AAN apraŭdvajecca — Bieły dom zapadozryŭ arhanizacyju ŭ sabatažy praz prablemy padčas vystupu Trampa

U Ńju-Jorku padčas vystupu Donalda Trampa na Hienieralnaj asamblei AAN adbyłasia sieryja niečakanych incydentaŭ. Spačatku raptoŭna spyniŭsia eskałatar, na jaki tolki što stupili Tramp z žonkaj Miełanijaj, a zatym admoviŭ telesuflor, ź jakoha prezident pavinien byŭ čytać pramovu.

Donald Tramp idzie s trybuny AAN paśla svajho vystupu. Fota: Spencer Platt / Getty Images

Tramp nie strymaŭsia ad kamientaru prosta pierad załaj, dzie prysutničali bolš za 140 suśvietnych lidaraŭ: «Voś dźvie rečy, jakija ja atrymaŭ ad Arhanizacyi Abjadnanych Nacyj: drenny eskałatar i drenny telesuflor».

Na Fox News adrazu ž zahavaryli pra sabataž, a pres-sakratarka Biełaha doma Kerałajn Levit zajaviła, što «heta vidavočna vyhladaje mienavita tak», piša BILD.

U AAN ža viersiju Vašynhtona adchilili. Pradstaŭnik hiensieka Antoniu Huteryša patłumačyŭ, što

Telesuflor naohuł absłuhoŭvaŭsia Biełym domam. Što tyčycca eskałatara, to, pavodle danych AAN, avaryjny miechanizm spracavaŭ paśla taho, jak apieratar z amierykanskaj delehacyi vypadkova začapiŭ stop-sistemu.

Tym nie mienš Bieły dom nastojvaje, što supadzieńni zanadta padazronyja. Levit nahadała pra paviedamleńnie brytanskaj haziety Sunday Times, dzie śćviardžałasia, što supracoŭniki AAN u žartaŭlivym klučy abmiarkoŭvali mahčymaść «vyklučyć lifty i eskałatary, kab pakazać Trampu, što hrošy skončylisia».

Kamientary da artykuła