Iran za miesiac vajny naraściŭ ekspart nafty, adnačasova abmiežavaŭšy kankurentaŭ

Padčas vajny na Blizkim Uschodzie Iran značna pavialičyŭ ekspart nafty, adnačasova faktyčna abmiežavaŭšy prachod inšych pastaŭščykoŭ praz Armuzski praliŭ, piša Bloomberg na padstavie danych ab adsočvańni sudnaŭ.

Armuzski praliŭ. Zdymak ilustracyjny. Fota: AP Photo/Altaf Qadri

Ahulnaja kolkaść sudnaŭ, što prachodziać praz praliŭ, u sakaviku rezka skaraciłasia — z kala 135 u dzień da mienš čym šaści. Pry hetym bolšaść tankieraŭ, jakija ŭsio ž vyvoziać naftu ź Piersidskaha zaliva, źviazanyja ź Iranam abo jaho partniorami.

Niahledziačy na bambardziroŭki z boku ZŠA i Izraila, Iran navat pavialičyŭ zdabyču i ekspart: u siarednim da 1,8 miljona baralaŭ u sutki, što bolš, čym letaś. Dadatkova paŭpłyvała i źmiakčeńnie amierykanskich sankcyj, dziakujučy čamu iranskaja nafta praciahvaje pastaŭlacca, hałoŭnym čynam u Kitaj.

Vajna taksama pryviała da rezkaha rostu suśvietnych cen na naftu: marka Brent padaražeła amal na 60% z pačatku sakavika. U vyniku Iran značna pavialičyŭ dachody — prykładna da 139 miljonaŭ dalaraŭ u dzień.

Akramia taho, Iran uzmacniŭ kantrol nad pralivam i pačaŭ patrabavać ad niekatorych sudnaŭ apłatu i infarmacyju pra hruz i ekipaž. Razhladajecca navat uviadzieńnie aficyjnaha zakona, jaki abaviazvaje ŭsie karabli płacić za prachod.

Takim čynam, na fonie kanfliktu Iran nie tolki zachavaŭ, ale i ŭmacavaŭ svaje pazicyi na naftavym rynku, staŭšy adnym z hałoŭnych ekanamičnych bienieficyjaraŭ situacyi.

Kamientary da artykuła