U Biełarusi jość haradski pasiołak, dzie za hod nie było nivodnaha viasiella

U Biełarusi na 10 šlubaŭ prypadaje pa 7 razvodaŭ. Adnak u niekatorych rehijonach razvodziacca značna čaściej. A jość i takija, dzie za ŭvieś hod nie ŭziata nivodnaha šlubu, zaŭvažyła vydańnie Thinktanks.pro.

Zdymak ilustracyjny. Fota: «Naša Niva»

Statystyčnyja kazusy nazirajucca ŭ małanasielenych rehijonach.

Naprykład, u haradskim pasiołku Bahušeŭsk Sieńnienskaha rajona, pavodle danych Biełstata, u 2025 hodzie byŭ zaklučany ŭsiaho adzin šlub i aformlena 7 razvodaŭ. A ŭ haradskim pasiołku Juraciški Iŭjeŭskaha rajona — nivodnaha šlubu pry čatyroch razvodach.

Pryčym takaja sumnaja statystyka — zusim nie redkaść dla sučasnaj Biełarusi: razvody pieravažali nad šlubami ŭ 2025 hodzie ŭ 35 rajonach i haradach krainy.

Isnujuć supraćlehłyja «žarty statystyki» — u haradskim pasiołku Kryvičy Miadzielskaha rajona byŭ zarehistravany adzin šlub i nivodnaha razvodu. Choć takija vypadki redkija.

Lidaram «šlubnaści» źjaŭlajecca horad Turaŭ — tut za hod było zarehistravana 12 šlubaŭ i ŭsiaho 4 razvody.

Siarod bujnych haradoŭ samuju spryjalnuju statystyku demanstruje Minsk — tut u 2025 hodzie było ŭziata 13,65 tysiačy šlubaŭ, a razvody zajmajuć krychu bolš za pałovu hetaj kolkaści — 7,7 tysiačy. Horš za ŭsio — u Hrodnie: 2,15 tysiačy šlubaŭ i 1,5 tysiačy razvodaŭ.

Adnak varta źviarnuć uvahu, što spryjalnuju karcinu stalicy psujuć navakolnyja miascovaści — tak, u Minskim rajonie, heta značyć u vioskach i haradkach, raźmieščanych za Minskaj kalcavoj darohaj, razvody pieravažajuć nad šlubami. A ŭsia Minskaja vobłaść źjaŭlajecca rehijonam-lidaram pa razvodach — tut na 10 šlubaŭ prypadaje pa 7,8 razvodaŭ.

Najmienš u hetym płanie prablemnym rehijonam (choć tolki adnosna) źjaŭlajecca Bresckaja vobłaść, dzie adbyvajecca 6,7 razvodaŭ na 10 šlubaŭ.

Kamientary da artykuła