Kiraŭnika Fonda salidarnaści «Bajsoł» Andreja Stryžaka abvinavacili ŭ tym, što jon vysyłaŭ biełaruskim aktyvistkam i pravaabaroncam dykpiki — fatahrafii svajho pałavoha orhana, piša «Jeŭraradyjo». Niekalki fiem-aktyvistak paćvierdzili vydańniu, što viedajuć pra situacyju, i im viadoma pra jak minimum siem padobnych kiejsaŭ.
Dźvie dziaŭčyny (ich imiony źmienienyja) raskazali «Jeŭraradyjo» pra svoj dośvied atrymańnia niaprošanych fota i toje, što było potym.
Alina
Pradstaŭnica hramadzianskaha siektara Alina paznajomiłasia sa Stryžakom u 2023 hodzie. Jana kaža, što adrazu adčuła ad jaho «vajb», jaki ŭsprymała jak formu lohkaj kamunikacyi, zručnaj u supracoŭnictvie.
«Užo potym jon pačaŭ rabić kamplimienty: maŭlaŭ, ty pryhožaja. Ja jamu skazała, što ja nie volnaja. A jon: «Nie chvalujsia: mužy prychodziać i sychodziać, a Stryžak zastajecca». I heta byŭ namiok, što jon u roli viečnaha paluboŭnika adčuvaje siabie dobra».
Dziaŭčyna tady źviarnuła ŭvahu na jaho siamiejny status, što jon žanaty i maje maleńkaje dzicia, i pieravodziła jahony flirt u žarty.
Jon pieryjadyčna zaprašaŭ Alinu na piva. Dziaŭčyna kaža, što nikoli nie sustrakałasia ź im sam-nasam.
«Maksimum, kudy našy adnosiny zachodzili, — heta siabroŭskaja zona, dzie my abmieńvalisia paviedamleńniami ŭ sacsietkach».
U niejki ź dzion dziaŭčyna pravodziła čas sa svaim chłopcam, pra što viedaŭ Stryžak, i jana atrymała ad Andreja fotazdymak.
«Ja jaho nazvała birpik [na fota, jakoje pakazała «Jeŭraradyjo» hierainia, hienitalii častkova prykrytyja blašankaj piva. — Red.]. Mianie pieratresła, kali ja pra heta ciapier uspomniła. I jon palez u majo asabistaje žyćcio. Ja ŭžo nie kažu pra toje, što ja tady vielmi stresanuła, nie daj boh heta ŭbačyć moj chłopiec.
Ja nie viedała, jak siabie ŭ takoj situacyi pavodzić. Ja nie davała padstaŭ, kab takoje mnie dasyłać, ale jak ja budu heta apraŭdvać pierad maim maładym čałaviekam?»
Alina tady jamu adkazała, što takija paviedamleńni nielha vysyłać žančynam bieź ich zhody. Pry hetym, kaža Alina, adnačasova ź joj fota ad Stryžaka nibyta atrymali jašče dźvie aktyvistki.
Alina ciapier užo razumieje, što toje, što spačatku zdavałasia «adkrytymi prafiesijnymi znosinami», akazałasia «zachodam na padkat».
«Heta nie adzinaja situacyja, kali mužčyny z demsiłaŭ sprabavali pračekać moj status: volnaja ci zaniataja. Ale ŭ inšych vypadkach heta nie zachodziła za maje asabistyja miežy i maja admova ŭsprymałasia narmalna. Ja tut nie mahu mieć pretenzii, usie my kahości šukajem. Ale ŭ hetaj situacyi ja liču, što maja piersanalnaja zona była parušanaja. Kali b ja mahła pierapisać moj adkaz, ja b adkazała bolš žorstka, dała b zrazumieć, što heta absalutna nieprymalna dla čałavieka z takim statusam.
Mnie było niepryjemna, heta pakinuła asadak na doŭhi čas. Heta ŭpłyvaje na libida, na seksualnuju blizkaść, na davier da mužčyn. Mnie treba było niekalki dzion, kab pryjści ŭ siabie i prapracavać heta ź psichołaham. Ja adčuvała siabie tak, byccam ja zdradžvaju svajmu chłopcu, byccam ja niesumlennaja, choć ja tolki atrymała hetaje fota, ale ničoha nie vysłała, užo dakładna nie prasiła jaho mnie vysyłać i nie davała dla hetaha nijakaj padstavy».
Alina źviartaje ŭvahu na toje, što nie kožnaja dziaŭčyna navažycca raskazać pra takija vypadki, ryzykujučy trapić pad cisk ci zvalnieńnie. Na dumku dziaŭčyny, Stryžak moža karystacca svaim statusam u demsiłach pry adnosinach z aktyvistkami.
Hanna
Aktyvistka Hanna raskazała «Jeŭraradyjo», što pieršy kantakt z Andrejem Stryžakom byŭ nie tak daŭno. Jany paznajomilisia padčas adnaho ź mierapryjemstvaŭ.
«My damovilisia paśla iventu schadzić kudy-niebudź: pahavaryć, paznajomicca, abmierkavać niejkija pracoŭnyja pytańni, tamu što maja praca pierasiakajecca ź jaho pracaj. Heta značyć, u mianie byŭ zapyt u siabroŭskaj formie i davoli vidavočny dla mianie».
Ale, mabyć, hety zapyt byŭ uspryniaty im inakš. Jany sustrelisia ŭ bary i paśla pačali razmaŭlać nie tolki na pracoŭnyja temy.
«Paźniej razmaŭlali prosta pra žyćcio, pra historyju Biełarusi, heta značyć, na mnohija temy. U hetym nie było ničoha z seksualnym padtekstam z majho boku. Ja nie sprabavała jaho niejak pryciahnuć ci, umoŭna kažučy, padkacić. Ale jon pačaŭ niejak vyvodzić mianie na seksualnyja temy, pytacca ŭ mianie pra maje seksualnyja adnosiny, pra maje adnosiny ź ludźmi, ci jość u mianie partniory i inšaje. Kab jaho nie pakryŭdzić, ja pačynała kazać pra inšaje.
Uviečary, kali ja była ŭžo doma, jon prosta vysłaŭ mnie videa i fota z členam».
Paśla hetaha Hanna nie adkazvała na jaho paviedamleńni.
«Ja prosta nie razumieju matyvacyi. U mianie heta vyklikaje ahidu. Ja ŭ cełym nie prašu dykpiki, ale kali ja jaho jašče i nie prasiła, heta prosta niejkaje ŭvarvańnie ŭ maju asabistuju prastoru. Dla mianie heta jak prynižeńnie majoj asabistaj hodnaści. Ja adčuvaju siabie pryhniečanaj i razhublenaj. Chočacca prosta vyklučyć telefon, palažać i pahladzieć sieryjały».
Praź niekalki miesiacaŭ Andrej Stryžak znoŭ pačaŭ joj pisać, prapanoŭvać sustrecca, uspaminaje Hanna.
«Ja napisała jamu, što mnie taki farmat kamunikacyi nie akiej, davaj my heta abmiarkujem. Ja jamu skazała, što mnie heta było niekamfortna, niepryjemna. Ale jon praciahnuŭ mnie dasyłać paviedamleńni ŭ tonie, što taki byŭ cudoŭny viečar, ja chaču pahładzić tvaje vałasy — heta značyć takoha płanu paviedamleńni, jakija byli prosta hipierniekamfortnyja, ja na ich nie adkazvała niekalki miesiacaŭ, ale jon usio adno praciahvaŭ pisać».
Hanna dadaje, što padčas toj asabistaj sustrečy Stryžak raskazvaŭ joj pra svaje adnosiny z žonkaj, pra rastańnie ź joj, pra dziaciej. Pa adčuvańniach surazmoŭcy, jon «sprabavaŭ stvaryć uražańnie, što jon svabodny partnior».
«Moža ja nie była rezkaj, ja nie chacieła pakryŭdzić čałavieka. Ja sprabavała paznačyć svaju pazicyju jak maha bolš zrazumieła, i mnie zdajecca, ja davoli jasna heta zrabiła. Dumaju, što navat fakt, što ja nie adkazvała na paviedamleńni niekalki miesiacaŭ, pavinien byŭ dać zrazumieć, što ja nie vielmi nastrojenaja na takoha rodu kamunikacyju», — kaža Hanna.
Ale Andrej Stryžak praciahvaŭ joj pisać na praciahu jašče niekalkich miesiacaŭ, kaža dziaŭčyna. Jany taksama pierasiakalisia na roznych akcyjach i mierapryjemstvach.
Pa słovach Hanny, Stryžak paśla pieršaj sustrečy pačaŭ jaje zaŭvažać: uśmichacca, padychodzić, vitacca, sprabavać pryabniać. Ciapier jana imkniecca jaho paźbiahać.
«Heta nie zaŭsiody dapamahaje. Tamu što ŭ nas sumiežnyja śfiery pracy. I ja prosta nie mahu pierajści hetuju miažu, jakaja dla mianie sfarmavałasia ŭ dačynieńni da jaho. I narmalna papracavać z arhanizacyjaj, jakuju ja liču vielmi kłasnaj. U mianie ciapier niama da jaje dostupu».
Hanna raskazvaje, što niekalki dziaŭčat joj raskazvali pra padobnaje staŭleńnie z boku Stryžaka da ich. Maŭlaŭ, davodziłasia rezka paznačać svaje miežy, kab jon zrazumieŭ, što heta nie spatkańnie abo forma padkatu da jaho. Ciapier Hanna adčuvaje bol ad taho, što mužčyny nie razumiejuć, praz što prachodziać dziaŭčaty z-za takoha staŭleńnia.
Kamientar Stryžaka
Adrazu paśla vychadu artykuła Andrej Stryžak prakamientavaŭ jaho ŭ fejsbuku, faktyčna pryznaŭšy, što abvinavačańni na jaho adras majuć padstavu. Jon nazvaŭ svaje dziejańni «rečami, jakimi nie hanarycca».
«U žyćci kožnaha čałavieka jość jahonyja ŭčynki, što nie dadajuć jamu honaru. Ja tut nie vyklučeńnie, za sorak hadoŭ žyćcia maju ŭčynki i rašeńni, dzie ja nie mieŭ racyi.
Pa-pieršaje, nakont taho, što było ahučana ŭ materyjale «Jeŭraradyjo», ja chaču prynieści svaje vybačeńni ŭsim, kaho mahli pakryŭdzić, začapić, paturbavać maje dziejańni.
Pa-druhoje, maje dziejańni nie nieśli ŭ sabie prymusu, karystańnia słužbovym stanoviščam, imknieńnia da vyhady, ci čahości takoha. Nie źjaŭlalisia vynikam złoha namieru ci žadańnia kamuści naškodzić.
Pa-treciaje, abmierkavańnie niuansaŭ majho pryvatnaha žyćcia ja viadu z tymi ludźmi, chto źjaŭlajecca jahonaj častkaj, tamu dadatkova tut niama što abmiarkoŭvać z maim udziełam.
Nu i apošniaje, ale nie najmieńš važnaje. Kali hety dopis kamuści jašče dapamoža pieraasensavać svaje pavodziny, vybačycca pierad kimści, ja budu ličyć što maje pamyłki i praca nad imi dapamahli nia tolki mnie», — napisaŭ Andrej Stryžak.
Apytanka
«Heta tabie zamiest kvietak». Psichołah patłumačyŭ, čamu mužčyny robiać dykpiki
«Kali ŭbačyła toj samy …» Internet horača acaniŭ dykpik z kanała Hajdukieviča
«Słali nam tolki pahrozy i sprabavali ŭzłamać». Dykpik u kanale Hajdukieviča źjaviŭsia paśla kantaktu z Azaronkam
U kanale Aleha Hajdukieviča apublikavali dykpik. Padobna, z deputackaj rukoj
Minčuki skardziacca na atručvańnie paśla naviedvańnia viadomaha restarana. Pracu ŭstanovy prypynili4
Kamientary