Mirny płan Trampa praduhledžvaje źniaćcie z Rasii sankcyj i jaje poŭnaje viartańnie ŭ suśvietnuju ekanomiku

Jak paviedamlajuć krynicy Bloomberg i «RBK-Ukraina», u novym mirnym płanie ZŠA pa Ukrainie prezident Donald Tramp nibyta prapanuje, kab Ukraina akramia skaračeńnia svaich uzbrojenych sił i terytaryjalnych ustupak zhadziłasia taksama na źniaćcie z Rasii sankcyj. Płan praduhledžvaje spynieńnie rasśledavańnia vajennych złačynstvaŭ rasijskaj armii i pieradaču Danbasa pad kantrol Maskvy, piša The Moscow Times.

Donald Tramp i jahony śpiecpradstaŭnik Styŭ Uitkaf. Fota: The White House

Adna z krynic «RBK-Ukraina» adznačaje, što prajekt z 28 punktaŭ uklučaje amnistyju pa ŭsich vajennych złačynstvach i faktyčnaje poŭnaje viartańnie Rasii ŭ suśvietnuju ekanomiku.

20 listapada prezident Ukrainy Uładzimir Zialenski sustrakaŭsia ŭ Kijevie z amierykanskaj delehacyjaj pad kiraŭnictvam ministra armii ZŠA Dena Dryskała, jakoha Tramp nakiravaŭ dla prasoŭvańnia svajho płana.

Dypłamaty Jeŭrasajuza vykazali skieptycyzm adnosna luboj mirnaj ździełki, jakaja budzie pryniata biez uliku pazicyi Kijeva i jeŭrapiejskich sajuźnikaŭ, adznačajučy, što Pucin zhadžajecca na prapanovy tolki pad ciskam.

Krynicy taksama paviedamlajuć, što płan składaŭsia pry ŭdziele pasłańnikaŭ Trampa i Rasii, i jaho meta — pieraškodzić uviadzieńniu sankcyj suprać «Łukojła» i «Rasnafty», jakija pavinny nabyć moc 21 listapada.

Siarod inšych umoŭ płana — zabarona raźmiaščeńnia zamiežnych miratvorcaŭ va Ukrainie, skaračeńnie i abmiežavańnie ŭzbrajeńniaŭ USU, faktyčnaje pryznańnie Danbasa za Rasijaj z vypłataj «arendnaj płaty», a taksama «abiacańnie» Kramla nie napadać na Ukrainu i krainy Jeŭropy.

Kamientary da artykuła