U Minsku pačaŭsia sud pa hučnaj spravie Lipskich, jakija z pomsty płanavali zabić 50 čałaviek

Siońnia, 30 studzienia, u Minskim abłasnym sudzie pačaŭsia razhlad kryminalnaj spravy ŭ adnosinach da muža i žonki Lipskich, abvinavačanych u padrychtoŭcy sieryi zabojstvaŭ. Ich syn, nahadajem, byŭ śmiarotna paranieny pry zatrymańni ŭ žniŭni 2024 hoda.

Maci i syn Lipskija ŭ 2014 hodzie

Pavodle viersii śledstva, siamja dziejničała jak arhanizavanaja hrupa i rychtavała raspravu nad dziasiatkami ludziej. Historyja stała asabliva rezanansnaj paśla taho, jak Śledčy kamitet raskryŭ padrabiaznaści zabojstva 33‑hadovaj minčanki i raspavioŭ pra abstaviny zatrymańnia siamji Lipskich, nahadvaje Onliner.by.

Koratka nahadajem historyju Lipskich: siamja žyła ŭ dvuchpakajoŭcy na praśpiekcie Rakasoŭskaha. U Minsk jany pierajechali sa Śvietłahorska, kali ich adziny syn Saša vučyŭsia jašče ŭ škole. Spačatku jany narmalna ładzili z usimi, ale paśla stali kanfliktavać z susiedziami i źbirać pra ich infarmacyju.

Klučavyja padziei, paśla jakich Lipskija stali składać svoj «rasstrelny śpis», adbylisia ŭ kancy 2018 hoda, kali Alaksandr napaŭ na susieda pa padjeździe Alaksieja (imia źmieniena) i złamaŭ jamu palec. U momant kanfliktu pobač była Raisa Lipskaja.

Dom na praśpiekcie Rakasoŭskaha, dzie žyła siamja Lipskich

Pa hetym fakcie ŭ adnosinach da Alaksandra Lipskaha była ŭzbudžana kryminalnaja sprava. Sud pryznačyŭ jamu pakarańnie ŭ vyhladzie abmiežavańnia voli (4 hady «chimii»), adnak nieŭzabavie toj schavaŭsia. Śledam za im źnikła i jaho maci. Baćka Lipskaha praciahvaŭ pracavać i śćviardžaŭ, što nie bačyŭ syna z 2018 hoda, a žonku — z 2020-ha. Jak paśla ŭdałosia ŭstanavić śledčym, jon taksama ŭdzielničaŭ u dbajnym płanavańni zabojstvaŭ.

U listapadzie 2021 hoda Alaksandr Lipski, znachodziačysia ŭ vyšuku, pryjšoŭ dadomu da rodnaj siastry žonki Alaksieja — 33‑hadovaj Maryi (imia źmieniena) i zastreliŭ jaje. Žančyna ŭ toj momant źbirałasia ŭ dziciačy sadok pa maleńkuju dačku, a jaje muž, ratujučysia ad złačynca, vyskačyŭ z bałkona piataha paviercha i vyžyŭ.

Da momantu zatrymańnia Lipskich u žniŭni 2024 hoda siamja Alaksieja vymušana była źmianić kvateru i žyć u pastajannaj napruzie, aścierahajučysia za žyćcio blizkich. Akazałasia, nie daremna: uvieś hety čas Lipskija, jak daviedajecca śledstva, rychtavalisia da zabojstva niekalkich dziasiatkaŭ čałaviek. U śpis uvajšli ŭsie, chto mieŭ dačynieńnie da sudovaha pracesu 2019 hoda. Pa danych śledstva, Lipskija ličyli, što takim čynam pravasudździe sapsavała žyćcio ich synu.

U žniŭni 2024 hoda siamja Lipskich była zatrymana. Pry zatrymańni syn Alaksandr byŭ śmiarotna paranieny. U kvatery, dzie chavałasia siamja, znajšli arsienał zbroi: pistalety, patrony, hłušycieli, samarobnyja hranaty i bojeprypasy. Pa danych śledstva, «dla realizacyi płanaŭ siamja Lipskich vykarystoŭvała kanśpiracyju: paryki, kii, źmienu adzieńnia na vulicy».

U listapadzie 2025 hoda kryminalnaja sprava ŭ dačynieńni da muža i žonki Lipskich, abvinavačanych u padrychtoŭcy sieryi zabojstvaŭ, była nakiravana ŭ sud.

Muža i žonku abvinavačvajuć pa niekalkich kryminalnych artykułach

Spravu Lipskich razhladajuć u Minskim abłasnym sudzie. Zała poŭnaja: na pieršaje pasiedžańnie pryjšli ź dziasiatak paciarpiełych pa spravie, a taksama słuchačy. Sud pačaŭsia ŭ 10.30.

Muža i žonku Uładzimira i Raisu abvinavačvajuć adrazu pa niekalkich kryminalnych artykułach: č. 4 art. 295 KK (niezakonnyja dziejańni ŭ adnosinach da ahniastrelnaj zbroi, bojeprypasaŭ i vybuchovych rečyvaŭ); pp. 10, 15 č. 2 art. 139 KK (zabojstva, ździejśnienaje hrupaj asob, ździejśnienaje ŭ adnosinach da asoby abo jaje blizkich, u suviazi z vykanańniem hramadskaha abaviazku), č. 1 art. 14 KK (zamach na złačynstva), pp. 1, 5, 10, 15, 16 č. 2 art 139 KK (zabojstva, ździejśnienaje ŭ adnosinach da dźviuch abo bolš asob, ździejśnienaje ŭ adnosinach da asoby abo jaje blizkich, u suviazi z vykanańniem hramadskaha abaviazku, ździejśnienaje hrupaj asob, ździejśnienaje asobaj, jakaja raniej ździejśniła zabojstva, za vyklučeńniem zabojstva, praduhledžanaha art. 143 KK).

Kamientary da artykuła