Vajna na Blizkim Uschodzie padyšła da krytyčnaha punktu: ustupleńnie ŭ kanflikt jemienskich chusitaŭ pahražaje pierakryćciom apošniaha maršrutu pastavak nafty ź Piersidskaha zaliva. Kali paśla zakryćcia Armuzskaha praliva budzie paralizavany jašče i terminał u Čyrvonym mory, śviet sutykniecca z deficytam u 15 młn barelaŭ u sutki, što moža ŭźniać ceny da niebyvałych vyšyń.
Iranskaja vajna padyšła da čyrvonaj rysy ŭ Čyrvonym mory, za jakoj — poŭnamaštabny suśvietny enierhietyčny kryzis. Na hetych vychodnych, praź miesiac paśla pačatku vajny Izraila i ZŠA ź Iranam, iranskija sajuźniki ŭ Jemienie — chusity — ustupili ŭ kanflikt. Pakul što streły papieradžalnyja, pa Izraili, ale chusity zdolnyja ŭ luby momant pierajści da atak na saudaŭski trubapravod i naftavy terminał u Čyrvonym mory, piša VVS.
Paśla taho jak Iran pierakryŭ Armuzski praliŭ — adziny vychad ź Piersidskaha zaliva, praź jaki na suśvietny rynak pastupała 25% usioj nafty i 20% hazu, — Saudaŭskaja Aravija pierakinuła prykładna treć hetych pastavak na abchodny maršrut pa naftapravodzie da terminała Janbu-el-Bachr na ŭźbiarežžy Čyrvonaha mora, jaki jana pabudavała jašče ŭ irana-irakskuju vajnu kanca minułaha stahodździa.
Dziakujučy hetym pastaŭkam ceny na naftu ŭ śviecie vyraśli zusim nie tak, jak mahli b, pakolki Saudaŭskaja Aravija — adzin z troch najbujniejšych eksparcioraŭ nafty ŭ śviecie razam z ZŠA i Rasijaj — da vajny pastaŭlała praz Armuz kala 6 młn barelaŭ u sutki, a ciapier vyvozić pa alternatyŭnym maršrucie praź Janbu-el-Bachr 5 młn barelaŭ.
Bolšaja častka hetaj nafty nakiroŭvajecca ŭ Aziju praz Bab-el-Mandebski praliŭ, jaki dva hady błakiravali chusity — šyickaja hrupoŭka ŭ Jemienie, jakaja kantraluje značnuju častku krainy i atrymlivaje padtrymku ź Irana.
Z pačatku iranskaj vajny chusity pavodzili siabie cicha. Ale na hetych vychadnych pačali stralać. U subotu ranicaj jany zapuścili rakiety ŭ bok Izraila i pryhrazili praciahnuć, pakul idzie vajna ź Iranam. Uviečary ataka paŭtaryłasia.
Analityki čakali takoha raźvićcia padziej. Jany adznačali, što chusity, niahledziačy na padtrymku Irana, — samastojnaja siła, i ŭstupiać u boj tolki kali Iranu budzie pahražać śmiarotnaja niebiaśpieka.
«Luboje rašeńnie ab ustupleńni ŭ vajnu budzie pryniata ŭ Jemienie, a nie ŭ Tehieranie», — adznačała jašče da pieršych chusickich atak Ejprył Eli, ekśpiert pa Jemienie z Vašynhtonskaha instytuta.
Jana pradkazvała, što chusity mohuć pačać z atak na Izrail, što ŭ vyniku i zdaryłasia. A potym pajści pa šlachu eskałacyi.
«Va ŭmovach, kali Armuzski praliŭ zakryty, ataki na sudnachodstva ŭ Čyrvonym mory dazvolać chusitam akazać maksimalny cisk na suśvietnyja enierhietyčnyja rynki i sudnachodstva. I asabliva z ulikam taho, što Saudaŭskaja Aravija pavialičvaje ekspart nafty praz Čyrvonaje mora ŭ abchod Armuzskaha praliva».
«Isłamskaja revalucyja ź jemienskim kałarytam»
Rašeńnie chusitaŭ ustupić u vajnu supała z prybyćciom na Blizki Uschod ź Japonii amierykanskaha desantnaha karabla USS Tripoli, na borcie jakoha tysiačy marskich piechacincaŭ, patencyjna zdolnych akupavać vostraŭ Chark — naftavaje serca Irana.
Paśla miesiaca biezvynikovych sprob dabicca ad Isłamskaj respubliki kapitulacyi bambardziroŭkami i zabojstvami jaje kiraŭnikoŭ, Donald Tramp praciahvaje śćviardžać, što nie źbirajecca adpraŭlać u Iran sałdat dla naziemnaj apieracyi. Ahavorvajučysia pry hetym, što navat kali b i sabraŭsia, nikomu b zahadzia nie skazaŭ.
Ciapier na amierykanskuju eskałacyju adkazali ad imia Irana jaho paplečniki pa suśvietnaj isłamskaj revalucyi — chusity. Ich pahroza surjoznaja — kali Saudaŭskaja Aravija stracić i alternatyŭny maršrut ekspartu nafty, deficyt u śviecie pryviadzie da novaha skačku cen, jakija i biez taho ŭźlacieli z 70 da 115 dołaraŭ za barel za miesiac vajny.
«Chusity abviaścili, što ŭstupili ŭ vajnu, i vypuścili rakietu pa Izraili. Ale hałoŭnaje — ci stanuć ich celami naftavy terminał Janbu-el-Bachr abo saudaŭski trubapravod «Uschod-Zachad». Kali jon spynicca, deficyt nafty pavialičycca z 10 młn da 13—15 młn barelaŭ u sutki», — padličyŭ Hrehary Bru, ekśpiert pa nafcie i Iranu z Eurasia Group.
Nie tolki chusity, ale i Iran u teoryi zdolnyja razburyć i naftapravod, i terminał, papiaredžvaje Majk Najt, ekśpiert pa Jemienie z Vašynhtonskaha instytuta blizkaŭschodniaj palityki z 20‑hadovym vopytam savietnika pa biaśpiecy ŭ rehijonie.
Ale navat kali ŭ Irana nie atrymajecca i jon prajhraje vajnu z Amierykaj i Izrailem, chusity zastanucca destabilizujučaj siłaj u rehijonie, upeŭnieny jon.
«Ja surjozna vyvučaŭ chusitaŭ z 1980‑ch hadoŭ, — skazaŭ jon. — Jany — sapraŭdnyja prychilniki isłamskaj revalucyi i całkam mohuć pieražyć i Isłamskuju respubliku Iran, i livanskuju «Chiezbału» i stać apošnim apłotam isłamskaj revalucyi, ź jemienskim kałarytam».
«Miesiacami ŭ kabinie, na siabie zabiŭ. I staŭ pytać: moža, žonka taksama budzie pracavać?». Čamu emihracyja raźbivaje siemji i što rabić, kab usio papravić3434
Kamientary