EHU zajaviŭ pra ŭzmacnieńnie padtrymki studentaŭ, vykładčykaŭ i ich siemjaŭ

Paśla taho jak biełaruskija ŭłady pryznali Jeŭrapiejski humanitarny ŭniviersitet (EHU) ekstremisckaj arhanizacyjaj, navučalnaja ŭstanova zajaviła pra ŭzmacnieńnie padtrymki svajoj supolnaści i pryniaćcie dadatkovych mier dla źmianšeńnia nastupstvaŭ hetaha rašeńnia.

Zdymak ilustracyjny. Fota: «Naša Niva»

Jak paviedamlaje pres-słužba ŭniviersiteta, u adkaz na cisk i represii EHU pašyryŭ supracoŭnictva ź litoŭskimi dziaržaŭnymi orhanami, mižnarodnymi partniorami, dypłamatyčnymi pradstaŭnictvami i hramadskimi arhanizacyjami. Meta hetaj pracy — zabiaśpiečyć biaśpieku, dabrabyt i mahčymaść praciahvać navučańnie abo prafiesijnuju dziejnaść dla tych, kaho zakranuła situacyja.

Sistema dapamohi hruntujecca na troch asnoŭnych kirunkach: zachavańni bieśpierapynnaści adukacyjnaha pracesu, praktyčnaj padtrymcy paciarpiełych členaŭ supolnaści i ŭmacavańni doŭhaterminovaj stabilnaści i biaśpieki ŭniviersiteta.

Za apošnija tydni ŭniviersitetam byli sproščanyja administracyjnyja pracedury, źviazanyja z navučańniem, arhanizavana raźmiaščeńnie dla studentaŭ, jakim moža spatrebicca pierajezd, a taksama stvoranyja dadatkovyja kansultacyjnyja miechanizmy.

Paviedamlajecca, što EHU supracoŭničaje ź litoŭskimi ŭstanovami i dypłamatyčnymi pradstaŭnictvami pa pytańniach viz, dazvołaŭ na žycharstva i inšych pravavych mahčymaściaŭ, a taksama dapamahaje tym, kamu nieabchodna biaśpiečna vyjechać ź Biełarusi.

Taksama ŭniviersitet pašyryŭ dostup da jurydyčnych kansultacyj z udziełam niezaležnych pravaabarončych ekśpiertaŭ, arhanizavaŭ asabistyja sustrečy sa śpiecyjalistami, uzmacniŭ psichałahičnuju padtrymku i adkryŭ śpiecyjalnuju haračuju liniju, jakaja pracuje pa pryncypie «adnaho akna».

Akramia taho, EHU ŭzmacniŭ miery kibierbiaśpieki i abarony danych, a členam supolnaści dajucca rekamiendacyi pa asabistaj i ličbavaj biaśpiecy.

Kamientary da artykuła