Praź situacyju na Blizkim Uschodzie Jehipiet uvodzić nadzvyčajnyja miery pa ekanomii paliva i elektraenierhii
Dla turyzmu pakul robiać vyklučeńnie.
Urad Jehipta ŭvioŭ nadzvyčajnyja miery pa ekanomii elektraenierhii na fonie imklivaha rostu cen na paliva, vyklikanaha vajnoj ź Iranam. Usie handlovyja kropki i ŭstanovy hramadskaha charčavańnia abaviazany spyniać pracu nie paźniej za 21:00.
Abmiežavańni stali adkazam na faktyčnuju błakadu Armuzskaha praliva, praź jaki prachodziła da 20% suśvietnych pastavak nafty i hazu. Choć Jehipiet nie źjaŭlajecca bokam kanfliktu, jaho zaležnaść ad impartnaha paliva zrabiła ekanomiku krainy vielmi ŭraźlivaj da źniešnich šokaŭ.
Premjer-ministr krainy Mastafa Madbuli adznačyŭ, što vydatki na bienzin tolki za sakavik vyraśli bolš čym udvaja, dasiahnuŭšy 2,5 młrd dołaraŭ.
Akramia rańniaha zakryćcia biźniesu, urad pryniaŭ šerah inšych «vyklučnych mier», jakija buduć dziejničać na praciahu miesiaca.
Siarod ich — pryhłušeńnie vuličnaha aśviatleńnia i rekłamnych ščytoŭ, skaračeńnie paliŭnych limitaŭ dla dziaržaŭnych aŭtamabilaŭ na treć, a taksama pieravod mnohich supracoŭnikaŭ na dystancyjnuju pracu adzin dzień na tydzień u krasaviku.
Pry hetym hateli i turystyčnyja abjekty zastanucca vyklučeńniem, bo turyzm zabiaśpiečvaje kala 10% jehipieckaj ekanomiki.
Situacyja ŭskładniajecca tym, što sudnachodstva praz Armuzski praliŭ amal spyniłasia z-za pahroz Irana atakavać naftavyja tankiery. Kryzis pačynaje zakranać i inšyja rehijony: u Efiopii dziaržaŭnym kampanijam užo zahadali adpravić častku piersanału ŭ adpačynak dla ekanomii transpartnaha paliva.
Ciapier čytajuć
Kab nie siadzieć u Rasii za narkotyki, małady danosčyk z Ašmianaŭ zapisaŭsia na front. Dyj zhinuŭ16
Kamientary