«Vodar» i «Smačny»: na ŭpakoŭkach pišuć, što na zakvascy, a jany na draždžach
U biełaruskich kramach pačali pradavać bolš naturalny chleb na zakvascy, ale ź niuansam. Na jaho źviarnuła ŭvahu karystalnica Threads Dzina, piša Blizko.by.
Dziaŭčyna vykłała fota dvuch vidaŭ chleba vytvorčaści Słuckaha Minskaha chlebazavodaŭ. Na ŭpakoŭkach było paznačana, što abodva vidy pradukcyi pryhatavanyja z vykarystańniem zakvaski, a značyć źjaŭlajucca bolš naturalnym varyjantam u paraŭnańni sa zvyčajnym chlebam, bo ŭ ich niama pramysłovych draždžej. Ale na advarotnym baku ŭ składzie ŭ abodvuch vypadkach byli paznačanyja chlebapiakarnyja droždžy.
U kamientarach mierkavańni razyšlisia:
«I što vas tut biantežyć? Vyrab chleba na zakvascy nie vyklučaje dadavańnia presavanych draždžej, bolš za toje, heta kłasičnaja praktyka».
«Na minułych vychadnych u mianie było takoje ž pytańnie da hetaha chleba. Vy nie samotnyja, aŭtar. Jak na mianie, 100% na zakvascy aznačaje, što tam tolki zakvaska».
«A ŭ čym panika? Zakvaska — tyja ž droždžy, tolki ŭ profil. Bijachimija pracesu adnolkavaja, roźnica tolki ŭ aramatycy».
«Prosta markietynh, ale i ŭ cełym adno druhomu nie supiarečyć. Zakvaska — heta dzikija droždžy plus małočnakisłyja bakteryi».
U tradycyjnaj (naturalnaj) chlebnaj zakvascy sapraŭdy abaviazkova pavinny być droždžy. Ale nie zvyčajnyja, a «dzikija» — naturalnyja, jakija źbirajuć razam z syravinaj dla «spantannaha» bradžeńnia. Mienavita hetyja «dzikija» droždžy adkazvajuć za padjom ciesta i ŭtvareńnie pyšnaha miakišu, vydzialajučy vuhlakisły haz. Chleb na zakvascy ličycca bolš karysnym, tamu što ŭ zakvasku nie dadajuć cukar abo pramysłovyja droždžy. U składzie nazvanych chlaboŭ nie było «dzikich» draždžej, a značyć ich karysnaść źjaŭlajecca davoli sprečnaj.