Biełaruski hurt atrymaŭ śpiecyjalny pryz polskaha fiestyvalu
Biełaruski mužčynski hurt «Kasary» vyjšaŭ u finał fiestyvalu falkłornaj muzyki Nowa Tradycja ŭ Varšavie. Kalektyŭ adznačyli śpiecyjalnym pryzam Jedynka, piša Most.
Hurt «Kasary» na fiestyvali Nowa Tradycja. Fota: Most
Hurt «Kasary» byŭ stvorany ŭ 2023 hodzie ŭ Varšavie pa inicyjatyvie biełaruskaha muzyki i daśledčyka tradycyjnaj kultury Siaržuka Doŭhušava. Kalektyŭ zajmajecca adradžeńniem tradycyj biełaruskich mužčynskich śpievaŭ. Repiertuar hurta składzieny z kasarskich, žaŭnierskich, rekruckich i liryčnych piesień biełaruskaj narodnaj muzyčnaj spadčyny.
Śpiecyjalna dla vystupu na fiestyvali kalektyŭ uraznastaiŭ aranžyroŭki rekruckich i biasiednych piesień elektronnym składnikam, dziakujučy čamu jany zahučali jašče bolš atmaśfierna. Varšaŭskaja publika vielmi ciopła sustreła biełaruskich muzykaŭ.
Razam ź biełarusami ŭ finalny dzień konkursu, 22 maja, na scenie fiestyvalu vystupili hurt Piąty Żywioł, jaki pracuje na styku fołku i džazu, minimalistyčna-avanhardny duet Braty, kalektyŭ Etersoul ź impravizacyjnym etna-džazavym spałučeńniem kłarnieta i elektrahitary, a taksama Pavieł Płoskań, u rukach jakoha kołavaja lira nabyła ŭźniosłaje prahresiŭna-psichadeličnaje hučańnie.
Pavodle vynikaŭ konkursu hurt «Kasary» adznačany śpiecyjalnym pryzam Jedynka. Hran-pry fiestyvalu atrymała polskaja multyinstrumientalistka Karalina Matuškievič.
Čytajcie taksama:
Vyjšaŭ zbornik biełaruskich kałychanak
U Varšavie adkryli jašče adzin šełtar dla palitviaźniaŭ — hrošy sabrali za niekalki dzion