Jeŭrapiejskija krainy i Japonija hatovyja dapamahčy zabiaśpiečyć prachod praz Armuzski praliŭ

Pra hatoŭnaść dapamahčy harantavać biaśpiečny prachod praz Armuzski praliŭ havorycca ŭ sumiesnaj zajavie Vialikabrytanii, Francyi, Hiermanii, Italii, Niderłandaŭ i Japonii, apublikavanaj 19 sakavika.

Zdymak ilustracyjny. Fota: AP Photo/Altaf Qadri

«My samym rašučym čynam asudžajem niadaŭnija napady Irana na biazzbrojnyja handlovyja sudny ŭ Piersidskim zalivie, napady na cyvilnuju infrastrukturu, uklučajučy naftahazavyja abjekty, a taksama faktyčnaje zakryćcio Armuzskaha praliva iranskimi siłami», — paviedamlajecca ŭ zajavie.

Adznačajecca taksama, što ŭmiašańnie ŭ mižnarodnaje sudnachodstva i parušeńnie hłabalnych łancužkoŭ pastavak enierhii «ŭjaŭlaje pahrozu mižnarodnamu miru i biaśpiecy».

«U suviazi z hetym my zaklikajem da nieadkładnaha ŭsioachopnaha maratoryja na ataki na cyvilnuju infrastrukturu, uklučajučy naftahazavyja abjekty. My zajaŭlajem pra hatoŭnaść unieści ŭkład u adpaviednyja namahańni pa harantavańni biaśpiečnaha prachodu praz Armuzski praliŭ», — havorycca ŭ dakumiencie.

Jak mienavita hetyja siem krain źbirajucca ŭdzielničać u harantavańni biaśpieki prachodu praz praliŭ, u zajavie nie skazana.

Jak adznačaje ahienctva AFP, Italija i Hiermanija paśla abnarodavańnia zajavy patłumačyli, što havorka idzie nie pra nieadkładnuju adpraŭku vajskovych sił u rehijon, a, chutčej, pra niejkuju sumiesnuju mižnarodnuju apieracyju ŭžo paśla spynieńnia ahniu.

Kamientary da artykuła