AANaŭskaja pramova Trampa: pra eskałatar, jaki spyniŭsia prosta na chadu, suprać mihracyi i zialonaj enierhietyki

Telesuflor nie pracuje, tamu ja budu pramaŭlać svaju pramovu ad serca. Mahu skazać tolki, što ŭ taho, chto kiruje hetym telesufloram, buduć vialikija niepryjemnaści. 

Hod tamu naša kraina była ŭ hłybokaj biadzie. Ale siońnia, usiaho praz vosiem miesiacaŭ pracy majoj administracyi, my — samaja paśpiachovaja kraina va ŭsim śviecie, i nivodnaja inšaja kraina navat blizka nie staić. (…)

Pad maim kiraŭnictvam ceny na enierhanośbity źnizilisia, ceny na bienzin źnizilisia, ceny na pradukty źnizilisia, staŭki pa ipatecy źnizilisia, a inflacyja pieramožana. Adzinaje, što raście, — heta fondavy rynak, jaki tolki što dasiahnuŭ rekordnaha maksimumu. (…) I što važna, zarobki pracoŭnych rastuć samymi chutkimi tempami za bolš čym 60 hadoŭ.

Ja skončyŭ siem vojnaŭ. I va ŭsich vypadkach jany bušavali, zabivajučy nieźličonyja tysiačy ludziej.

Siudy ŭvachodziać Kambodža i Tajłand, Kosava i Sierbija, Konha i Ruanda — žorstkaja, hvałtoŭnaja vajna, Pakistan i Indyja, Izrail i Iran, Jehipiet i Efiopija, a taksama Armienija i Azierbajdžan. (…)

Škada, što mnie pryjšłosia rabić hetyja rečy zamiest Arhanizacyi Abjadnanych Nacyj. I, na žal, va ŭsich vypadkach Arhanizacyja Abjadnanych Nacyj navat nie sprabavała dapamahčy ni ŭ adnym ź ich.

Ja skončyŭ siem vojnaŭ, mieŭ spravu ź lidarami kožnaj z hetych krain, a z Arhanizacyi Abjadnanych Nacyj mnie navat nie pazvanili z prapanovaj dapamahčy ŭ zaviaršeńni ździełki.

Usio, što ja atrymaŭ ad AAN — heta eskałatar, jaki spyniŭsia prosta na chadu — kali b pieršaja łedzi (Miełanija Tramp) nie była ŭ vydatnaj formie, jana b upała. Ale jana ŭ vydatnaj formie. My aboje ŭ dobraj formie. My aboje ŭ dobraj formie. My aboje vystajali. A potym telesuflor nie pracuje. Voś dva padarunki ad Arhanizacyi Abjadnanych Nacyj: niaspraŭny eskałatar i niaspraŭny telesuflor. Vielmi dziakuju. I, darečy, jon iznoŭ zapracavaŭ. Tolki što ŭklučyŭsia. Dziakuju.

Pavialičyć

Jaki sens u Arhanizacyi Abjadnanych Nacyj? AAN maje taki vielizarny patencyjał. Ja zaŭsiody heta kazaŭ. U jaje taki vielizarny, vielizarny patencyjał. Ale jana navat blizka nie adpaviadaje hetamu patencyjału.

Zbolšaha, prynamsi, na hety momant, zdajecca, usio, što jany robiać, — heta pišuć list u vielmi žorstkich vyrazach, a potym nikoli nie prymajuć nijakich dalejšych dziejańniaŭ. Heta pustyja słovy, a pustyja słovy nie vyrašajuć prablemu vajny.

Usie kažuć, što ja pavinien atrymać Nobieleŭskuju premiju miru za kožnaje z hetych dasiahnieńniaŭ.

Ale dla mianie sapraŭdnaj uznaharodaj buduć syny i dočki, jakija vyrastuć sa svaimi maci i baćkami, tamu što miljony ludziej bolš nie hinuć u biaskoncych i biessensoŭnych vojnach. Mianie chvaluje nie zavajova ŭznaharod, a vyratavańnie žyćciaŭ. My vyratavali miljony i miljony žyćciaŭ, spyniŭšy siem vojnaŭ. I ŭ nas jość inšyja, nad jakimi my pracujem, i vy heta viedajecie.

Šmat hadoŭ tamu vielmi paśpiachovy zabudoŭščyk ź Ńju-Jorka, viadomy jak Donald Tramp, udzielničaŭ u tendary na rekanstrukcyju i pierabudovu mienavita hetaha kompleksu AAN. Ja tak dobra heta pamiataju.

Ja tady skazaŭ, što zrablu heta za 500 miljonaŭ dołaraŭ, pierabudavaŭšy ŭsio. Ja kazaŭ: «Ja zrablu vam marmurovyja padłohi (…). Ja dam vam usio samaje lepšaje. U vas buduć ścieny z čyrvonaha dreva. (…). Ale jany vyrašyli pajści inšym šlacham, jaki na toj momant byŭ značna daražejšym i ŭ vyniku daŭ značna horšy pradukt. (…) U ich było vielizarnaje pieravyšeńnie kaštarysu, jany vydatkavali ad 2 da 4 miljardaŭ dołaraŭ na budynak i navat nie atrymali marmurovych padłoh, jakija ja im abiacaŭ. (…)

Ščyra kažučy, kali ja hladžu na budynak i ŭspaminaju, jak eskałatar spayniŭsia, ja liču, što jany dahetul nie skončyli pracu. Jany dahetul nie skončyli. (…) Na žal, mnohija rečy ŭ Arhanizacyi Abjadnanych Nacyj adbyvajucca mienavita tak, ale ŭ jašče značna bolšym maštabie. Značna, značna bolšym.

Pavialičyć

Ja taksama niastomna pracavaŭ, kab spynić zabojstvy va Ukrainie. Ja mierkavaŭ, što ź siami vojnaŭ, jakija ja spyniŭ, hetaja akažacca samaj prostaj, bo ŭ mianie zaŭsiody byli dobryja adnosiny z prezidentam Pucinym. Ja sapraŭdy dumaŭ, što heta budzie samaja lohkaja z usich. Ale viedajecie, na vajnie nikoli nie viedaješ, što adbudziecca. Zaŭsiody šmat siurpryzaŭ, jak dobrych, tak i drennych. Usie dumali, što Rasija pieramoža ŭ hetaj vajnie za try dni, ale ŭsio pajšło nie tak. (…)

Kitaj i Indyja źjaŭlajucca asnoŭnymi fundatarami hetaj vajny, praciahvajučy zakuplać rasijskuju naftu. Ale niedaravalna, navat krainy NATA nie admovilisia ad značnaj častki rasijskich enierhanośbitaŭ i rasijskich enierhapraduktaŭ, pra što, jak vy viedajecie, ja daviedaŭsia dva tydni tamu, i ja nie byŭ zadavoleny. Tolki ŭjavicie — jany finansujuć vajnu suprać samich siabie.

Chto, čort biary, kaliści čuŭ pra takoje? U vypadku, kali Rasija nie budzie hatovaja zaklučyć ździełku ab spynieńni vajny, Złučanyja Štaty całkam hatovyja ŭvieści vielmi žorstki pakiet mahutnych taryfaŭ, jakija, ja liču, vielmi chutka spyniać krovapralićcie. Ale kab hetyja taryfy byli efiektyŭnymi, jeŭrapiejskija krainy, usie vy, chto sabraŭsia tut zaraz, pavinny byli b dałučycca da nas i pryniać dakładna takija ž miery. Ja maju na ŭvazie, vy značna bližej da hetaha. Pamiž nami akijan. A vy prosta tam. I Jeŭropa pavinna aktyvizavacca.

Pavialičyć

AAN nie tolki nie vyrašaje prablemy, jakija pavinna, ale zanadta časta jana stvaraje dla nas novyja prablemy, jakija davodzicca vyrašać. Najlepšy prykład — heta palityčnaje pytańnie numar adzin našaha času: kryzis niekantralavanaj mihracyi. (…)

Arhanizacyja Abjadnanych Nacyj finansuje napad na zachodnija krainy i ich miežy. U 2024 hodzie AAN zakłała ŭ biudžet 372 miljony dołaraŭ hrašovaj dapamohi dla padtrymki prykładna 624 000 mihrantaŭ, jakija nakiroŭvajucca ŭ Złučanyja Štaty. Tolki ŭjavicie.

AAN padtrymlivaje ludziej, jakija nielehalna prybyvajuć u Złučanyja Štaty, a potym my pavinny ich vysyłać. AAN taksama zabiaśpiečvała ježaj, žyllom, transpartam i płaciežnymi kartkami nielehalnych mihrantaŭ. Vy možacie ŭ heta pavieryć? Kab jany mahli praniknuć praz našu paŭdniovuju miažu.

Jeŭropa ŭ surjoznaj biadzie. Jany sutyknulisia z uvarvańniem niečuvanych połčyščaŭ nielehalnych mihrantaŭ. Nielehalnyja mihranty ljucca ŭ Jeŭropu. I nichto ničoha nie robić, kab heta źmianić, kab ich vysłać. Heta nie moža praciahvacca. I pakolki jany vybirajuć być palitkarektnymi, jany nie robiać absalutna ničoha.

I ja pavinien skazać, ja hladžu na Łondan, dzie ŭ vas žudasny mer — žudasny, žudasny mer — i horad tak źmianiŭsia. Tak źmianiŭsia. Ciapier jany chočuć uvieści zakony šaryjatu, ale ž vy ŭ inšaj krainie.

Tak nielha rabić. I imihracyja, i ich samahubnyja enierhietyčnyja idei stanuć śmierciu dla Zachodniaj Jeŭropy, kali nieadkładna niešta nie zrabić. Heta nie moža praciahvacca.

Pavodle danych Rady Jeŭropy, u 2024 hodzie amal 50 pracentaŭ źniavolenych u niamieckich turmach byli zamiežnymi hramadzianami abo mihrantami. U Aŭstryi hetaja ličba skłała 53 pracenty — stolki ludziej u turmach byli vychadcami ź inšych krain. U Hrecyi — 54 pracenty. A ŭ Šviejcaryi, pryhožaj Šviejcaryi, 72 pracenty ludziej u turmach — nie šviejcarcy.

Pavialičyć

Kali vašy turmy zapoŭnienyja tak zvanymi šukalnikami prytułku, jakija adpłacili za dabryniu — a jany adpłacili dabryniu! — adpłacili za dabryniu złačynstvami, nadyšoŭ čas spynić niaŭdały ekśpierymient adkrytych miežaŭ. (…) Vašy krainy kociacca ŭ piekła.

Papiaredniaja administracyja taksama zahubiła amal 300 000 dziaciej. Tolki ŭjavicie. Jany zhubili bolš za 300 000 dziaciej — maleńkich dziaciej, — jakich niezakonna pieravieźli ŭ Złučanyja Štaty padčas kiravańnia Bajdena, mnohija ź jakich byli zhvałtavanyja, ekspłuatavanyja, padvierhlisia hvałtu i pradadzienyja. (…) I my znajšli šmat hetych dziaciej, i my adpraŭlajem ich nazad — i my adpraŭlali ich nazad da baćkoŭ. (…) Na siońniašni dzień my viarnuli amal 30 000 ź ich.

Lubaja sistema, jakaja pryvodzić da masavaha handlu dziećmi, pa svajoj sutnaści źjaŭlajecca złom. Adnak mienavita heta i zrabiła hłabalisckaja mihracyjnaja prahrama, i ŭ hetym usia jaje sutnaść. U Amierycy hetyja dni, jak vy viedajecie, skončylisia.

My niadaŭna pačali vykarystoŭvać najvyšejšuju moc uzbrojenych sił Złučanych Štataŭ dla źniščeńnia vieniesuelskich terarystaŭ i sietak narkahandlu na čale ź Nikałasam Madura. Kožnaha terarysta-bandyta, jaki kantrabandaj uvozić atrutnyja narkotyki ŭ Złučanyja Štaty Amieryki, papiaredžvaju: my satrom vas z tvaru ziamli. Voś što my zrobim. U nas niama vybaru.

Enierhietyka — jašče adna śfiera, dzie Złučanyja Štaty ciapier kvitniejuć, jak nikoli raniej. My pazbaŭlajemsia ad tak zvanych adnaŭlalnych krynic enierhii. (…)

Usio zialonaje — heta poŭnaje bankructva. (…) Heta nie palitkarektna. Mianie buduć žorstka krytykavać za hetyja słovy, ale ja tut, kab kazać praŭdu. Mnie ŭsio roŭna. Mnie niavažna. Ja ŭ Ńju-Jorku. Ja adčuvaju siabie značna biaśpiečniejšym. I, darečy, kali kazać pra złačynnaść, Vašynhton, akruha Kałumbija, byŭ złačynnaj stalicaj Amieryki. (…)

My vyvieźli 1700 prafiesijnych złačyncaŭ, viarnuli ich tudy, adkul jany prybyli, u krainy, adkul jany prybyli, abo pasadzili ŭ turmy. Vašynhton, akruha Kałumbija, znoŭ staŭ całkam biaśpiečnym horadam. I ja zaprašaju vas pryjechać. Nasamreč, my razam paviačerajem u miascovym restaranie, i my zmožam prajścisia pieššu. Nam nie treba jechać na braniravanym aŭtamabili. My prosta projdziemsia tudy ad Biełaha doma.

Kali vy nie admoviciesia ad hetaj zialonaj afiery, vaša kraina pacierpić krach. A ja, paviercie, vydatna ŭmieju pradkazvać. Padčas kampanii ŭ nas navat była samaja papularnaja kiepka z nadpisam: «Tramp mieŭ racyju va ŭsim». I heta nie vychvalańnie, a čystaja praŭda. Ja mieŭ racyju va ŭsim. Tamu paŭtarusia: kali vy nie admoviciesia ad afiery z zialonaj enierhietykaj i nie spynicie ludziej, ź jakimi ŭ vas niama ničoha supolnaha, vašu krainu čakaje rujnavańnie.

Viedajecie, u nas jość mocnyja miežy, jość akreślenyja kontury krainy. Ale hety kantrol nie raspaŭsiudžvajecca na nieba. Atmaśfiera ž — heta supolnaja prastora, jana nie maje miežaŭ. (…) U nas vielmi čystaje pavietra. U nas samaje čystaje pavietra za mnohija, mnohija hady.

Pavialičyć

Ale prablema ŭ tym, što inšyja krainy, jak Kitaj, dzie pavietra, skažam tak, nie samaje čystaje, jaho raznosić vietram. I što b vy ni rabili tut, unizie, pavietra tut, naviersie, maje tendencyju stanavicca vielmi brudnym, tamu što jano prychodzić ź inšych krain, dzie pavietra nie takoje čystaje. I ekołahi admaŭlajucca heta pryznavać.

Toje samaje sa śmiećciem. U Azii ludzi vykidvajuć bolšuju častku svajho śmiećcia prosta ŭ akijan. I prykładna za adzin-dva tydni jano prapłyvaje mima Łos-Andželesa — vy heta bačyli — vielizarnyja hory śmiećcia, jakim nie dasi rady, prapłyvajuć mima Łos-Andželesa, mima San-Francyska. A potym kaho-niebudź pakarajuć za toje, što jon kinuŭ cyharetu na plažy. Usio heta varjactva.

Asnoŭny efiekt hetaj žorstkaj zialonaj enierhietyčnaj palityki byŭ nie ŭ dapamozie navakolnamu asiarodździu, a ŭ pieraraźmierkavańni vytvorčaści i pramysłovaj dziejnaści z raźvitych krain, jakija prytrymlivajucca hetych varjackich pravił, u krainy-zabrudžvalniki, jakija praviły parušajuć i zarablajuć na hetym vializnyja hrošy.

Jany zarablajuć vializnyja hrošy. Rachunki za elektraenierhiju ŭ Jeŭropie ciapier u čatyry-piać razoŭ vyšejšyja, čym u Kitai, i ŭ dva-try razy vyšejšyja, čym u Złučanych Štatach. (…)

U vyniku kandycyjanier u niekatorych z hetych krain — heta vialikaja redkaść, takija vysokija tam ceny na elektryčnaść. Takim čynam, u toj čas jak u ZŠA štohod adbyvajecca kala 1300 śmierciaŭ, źviazanych sa śpiakotaj — heta šmat, — Jeŭropa štohod hublaje bolš za 175 000 čałaviek ad śpiakoty, tamu što ceny nastolki vysokija, što vy nie možacie ŭklučyć kandycyjanier.

Pavialičyć

Ja stymulavaŭ maštabnuju vytvorčaść enierhii i padpisaŭ histaryčnyja ŭkazy ab pošuku nafty. Ale nam nie treba šmat šukać, tamu što ŭ nas bolš za ŭsio nafty siarod usich krain śvietu — nafty i hazu. A kali dadać vuhal, to ŭ nas jaho bolš, čym u luboj inšaj krainy śvietu. (…) Ale my hatovyja zabiaśpiečyć lubuju krainu dastupnymi enierharesursami, kali jany vam patrebnyja, a jany patrebnyja bolšaści z vas. (…)

Davajcie razam abaraniać svabodu słova i svabodu vykazvańnia. Davajcie achoŭvać relihijnuju svabodu, u tym liku dla samaj pieraśledavanaj relihii na płaniecie siońnia. Jana nazyvajecca chryścijanstva.

Vam patrebnyja mocnyja miežy i tradycyjnyja krynicy enierhii, kali vy chočacie znoŭ stać vialikimi.

Jak zaŭvažaje vydańnie The New York Times, pramova Trampa praciahvałasia 57 chvilin. Jon vykarystaŭ u try raza bolš času, čym było adviedziena pa rehłamientu. Zvyčajna, kali suśvietnyja lidary ​​pieraŭzychodziać adźviedzieny čas, na trybunie zaharajecca čyrvonaja lampačka. U vypadku vystupleńnia Trampa lampačka tak i nie zaharełasia.

• 5
• 0
• 1
• 1
• 0
• 0
• 1
• 0