Chto taja žančyna, jakaja pierakładaje Łukašenku z arabskaj movy ŭ jahonym turne?

Alaksandr Łukašenka ździajśniaje «turne» pa krainach Poŭdnia: Kyrhyzstan, Mjanma, Aman, Ałžyr i znoŭ Aman. Jaho supravadžajuć dva pierakładčyki: na anhlijskuju pierakładaje Siarhiej Zielankievič, a na arabskuju — nieviadomaja žančyna. «Lusterka» daviedałasia, chto jana takaja.

Jaŭhienija Łysienka supravadžaje Alaksandra Łukašenku padčas pieramovaŭ z prezidentam Ałžyra. Ałžyr, 3 śniežnia 2025 hoda. Fota: pres-słužba palityka

Pierakładčycu zavuć Jaŭhienija Łysienka, daviedałasia «Lusterka» pry dapamozie arhanizacyi Belpol. Jana ŭradženka Śvietłahorska, joj 27 hadoŭ.

Jaŭhienija skončyła fakultet mižnarodnych adnosin BDU. U 2020 hodzie ŭ elektronnaj biblijatecy hetaj VNU była apublikavanaja anatacyja da jaje dypłomnaj pracy, a ŭ 2021‑m — da mahistarskaj. Abiedźvie pracy byli pryśviečanyja moŭnym ekśpierymientam siaredniaviečnych musulmanskich sufijaŭ-mistykaŭ.

U Łysienki niama profilaŭ u sacyjalnych sietkach.

Pačynajučy sa žniŭnia 2024 hoda žančynu časta možna bačyć u fotaspravazdačach z sustreč u akaŭncie ambasady Biełarusi ŭ Jehipcie, jakaja taksama adkazvaje za dypłamatyčnyja adnosiny z Sudanam, Ałžyram i Amanam.

Jaŭhienija Łysienka supravadžaje Alaksandra Łukašenku padčas pieramovaŭ z sułtanam Amana. Maskat, Aman, 15 śniežnia 2024 hoda. Fota: pres-słužba palityka

Jaŭhienija Łysienka pierakładaje padčas sustrečy Alaksandra Łukašenki z premjer-ministram Ałžyrskaj Narodnaj Demakratyčnaj Respubliki. Ałžyr 2 śniežnia 2025 hoda. Fota: pres-słužba palityka

Upieršyniu dla Łukašenki Jaŭhienija pierakładała ŭ śniežni 2024 hoda padčas jaho aficyjnaha vizitu ŭ Aman. Taksama jana pracavała padčas pryjezdu delehacyi Livii ŭ Biełaruś u kastryčniku 2025 hoda.

Darečy, cikava, što ŭ ciapierašnim «turne» Łukašenki Jaŭhienija pracuje nie na ŭsich sustrečach palityka.

Na pieramovy z sułtanam Amana i kiraŭnikom Amanskaha inviestycyjnaha ahienctva, jak vyhladaje, dapuścili asabliva vuzkaje koła prysutnych. Pierakładčykam tam pracavaŭ dypłamat Siarhiej Zielankievič, jaki ŭ minułym pracavaŭ «kiraŭnikom ofisa» prezidenta NAK Viktara Łukašenki. Zielankievič pierakładaŭ na anhlijskuju movu. 

Kamientary da artykuła