Irłandziec, da jakoha małaja Cichanoŭskaja jeździła ŭ 1990-ja: «Kali b niechta skazaŭ, što adnoje z hetych dziaciej stanie palitykam, ja b pakazaŭ na Śvietu»
U padletkavym uzroście ciapierašniaja lidarka biełaruskich demakratyčnych sił Śviatłana Cichanoŭskaja na letnich vakacyjach časta jeździła ŭ Irłandyju. Jana była adnym z «čarnobylskich dziaciej», jakich prymali irłandskija siemji dla azdaraŭleńnia. Dla Hienry i Meryjan Dzinaŭ z miastečka Raskrej u centralnaj častcy hetaj krainy jana była prosta Śvietaj — dziaŭčynkaj, jakaja pryjazdžała da ich čatyry razy. Amal praz 20 hadoŭ jany adnymi z pieršych daviedalisia, što Cichanoŭskaja bałatujecca ŭ prezidenty Biełarusi. Vydańnie «Lusterka» pahavaryła z Hienry Dzinam, jaki prymaŭ Śviatłanu ŭ Irłandyi.
«Radyjacyja dajšła i da Irłandyi»
Ciapier Hienry Dzinu 70 hadoŭ. Jon žyvie ŭ pasiołku Raskrej u hrafstvie Typierery, praktyčna ŭ samym centry Irłandyi. Heta haradok z nasielnictvam kala piaci z pałovaj tysiač čałaviek, dzie, pavodle Hienry, kožny čaćviorty — zamiežnik. Sam jon 37 hadoŭ adpracavaŭ u miascovych orhanach ułady, a taksama doŭhija hady vałodaŭ nievialikim biznesam. U Hienry i jahonaj žonki Meryjan dvoje dziaciej i ŭžo šeść unukaŭ. Syn — prafiesar u Kanadzie, a dačka žyvie pa susiedstvie.
Paśla Čarnobylskaj katastrofy hetaja siamja vyrašyła dapamahać biełaruskim dzieciam. Hienry Dzin uspaminaje, što avaryja stała surjoznaj prablemaj, nastupstvy jakoj adčuła navat jaho kraina.
«Častka radyjacyi dajšła i da Irłandyi, zakranuŭšy fiermy ŭ harach Uikłau [na paŭdniovym uschodzie krainy]. Jaje vymiarali navat tut, u miascovym manastyry. Tak što my adčuli nastupstvy. Ja viedaŭ, što adna łedzi z horada Kork pryvoziła tudy biełaruskich dziaciej. Jana była pieršaj, chto heta arhanizavaŭ. Spačatku ja dałučyŭsia da jaje hrupy, a paźniej, u pačatku 1990-ch, zasnavaŭ ułasnuju arhanizacyju, — raskazvaje Hienry. — Pryčyna, pa jakoj ja heta zrabiŭ, była ŭ tym, što da hetaha nichto nie pryvoziŭ dziaciej druhi ci treci raz. A ja adčuvaŭ, što irłandskija siemji nastolki pryviazvalisia da dziaciej ź Biełarusi, što, kali jany chacieli i mahli apłacić ich paŭtorny pryjezd, my musili im u hetym paspryjać».
Arhanizacyja Chernobyl Life Line, suzasnavalnikam jakoj staŭ Hienry, pryvoziła dziaciej u Irłandyju niekalki razoŭ na hod.
«Pieršaja hrupa zvyčajna pryjazdžała ŭ červieni, nastupnaja — u lipieni i jašče adna — u žniŭni. A potym była jašče adna, na Kalady. U siarednim atrymlivałasia pryvozić pa 40 dziaciej ciaham troch-čatyroch miesiacaŭ na hod, — uspaminaje Hienry. — Kali pryjazdžali maleńkija dzieci, heta była sucelnaja viesiałość. A kali pryjazdžali starejšyja, jakim było pa 15−17 hadoŭ, to my znachodzili im pracu, kab jany mahli zarabić hrošy na svaju adukacyju, kali viernucca dadomu ŭ Biełaruś. Akramia taho, dzieci prachodzili tut lačeńnie. Niekatorym jano patrabavałasia praciahły čas, tamu im davodziłasia viartacca znoŭ i znoŭ».
«Napałochanyja dzieci, jakija za dzień całkam źmianialisia»
Hienry kaža, što dzieci ź Biełarusi, jakija pryjazdžali na azdaraŭleńnie i adpačynak, byli ŭražanyja tym, jak mocna adroźnivajecca žyćcio ŭ Irłandyi.
«Spačatku jany vyhladali napałochanymi. Mahčyma, źlohku ŭstryvožanymi i napružanymi. Ich adzieńnie było trochi starym, znošanym, — uspaminaje mužčyna. — Ale ŭžo na nastupny dzień jany stanavilisia absalutna inšymi. Ich vočy źziali. Jany byli bolš rassłablenyja, i im było vielmi viesieła. Dzieci źmianialisia, jak tolki pryjazdžali siudy».
Śviatłana Cichanoŭskaja (tady Pilipčuk) pryjazdžała ŭ siamju Dzinaŭ čatyry razy. Hienry ŭspaminaje, što budučaja lidarka biełaruskich demsił užo tady dobra viedała anhlijskuju i časta dapamahała ź pierakładam.
«Jana była vydatnaj pierakładčycaj jašče dziciom. Jaje anhlijskaja była vielmi, vielmi dobraj. Tamu jana pryhladała za małodšymi dziećmi abo tymi, u kaho nie było anhlijskaj, dapamahała im kamunikavać z nami», — raskazvaje Hienry.
Asabliva jon hanarycca tym, što za čas vizitaŭ Śviatłany ŭ Irłandyju ŭdałosia pryščapić joj luboŭ da dobraj anhłamoŭnaj muzyki.
«Kali my jechali niekudy na mašynie, Śvieta siadzieła na piarednim siadzieńni, i ja ŭklučaŭ svaju lubimuju muzyku, — kaža Dzin. — Z pryčyny ŭzrostu ja lubiŭ muzyku 1960‑ch hadoŭ. Śviatłana heta padchapiła i palubiła hurty The Mamas & The Papas, The Beatles i inšyja».
«Kali b niechta skazaŭ, što adno z hetych dziaciej stanie palitykam, ja b pakazaŭ na Śvietu»
Hienry kaža, što ŭžo ŭ tyja časy jany abmiarkoŭvali ź junaj Śviatłanaj palityku. Jon pryznajecca, što nie moh tady ŭjavić, što jaho padapiečnaja sama stanie palityčnaj lidarkaj.
«My zaŭsiody abmiarkoŭvali irłandskuju palityku, kali jana pryjazdžała. Śviatłanu vielmi ŭražvała, što my mahli adkryta i krytyčna havaryć pra našych palitykaŭ, bo ŭ Biełarusi heta nie dapuskałasia. Ja i ŭjavić nie moh, što ź joj zdarycca ŭ budučyni. Ale kali b mnie tady niechta skazaŭ, što adno ź dziaciej, jakich my pryvieźli ŭ Irłandyju, stanie viadomym palitykam, to ja b upeŭniena pakazaŭ na Śvietu i skazaŭ: «Heta jana», — kaža mužčyna.
Pra toje, što ŭ 2020 hodzie Śviatłana vyrašyła bałatavacca ŭ prezidenty, Hienry Dzin daviedaŭsia adnym ź pieršych — jany ź joj rehularna stelefanoŭvalisia.
«Śviatłana raskazała, jak tolki akazałasia ŭciahnutaja ŭ heta, jašče da pačatku kampanii. Ja byŭ u kursie taho, što adbyvajecca ŭ Biełarusi. Viedaŭ, što adbyvajecca, hladzieŭ navinavyja zvodki, — raskazvaje Hienry. — Viadoma, ja sprabavaŭ joj niešta raić pa kampanii. Ale ž ja nie byŭ na miescy padziej, nie prysutničaŭ tam asabista. Tamu nazvać maje parady słušnymi nielha».
Sustreča praz 18 hadoŭ
U lipieni 2021 hoda, padčas svajho vizitu ŭ Irłandyju ŭžo ŭ jakaści lidarki demakratyčnych sił Biełarusi, Śviatłana Cichanoŭskaja pryjechała ŭ Raskrej, kab naviedać siamju, jakaja prymała jaje ŭ dziacinstvie. Hetaja sustreča stała pieršaj za 18 hadoŭ.
«Heta było fantastyčna. Mara, jakaja stała javaj: znoŭ ubačyć Śviatłanu, toje, jak jana vyrasła, sustreć dvuch jaje cudoŭnych dziaciej. Bo raniej my bačylisia ź joj i dziećmi tolki praz telefon, u WhatsApp. Było cudoŭna ŭbačyć ich asabista. Ja nie mahu dačakacca, kali jana vierniecca znoŭ».
Praz hady suviaź pamiž Hienry Dzinam i Śviatłanaj Cichanoŭskaj nie pierapyniłasia. Jany dahetul padtrymlivajuć kantakt:
«My stelefanoŭvajemsia i havorym pra ŭsio. Pra palitykaŭ — ad Trampa da Pucina, ad Zialenskaha da Si Czińpina. My abmiarkoŭvajem suśvietnyja spravy. I prosta bałbočam».
Jak źmianiŭsia vobraz Cichanoŭskaj za 2020—2024 i jak jana hladzicca pobač ź inšymi lidarkami ŠMAT FOTA
Irłandski siabar dziacinstva Cichanoŭskaj: Mnohich małodšych dziaciej vielmi ciahnuła da Śviety, jana zrabiłasia lidaram dla ich
«Była ścipłaj vydatnicaj, ale svaju dumku mahła adstajać»: što kažuć nastaŭniki pra Śviatłanu Cichanoŭskuju
Ciapier čytajuć
«Fieminizm u maim vypadku pieramoh». Vieranika Stankievič — pra dapamohu palitviaźniam u «Volnych» i płany na viasielle ź Ivulinym24
«Fieminizm u maim vypadku pieramoh». Vieranika Stankievič — pra dapamohu palitviaźniam u «Volnych» i płany na viasielle ź Ivulinym
Irłandziec, da jakoha małaja Cichanoŭskaja jeździła ŭ 1990-ja: «Kali b niechta skazaŭ, što adnoje z hetych dziaciej stanie palitykam, ja b pakazaŭ na Śvietu»2222
Irłandziec, da jakoha małaja Cichanoŭskaja jeździła ŭ 1990-ja: «Kali b niechta skazaŭ, što adnoje z hetych dziaciej stanie palitykam, ja b pakazaŭ na Śvietu»22
«Pra ciažarnaść viedali tolki jana i jaje chłopiec». Stali viadomyja padrabiaznaści historyi ź miortvym niemaŭlom, znojdzienym u Baranavičach u pakiecie
Kamientary
I na anhlijskom v 1998 hodu otlično hovorili liš privilehirovannyje, kotorych otdavali v śpiecškoły ili imieli dieńhi na riepietitorov
moža .........Cichanoŭskaja padletkam jeździła .... ?
niemaŭla ž taksama małoje ))
I anhielskaja ŭ jaje (prynamsi vymaŭleńnie) žachlivaja.