Biełaruska praz sacsietku za šeść hadzin dapamahła italjancam znajści chłopčyka, jaki haściavaŭ u ich amal 30 hadoŭ tamu
Dziŭnaja historyja razharnułasia na staroncy ŭ Threads u karystalnicy pa imieni Dyjana. Kaliści dziaŭčyna sama jeździła «ŭ siamju» ŭ Italiju — znajšła jaje praz sacsietki, i ciapier dapamahaje inšym italjancam, jakija žadajuć atrymać viestačku ad dziaciej, jakich jany prymali ŭ hości pa «čarnobylskaj» prahramie, piša vydańnie «Mocnyja naviny».
Dyjana apublikavała post pra toje, što žycharka italjanskaha horada Tanara pa imieni Silvana Martyz šukaje hamielčuka Juryja Jurčanku, jaki naprykancy 1990‑ch haściavaŭ u jaje siamji. Chłopčyku na toj momant było 9 hadoŭ. Italjancy chacieli daviedacca, jak skłałasia jaho žyćcio, i adnavić stasunki.
Post zavirusiŭsia — i Jura znajšoŭsia ŭsiaho praz 6 hadzin paśla publikacyi. Dakładniej, u kamientaryjach abjaviłasia jaho žonka, bo ŭ samoha Juryja niama staronak u sacsietkach. Z dazvołu muža Darja padzialiłasia jaho dziciačymi fota ź Italii, a taksama dadała sumiesny «darosły» zdymak.
«Ź Silvanaj źviazalisia, kamunikujem pakul. Chłopčyku Juru chutka budzie 40, a Silvana jaho zapomniła jak bravo bambino (kali pierakładčyk nie padmanuŭ, to muž byŭ dobrym chłopčykam). Vielizarny dziakuj aŭtaru vietki i ŭsim za jaje prasoŭvańnie! Da hetaha času muraški», — padzialiłasia Darja.