«Čakajem, što z nami buduć kansultavacca». Zachodnija palityki — pra tajny mirny płan ZŠA
Jeŭrapiejskija palityki nie chavajuć ździŭleńnia, što da vypracoŭki mirnaha płana ŭ Jeŭropie ich nie zaprasili.
Luby płan pa spynieńni vajny va Ukrainie zapatrabuje padtrymki ŭkraincaŭ i jeŭrapiejcaŭ, zajaviła ŭ čaćvier kiraŭnik źniešniepalityčnaha viedamstva Jeŭrasajuza Kaja Kałas, piša BBC.
«My, jeŭrapiejcy, zaŭsiody padtrymlivali doŭhaterminovy i spraviadlivy mir, i my vitajem lubyja namahańni pa jaho dasiahnieńni. Viadoma, dla taho, kab luby płan spracavaŭ, patrebnyja ŭkraincy i jeŭrapiejcy», — zajaviła Kałas.
«My vitajem mirnyja namahańni, ale… Na konie, viadoma ž, biaśpieka Jeŭropy. Tamu my čakajem, što z nami buduć kansultavacca», — skazaŭ žurnalistam u Brusieli ministr zamiežnych spraŭ Polščy Radasłaŭ Sikorski. «Abmiežavańni na samaabaronu nakładajucca nie na achviaru, a na ahresara», — dadaŭ jon.
Ministr zamiežnych spraŭ Ispanii Chase Manuel Albares zajaviŭ u Brusieli, što luby mirny płan dla Ukrainy niemahčymy biez udziełu Kijeva i ES. Krynica Reuters napiaredadni paviedamlała, što Ukraina nie prymała ŭdziełu ŭ padrychtoŭcy płana spynieńnia vajny.
Napiaredadni ŚMI paviedamili, što ŭ administracyi Donalda Trampa tajemna padrychtavali detalny płan spynieńnia vajny va Ukrainie, jaki praduhledžvaje nie tolki terytaryjalnyja sastupki, ale i skaračeńnie ŭkrainskaj armii ŭdvaja. U płanie, pavodle danych žurnalistaŭ, jość i inšyja nieprymalnyja dla Ukrainy patrabavańni.
Pavodle danych NBC News, prajekt raspracoŭvali ŭ Biełym domie, kansultujučysia z rasijskim śpiecpradstaŭnikom Kiryłam Dźmitryjevym i ŭkrainskimi aficyjnymi asobami.
Ukrainski prezident Uładzimir Zialenski nieadnarazova adchilaŭ mahčymaść pieradačy terytoryj krainie, jakaja napała na Ukrainu. Ciapier, jak padkreślivajuć ŚMI, pazicyi Zialenskaha asłableny karupcyjnym skandałam.
Ciapier čytajuć
U rasijskaj armii biełaruskaha najomnika paviesili na drevie ŭniz hałavoj i bili pałkaj pa hienitalijach14
Kamientary