«Jeŭrahandal» pierafarmatoŭvaje svaje kramy «Chit!» Što budzie zamiest ich?

U kamientaryjach karystalniki sacsietki padzialilisia nazirańniami pra toje, što niekatoryja kramy «Chit!» u Minsku i Dziaržynsku stanoviacca «Jeŭraoptami». Adzin z karystalnikaŭ sacsietki padzialiŭsia čutkaj, što ŭsie kramy «Chit!» da kanca hoda zakryjuć.

U kampanii «Jeŭrahandal», jakoj naležyć handlovaja sietka «Chit!», karespandentu «Anłajniera» paćvierdzili, što častku kram pad hetym brendam sapraŭdy zakryvajuć i pastupova pieravodziać u inšyja farmaty, u tym liku ŭ «Jeŭraopt».

«Heta nie historyja pra masavaje zakryćcio kram. U bolšaści vypadkaŭ adras zastajecca raniejšym, handlovy abjekt praciahvaje pracavać, a dla kupca źmianiajucca farmat, asartymient, prastora i nabor servisaŭ.

Za apošnija try hady faktyčna byli zakrytyja tolki 4 kramy «Chit!» — pa pryčynach, źviazanych z umovami arendy. Asnoŭnaja ž praca idzie praz abnaŭleńnie farmatu: tam, za košt čaho «Jeŭraopt» dazvalaje dać ludziam bolš vybaru, zručnaści, akcyj i bolš mocnuju cenavuju prapanovu, my razhladajem taki pierachod».

«Jeŭrahandal» u Biełarusi zaraz raźvivaje try sietki: «Jeŭraopt», «Chit!», «Hrošyk». U kampanii adznačajuć, što dla kožnaha kankretnaha adrasa imknucca padabrać najbolš prydatnuju madel kramy: uličvajuć rajon, zvyčki kupcoŭ, najaŭnyja płoščy, zapatrabavany asartymient, kankurentaŭ pobač.

«Za apošnija try hady farmat źmianili krychu bolš za 140 kram «Chit!». Častka ź ich stała «Jeŭraoptam», častka pierajšła ŭ inšyja farmaty, uklučajučy «Hrošyk». Nie idzie havorki pra toje, što sietka «Chit!» źniknie adnamomantna ci ŭsie adrasy adrazu źmieniać šyldu. Bolš za 200 kram pa-raniejšaŭ pracujuć u hetym farmacie. Častka abjektaŭ budzie pierachodzić u inšyja farmaty, častka praciahnie pracu ŭ ciapierašnim vyhladzie.

U najbližejšaj pierśpiektyvie mahčymaść źmieny farmatu razhladajecca prykładna dla 14 abjektaŭ «Chit!».

U kampanii tłumačać, što źmiena farmatu kram užo zakranuła Minsk i moža zakranuć inšyja harady. Płanujecca pravodzić źmieny paetapna i tłumačyć kupcam, što mienavita pamianiajecca i što ludzi atrymajuć paśla abnaŭleńnia.

Što budzie z asartymientam?

«Hałoŭnaja źmiena — častka kram stanie bližejšaj da farmatu paŭnavartasnaha «Jeŭraopta» kala doma. Dla kupca heta aznačaje nie źjaŭleńnie zvykłych katehoryj z nula, a pašyreńnie asartymientu i mahčymaściaŭ. Havorka pierš za ŭsio pra śviežuju katehoryju: bolš pazicyj harodniny i sadaviny, šyrejšaja liniejka małočnaj pradukcyi, kulinaryi, hatovaj ježy, śviežaj vypiečki, tavaraŭ dla siamji i štodzionnaj kupli».

U niekatorych kramach płanujecca zrabić dadatkovyja vyhody — naprykład, kava-pointy i zony dla chutkaha pierakusu. U kampanii adznačajuć, što heta adkaz na čakańni, jakija ŭsio čaściej źjaŭlajucca ŭ ludziej u adnosinach da farmatu «krama kala domu».

Abnaŭlajecca i źniešni vyhlad handlovych abjektaŭ — jak zvonku, tak i ŭnutry. Naprykład, u kramie na vulicy Varanianskaha, 17 u Minsku testujecca novaja kancepcyja fasadaŭ z hrafičnymi simvałami rehijona. Unutranaja prastora taksama źmianiajecca. Adzin z prykładaŭ źmieny interjeru — krama na praśpiekcie Niezaležnaści, 91. Kalarovaja hama, pavodle słoŭ pradstaŭnika kampanii, stała bolš śvietłaj, źjavilisia draŭlanyja akcenty, zanalnaje aśviatleńnie, prostaja navihacyja i ličbavyja ekrany zamiest papiarovych nośbitaŭ.

A što stanie z cenami?

«My razumiejem, nakolki heta adčuvalnaja tema dla pakupnikoŭ. Tamu razam sa źmienaj farmatu pierahladajem cenavuju prapanovu pa samych zapatrabavanych tavarach štodzionnaha popytu. Zadača — dać čałavieku nie tolki bolšy vybar i bolš zručnuju prastoru, ale i zrazumiełyja, kankurentnyja ceny na bazavyja pradukty».

Akcyi abiacajuć uzmacnić, zrabiŭšy akcent na tavarach, jakija ludzi rehularna kuplajuć: praduktach dla śniadanku, małočnych praduktach, chlebie, harodninie i sadavinie, bakalei i tavarach dla siamji. Prahramu łajalnaści zachavajuć: dziejnym udzielnikam ničoha pieraafarmlać nie treba. U režymie pracy kram taksama nie płanujecca istotnych źmien, kali na toje nie budzie abjektyŭnych pryčyn.

Novyja kramy «Chit!» źjaviacca?

Retejler adznačaje, što «Chit!» zastajecca častkaj partfiela praduktaŭ kampanii, ale novyja adkryćci pad hetaj vyvieskaj zaraz pastaŭlenyja na paŭzu.

«Tam, dzie «Chit!» pa-raniejšamu dobra adpaviadaje patrebam pakupnikoŭ, jon praciahvaje pracavać. Tam, dzie inšy farmat moža dać ludziam bolš pa asartymiencie, servisie, akcyjach, cenach i ahulnaj zručnaści, my razhladajem pierachod. Sens hetych źmien prosty: kupiec pavinien atrymać kramu, jakaja lepš padychodzić mienavita jahonamu rajonu i jahonamu štodzionnamu žyćciu».

• 0
• 0
• 0
• 0
• 0
• 0
• 0
• 0