Bolš čym pa 20 hadoŭ źniavoleńnia kožnamu. Vynieśli prysud pa rezanansnaj spravie siamji Lipskich

Minski abłasny sud 6 lipienia vynies prysud sužencam Uładzimiru i Raisie Lipskim, jakich abvinavačvali ŭ padrychtoŭcy zabojstvaŭ 52 čałaviek.

Alaksandr i Raisa Lipskija ŭ 2014 hodzie

Pavodle viersii śledstva, sužency płanavali raspravy nad ludźmi, jakich ličyli datyčnymi da kryminalnaj spravy svajho syna Alaksandra. Dla hetaha, jak śćviardžajecca, jany sačyli za patencyjnymi achviarami, nabyvali zbroju i rychtavalisia da ŭčynieńnia złačynstvaŭ.

Koratka nahadajem historyju Lipskich: siamja žyła ŭ dvuchpakajoŭcy na praśpiekcie Rakasoŭskaha. U Minsk jany pierajechali sa Śvietłahorska, kali ich adziny syn Saša vučyŭsia jašče ŭ škole. Spačatku jany narmalna ładzili z usimi, ale paśla stali kanfliktavać z susiedziami i źbirać pra ich infarmacyju.

Klučavyja padziei, paśla jakich Lipskija stali składać svoj «rasstrelny śpis», adbylisia ŭ kancy 2018 hoda, kali Alaksandr napaŭ na susieda z padjezda Alaksieja (imia źmieniena) i złamaŭ jamu palec. U momant kanfliktu pobač była Raisa Lipskaja.

Dom na praśpiekcie Rakasoŭskaha, dzie žyła siamja Lipskich

Pa hetym fakcie ŭ adnosinach da Alaksandra Lipskaha była zaviedziena kryminalnaja sprava. Sud pryznačyŭ jamu pakarańnie ŭ vyhladzie abmiežavańnia voli (4 hady «chimii»), adnak nieŭzabavie toj schavaŭsia. Śledam za im źnikła i jahonaja maci. Baćka Lipskaha praciahvaŭ pracavać i śćviardžaŭ, što nie bačyŭ syna z 2018 hoda, a žonku — z 2020-ha. Jak paśla ŭdałosia ŭstanavić śledčym, jon taksama ŭdzielničaŭ u dbajnym płanavańni zabojstvaŭ.

U listapadzie 2021 hoda Alaksandr Lipski, znachodziačysia ŭ vyšuku, pryjšoŭ dadomu da rodnaj siastry žonki Alaksieja — 33‑hadovaj Maryi (imia źmieniena) i zastreliŭ jaje. Žančyna ŭ toj momant źbirałasia ŭ dziciačy sadok pa maleńkuju dačku, a jaje muž, ratujučysia ad złačyncy, vyskačyŭ z bałkona piataha paviercha i vyžyŭ.

Da momantu zatrymańnia Lipskich u žniŭni 2024 hoda siamja Alaksieja vymušana była źmianić kvateru i žyć u pastajannym napružańni, aścierahajučysia za žyćcio blizkich. Akazałasia, nie daremna: uvieś hety čas Lipskija, jak daviedajecca śledstva, rychtavalisia da zabojstva niekalkich dziasiatkaŭ čałaviek. U śpis uvajšli ŭsie, chto mieŭ dačynieńnie da sudovaha pracesu 2019 hoda. Pa danych śledstva, Lipskija ličyli, što takim čynam sudy sapsavali žyćcio ich synu.

U žniŭni 2024 hoda siamja Lipskich była zatrymana. Pry zatrymańni syn Alaksandr byŭ śmiarotna paranieny. U kvatery, dzie chavałasia siamja, znajšli arsienał zbroi: pistalety, patrony, hłušycieli, samarobnyja hranaty i bojeprypasy. Pa danych śledstva, «dla realizacyi płanaŭ siamja Lipskich vykarystoŭvała kanśpiracyju: paryki, kii, źmienu adzieńnia na vulicy».

U listapadzie 2025 hoda kryminalnaja sprava ŭ dačynieńni da muža i žonki Lipskich, abvinavačanych u padrychtoŭcy sieryi zabojstvaŭ, była nakiravana ŭ sud.

Sudovy razhlad doŭžyŭsia bolš za čatyry miesiacy. U vyniku sud pryznačyŭ Uładzimiru Lipskamu 24 hady pazbaŭleńnia voli ŭ kałonii ŭzmocnienaha režymu, a Raisie Lipskaj — 22 hady pazbaŭleńnia voli ŭ kałonii ahulnaha režymu.

Kamientary da artykuła