Łaŭreatam premii imia Arsieńnievaj staŭ Ihar Kulikoŭ

U Varšavie nazvali imia łaŭreata paetyčnaj premii imia Natalli Arsieńnievaj 2026 hoda. Im staŭ Ihar Kulikoŭ z knihaj vieršaŭ i pierakładaŭ z sanskrytu i anhlijskaj «Nietutejšaja dalečynia», jakaja vyjšła ŭ vydaviectvie «Januškievič» u 2025 hodzie, paviedamiŭ Biełaruski PEN.

Kałaž: Bellit.info

Uznaharodu Ihar Kulikoŭ atrymaŭ «za mietafizičnuju advahu ŭ pracy z movaj i stvareńni apryčonaha mastackaha śvietu». Žury adznačyła pracu aŭtara ŭ stvareńni svajho moŭnaha ekzistencyjna-paetyčnaha kosmasu.

Sioleta ŭ karotkim śpisie naminantaŭ premii byli try knihi. Aprača knihi-pieramožcy, jaho składali zborniki «Chronika admaŭleńnia pustaty» Illi Kulbickaha (vydaviectva Skaryna Press, 2025) i «Čajny zbor. Vybranaja postpaezija 2007—2025» Maksa Ščura (vydaviectva SayBeat, 2025).

Premija imia Natalli Arsieńnievaj — litaraturnaja ŭznaharoda, jakaja prysudžajecca za najlepšuju biełaruskuju paetyčnuju knihu. Jana była zasnavanaja ŭ 2016 hodzie Biełaruskim PEN-centram, Sajuzam biełaruskich piśmieńnikaŭ i Zhurtavańniem biełarusaŭ śvietu «Baćkaŭščyna». Z 2021 hoda arhanizacyjaj hetaj padziei zajmajucca Biełaruski PEN i Mižnarodny sajuz biełaruskich piśmieńnikaŭ.

Pieramožcy premii imia Natalli Arsieńnievaj minułych hadoŭ:

• 2017 — Uładzimier Niaklajeŭ, «Tolki vieršy»;
• 2018 — Aleś Razanaŭ, «Pieravybranaje»;
• 2019 — Maryja Martysievič, «Sarmatyja»;
• 2020 — Andrej Chadanovič, «Škoła travy»;
• 2021 — Alesia Bašarymava, «Rasamacha»;
• 2022 — Darja Bialkievič, «Ślozy na viecier»;
• 2023 — Nasta Kudasava, «Pobač»;
• 2024 — Hanna Šakiel, «Cieła mihdału»;
• 2025 — Siarhiej Pryłucki, «Ničoha niastrašnaha».

Kamientary da artykuła