U Varšavie adkryli jašče adzin šełtar dla palitviaźniaŭ — hrošy sabrali za niekalki dzion
Muzyka Siarhiej Doŭhušaŭ zahareŭsia idejaj zrabić šełtar dla byłych palitviaźniaŭ, vydvaranych ź Biełarusi. Hrošy na prajekt atrymałasia sabrać praz fejsbuk — pieršyja žychary ŭžo zasialilisia ŭ dom.
Siarhiej vyrašyŭ zładzić šełtar, kali pabačyŭ naviny pra vyzvaleńnie śniežańskaj hrupy palitviaźniaŭ: nahadajem, tady za miežy Biełarusi vydvaryli 123 palitviaźniaŭ. Dla Doŭhušava heta nie pieršy dośvied takoj pracy. Čatyry hady tamu mužčyna zasnavaŭ u Varšavie «Dom tvorcaŭ» — dziejačy biełaruskaj kultury, jakim patrebnaja dapamoha, mohuć tam žyć niekalki miesiacaŭ.
U vypadku z šełtaram jamu paščaściła, bo svoječasova znajšłosia pamiaškańnie pa nizkim košcie:
«Hety dom znachodzicca ŭ vielmi dobrym rajonie Varšavy, siarod lesa, arenda kaštuje niašmat. Treba było tolki chutka pryniać rašeńnie. Ja zapuściŭ zbor, i za 3‑4 dni my sabrali dastatkova, kab pakryć pieršyja vydatki, zapłacić za try miesiacy arendy».
U šełtar užo zasialili pieršych pastajalcaŭ, heta piać byłych palitviaźniaŭ z hrupy vyzvalenych 13 śniežnia. Płanujecca, što byłyja palitviaźni zmohuć žyć u šełtary da dvuch miesiacaŭ.
U domie piać pakojaŭ, sialić byłych palitviaźniaŭ buduć pa dva čałavieki na pakoj. Taksama jość płany ładzić u šełtary zaniatki pa art-terapii — dla hetaha tam jość dobraje pamiaškańnie.
U Doŭhušava i inšych aktyvistaŭ atrymaŭsia prajekt, zrobleny całkam na achviaravańni biełarusaŭ:
«Heta pakazvaje, nakolki biełarusy salidarnyja, jak my ŭklučajemsia, kali zdarajecca biada ci kali treba kamuści dapamahčy. Šmat ludziej reahavała, šmat ludziej udzielničała. Niechta zadanaciŭ navat dziesiać złotych — maŭlaŭ, vybačajcie, u mianie zusim niama hrošaj, ale ja chaču paŭdzielničać».
Biełarusy taksama achviarujuć niekatoryja rečy, kab abstalavać šełtar — ad čajnikaŭ i patelniaŭ da łožkaŭ i matracaŭ.
«Budzie vielmi kruty prykład, kali atrymajecca zakryć patreby šełtara na hod prosta praz tych biełarusaŭ, jakija zdolnyja achviaravać. Suma nie vielmi vialikaja, arenda kaštuje 1600 jeŭra na miesiac, jašče jość kamunałka i inšyja vydatki. Za hod vychodzić niedzie 24 tysiačy jeŭra. Kali atrymajecca znajści takuju sumu, hety šełtar hod budzie žyć», — razvažaje Doŭhušaŭ.
Infarmacyju pra toje, jak možna dapamahčy šełtaru, Siarhiej publikuje na svajoj staroncy ŭ fejsbuku.
«Naša Niva» — bastyjon biełaruščyny
PADTRYMAĆCiapier čytajuć
«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja115
Kamientary