Siamiejnyja intaresy pierastali adździalacca ad dziaržaŭnych navat farmalna. Što chavajecca za paŭdniovym vajažam Łukašenki

Śpiecyfika zamiežnych vizitaŭ Łukašenki

Zamiežnyja pajezdki Alaksandra Łukašenki adrazu ŭ niekalki krain adbyvajucca nie ŭpieršyniu. Naprykład, u 2023 hodzie jon zładziŭ svoj tradycyjny vizit u Abjadnanyja Arabskija Emiraty (AAE), a potym palacieŭ u Afryku. I kožnaja pajezdka mieła svaju śpiecyfiku.

Tak było i zaraz. Naprykład, padčas vizitu ŭ Mjanmu Łukašenku arhanizavali vielmi ŭračysty, pampiezny pryjom. Heta vielmi izalavanaja kraina, tam kiruje vajskovaja chunta, idzie hramadzianskaja vajna, tudy nie jeździać zamiežnyja lidary. A tut pryjechaŭ ceły kiraŭnik dziaržavy. Tamtejšyja ŭładary tak uzradavalisia, što byli hatovyja ŭsialak padładžvacca pad hościa. Toj navat ździviŭsia: «Ščyra kažučy, my pakul jašče nie zasłuhoŭvajem takoj uvahi», — skazaŭ Łukašenka.

Vizity Łukašenki ŭ Mjanmu i Ałžyr byli abjaŭlenyja aficyjnymi. A voś pajezdka ŭ Aman mieła status pracoŭnaha vizitu, jaki — ad pačatku da kanca — nasiŭ vielmi dziŭny charaktar.

Pačniem z taho, što sułtan Amana Chajtam bin Taryk al-Said ździejśniŭ vizit u Biełaruś 6—7 kastryčnika 2025 hoda. Heta značyć, lidary viali dvuchbakovyja pieramovy mienš za dva miesiacy tamu. Jakaja nieabchodnaść znoŭ sustrakacca praz taki karotki čas, jaki minuŭ z momantu ich papiaredniaj sustrečy, niezrazumieła.

Padčas taho vizitu sułtana ŭ Minsk Łukašenka prymaŭ jaho vielmi ciopła. Akramia aficyjnych pieramoŭ u rezidencyi, jon zaprasiŭ kiraŭnika Amana da siabie ŭ hości dadomu. Pres-słužba biełaruskaha ŭładara paviedamiła, što paśla zaviaršeńnia pieramoŭ Alaksandr Łukašenka asabista pravodziŭ Chajtama bin Taryka al-Saida ŭ aeraport. Status vizitu, dypłamatyčny pratakoł nie praduhledžvaŭ padobnaha žestu. Takoje dziejańnie aznačaje demanstracyju asablivaj pavahi da hościa.

Dziŭny vizit u Aman

I voś Łukašenka prybyŭ u Aman 28 listapada. U aeraporcie jaho sustrakaŭ prezident Amanskaha inviestycyjnaha ahienctva Abdułsałam Al Muršydzi. Heta nie prosta nie prezidencki ŭzrovień. Kiraŭnik inviestycyjnaha ahienctva — heta paŭaficyjnaja asoba.

Što adbyvałasia ŭ nastupnyja dva dni, nieviadoma. Bolš za toje, nijakaj infarmacyi ni pra aficyjnyja pryjomy, ni pra jahonuju prysutnaść u krainie ŭvohule nie było — pra heta nie paviedamlała ni MZS Amana, ni miascovyja ŚMI. I tolki na čaćviorty dzień vizitu Łukašenki jaho pryniaŭ sułtan. Vonkava ŭsio heta vyhladaje dla biełaruskaha ŭładara vielmi prynižalna. Nibyta adzin lidar vymolvaŭ sustreču, a druhi praź niejki čas narešcie akazaŭ litaść.

Dalej padziei raźvivalisia nie mienš cikava. Sustreča na vyšejšym uzroŭni adbyvałasia nie ŭ aficyjnaj rezidencyi sułtana, a ŭ jaho doma. Na kadrach, jakija zafiksavali padjezd Łukašenki, nie było bačna biełaruskich dziaržaŭnych ściažkoŭ.

Dy i skład biełaruskaj delehacyi byŭ vielmi niezvyčajny. Nie było biełaruskich čynoŭnikaŭ, naprykład, ministra zamiežnych spraŭ — na pieramovach z sułtanam prysutničali sam Łukašenka i jahonyja syny Viktar i Mikałaj.

Nahadaju, aficyjnaja pasada Viktara — prezident Nacyjanalnaha alimpijskaha kamiteta (farmalna heta hramadskaja arhanizacyja). Choć pres-słužby MZS Amana nazvali jaho «śpiecyjalny pradstaŭnik prezidenta». A Mikałaj pakul prosta student.

Pres-słužba Łukašenki nie raskryła padrabiaznaściaŭ jahonych pieramoŭ z sułtanam Amana, spasłaŭšysia na ich zakryty charaktar. Nie dali navat niejkich dziažurnych słoŭ napačatku razmovy, jak heta zvyčajna robicca padčas aficyjnych sustreč.

Ale precedent padobnaha farmatu pieramoŭ byŭ. U 2023 hodzie ŭ pieramovach z prezidentam AAE ź biełaruskaha boku ŭdzielničali Alaksandr Łukašenka, Viktar Łukašenka i Mikałaj Łukašenka. «Damašni, siamiejny farmat» — tak vyznačyŭ chod tahačasnych pieramoŭ emiracki bok.

Dzie tut dziaržaŭnyja intaresy?

I tady, i ciapier naturalna paŭstaje pytańnie: što heta było? Bo dziaržaŭnyja intaresy Biełarusi tut nie mocna prahladajucca. Handlovy abarot pamiž krainami ŭ minułym hodzie skłaŭ kala $5 miljonaŭ — mizer. Biełaruś nie maje ŭ Amanie svajoj ambasady. A tym nie mienš kantakty pamiž Łukašenkam i kiraŭnictvam hetaj krainy stanoviacca ŭsio bolš intensiŭnymi. Čym heta možna patłumačyć?

Taki farmat sustrečy i ŭvohule dvuchbakovych adnosin nahadvaje nie stolki pieramovy kiraŭnictva Biełarusi i Amana, kolki pieramovy siamji Alaksandra Łukašenki i siamji amanskaha sułtana. Siamiejnyja intaresy pierastali adździalacca ad dziaržaŭnych navat farmalna.

Kiraŭnik Narodnaha antykryzisnaha ŭpraŭleńnia Pavieł Łatuška prakamientavaŭ vizit Łukašenki ŭ Aman tak:

«Jany abmiarkoŭvali, jak zachavać hrošy ŭ Amanie — nielha ž trymać usio ŭ adnoj havani — u AAE. Treba raźmiaścić u Amanie i padumać, jak ich reinviestavać u ekanomiku Biełarusi, kab prykrycca amanskimi kampanijami. Potym, kali adbuducca źmieny ŭ krainie, buduć razhladać heta jak zamiežnyja inviestycyi».

Cikava, što hetymi ž dniami siaredni syn Łukašenki Dźmitryj zładziŭ vizit u Indanieziju. Nibyta abmiarkoŭvali supracoŭnictva z hetaj krainaj u ahrarnaj śfiery. Ale Dźmitryj Łukašenka zajmaje pasadu kiraŭnika Prezidenckaha spartyŭnaha kłuba. Pryčym tut ahrarnaja śfiera? Možna mierkavać, tut jość niejki kamiercyjny intares.

Pavieličeńnie cikavaści ludziej z proźviščami Łukašenka da kamiercyjnych składnikaŭ — moža, samy važny simptom nabližeńnia tranzitu ŭłady.

I voś apošniaja infarmacyja: Łukašenka viartajecca ŭ Aman. U subotu adbudziecca jahonaja novaja sustreča z sułtanam. Jak paviedamlaje pres-słužba Łukašenki, «u najbližejšyja dni zapłanavany šerah niepubličnych sustreč dla abmierkavańnia ŭ praktyčnaj płoskaści najvažniejšych prajektaŭ z kompleksu dvuchbakovaha supracoŭnictva Biełarusi i Amana». Źviartaje na siabie ŭvahu, što znoŭ sustrečy niepubličnyja. Kali palityki niešta chavajuć, to heta zaŭsiody vyklikaje padazreńnie. I tolki paćviardžaje vysnovy, zroblenyja vyšej.

Vizit u Ałžyr

Što tyčycca pajezdki ŭ Ałžyr, to varta adznačyć, što heta pieršy vizit Łukašenki ŭ hetuju krainu. Ałžyrski prezident taksama ni razu nie naviedvaŭ Biełaruś. Ale kiraŭniki dvojčy sustrakalisia ŭ kułuarach roznych mižnarodnych samitaŭ.

Ałžyr — paraŭnalna niabiednaja kraina. Asnova jaje ekanomiki — heta haz i nafta. Jany dajuć 30% VUP, 60% prybytkovaj častki dziaržbiudžetu, 95% ekspartnaj vyručki. Pa zapasach hazu Ałžyr zajmaje 8‑ie miesca ŭ śviecie i 4‑ie miesca ŭ śviecie pa eksparcie hazu.

Da 2020 hoda hadavy abjom handlu pamiž krainami chistaŭsia pamiž $2 miljonami i $13 miljonami. Paśla pandemii kavidu handal i zusim syšoŭ na ništo. Ale ŭ 2024 hodzie handlovy abarot skłaŭ kala $50 miljonaŭ, pavialičyŭšysia ŭ paraŭnańni z 2023 hodam u 16 razoŭ. Pryčym praktyčna ŭvieś abjom handlu — heta biełaruski ekspart. Jak patłumačyŭ ministr zamiežnych spraŭ Maksim Ryžankoŭ, taki ekspartny vybuch tłumačycca rezkim rostam pastavak biełaruskich praduktaŭ charčavańnia.

Pa vynikach vizitu padpisana šmat roznych dakumientaŭ. Ale dośvied minułych pajezdak Łukašenki ŭ roznyja krainy śviedčyć pra toje, što jany ŭ minimalnaj stupieni ŭpłyvajuć na raźvićcio ekanamičnych adnosin.

Kiraŭnik MZS Biełarusi Ryžankoŭ sprabuje ŭpeŭnić, što dźvie krainy znajšli ahulnuju hlebu dla palityčnaha supracoŭnictva na asnovie baraćby suprać ahulnaha voraha — Zachadu. Jon zajaviŭ:

«Pytańnie adkaznaści jeŭrapiejskich krain za kałanijalizm i za hienacyd — heta taksama adno sa złučnych źvionaŭ našaj palityki».

Ale Ryžankoŭ paśpiachova zamacoŭvaje za saboj status nie hałoŭnaha dypłamata, a hałoŭnaha prapahandysta, tamu časta vydaje žadanaje za najaŭnaje.

• 7
• 0
• 2
• 2
• 0
• 0
• 3
• 0