rolu», — kanstatujecca ŭ zajavie Abjadnanaha pierachodnaha kabinieta.

Kamientary da artykuła