Padčas rasijskaj ataki dronami na Polšču žyły dom moh być paškodžany abłomkami polskaj rakiety

Polskaje vydańnie Rzeczpospolita paviedamiła, što ŭ vyniku incydentu 10 vieraśnia ŭ vioscy Vyryki Lublinskaha vajavodstva ŭ žyły dom trapiŭ nie rasijski dron, jak mierkavałasia raniej, a abłomki polskaj rakiety, vypuščanaj sa źniščalnika F-16.

Toj samy paškodžany dom u Vyrykach. Skrynšot videa TVP Info

Pavodle krynic haziety ŭ strukturach dziaržaŭnaj biaśpieki, padčas masavych atak rasijskich bieśpiłotnikaŭ pa Ukrainie 10 vieraśnia niekalki dronaŭ uvarvalisia ŭ pavietranuju prastoru Polščy. Polskija samaloty ŭźlacieli dla ich pierachopu. Adna z rakiet F-16 sprabavała źbić dron, ale adbyłasia techničnaja niaspraŭnaść u sistemie naviadzieńnia, i rakieta nie paraziła cel.

Krynica adznačyła, što rakieta nie vybuchnuła dziakujučy achoŭnym miechanizmam bojeprypasu. Jana pry hetym padkreśliła: «Byŭ rasijski avijaŭdar, a polski bok abaraniaŭsia».

Aficyjna prakuratura nazvała abjekt «nieidentyfikavanym», a Ministerstva abarony ad kamientaroŭ ustrymlivajecca.

U noč na 10 vieraśnia Polšča zafiksavała masavuju ataku polskaj terytoryi dronami: spačatku paviedamlałasia pra 19 aparataŭ, paźniej u NATA havaryli ŭžo pra 25 bieśpiłotnikaŭ typu Shahed. Ich abłomki byli znojdzienyja ŭ roznych častkach krainy — pieravažna kala miažy ź Biełaruśsiu, ale taksama pad Łodździu i navat kala Hdańska. Častka dronaŭ trapiła na terytoryju vajskovych čaściej.

Kamientary da artykuła