Na pieramovach u Abu-Dabi pradstaŭniki Pucina znoŭ patrabujuć ad Ukrainy addać uvieś Danbas

Pavodle infarmacyi ahienctva Reuters, rasijskaja delehacyja na pieramovach z Ukrainaj i ZŠA, jakija prachodziać u Abu-Dabi (AAE), znoŭ nastojvaje na pieradačy Rasii ŭsiaho Danbasa, u tym liku tych terytoryj, jakija Maskva nie zmahła ŭziać pad kantrol za amal čatyry hady vajny. Pra heta ahienctvu paviedamiła krynica, nabližanaja da Kramla.

Uładzimir Pucin. Fota: Vyacheslav Prokofyev, Sputnik, Kremlin Pool Photo via AP

Pa słovach hetaj krynicy, rasijski bok prasoŭvaje tak zvanuju formułu Ankorydža, jakuju ŭ Maskvie ličać uzhodnienaj pamiž prezidentam ZŠA Donaldam Trampam i prezidentam Rasii Uładzimiram Pucinym padčas samitu ŭ žniŭni minułaha hoda.

Pavodle hetaj schiemy, Rasija pavinna atrymać uvieś Danbas, a na inšych učastkach uschodu i poŭdnia Ukrainy prapanujecca zamarozić najaŭnyja linii frontu. Ukrainski bok raniej nieadnarazova zajaŭlaŭ, što takija ŭmovy źjaŭlajucca dla jaho nieprymalnymi.

Prezident Ukrainy Uładzimir Zialenski paviedamiŭ, što napiaredadni trochbakovaj sustrečy ŭ AAE pravioŭ kansultacyi z ukrainskaj delehacyjaj i padkreśliŭ, što kamanda razumieje, jak dziejničać. Pavodle jaho słoŭ, padčas razmovy abmiarkoŭvalisia ramki pieramoŭ i čakany vynik. Jon taksama adznačyŭ, što farmat dyjałohu moža źmianiacca ŭ pracesie sustrečy, a rašeńni buduć prymacca niepasredna pa chodzie pieramoŭ, pakolki taki farmat vykarystoŭvajecca ŭpieršyniu za doŭhi čas.

Raniej Zialenski zajaŭlaŭ, što klučavoj temaj pieramovaŭ Ukrainy, ZŠA i Rasii ŭ Abu-Dabi stanie terytaryjalnaje pytańnie, pieradusim los Danbasa. U Kramli heta paćvierdzili. Pres-sakratar prezidenta Rasii Dźmitryj Piaskoŭ zajaviŭ, što pazicyja Maskvy zaklučajecca ŭ tym, kab Uzbrojenyja siły Ukrainy pakinuli terytoryju Danbasa. Pamočnik Pucina Juryj Ušakoŭ, u svaju čarhu, adznačaŭ, što biez dypłamatyčnaha vyrašeńnia terytaryjalnaha pytańnia Rasija hatovaja damahacca pastaŭlenych metaŭ vajennym šlacham.

Kamientary da artykuła