Parłamient Mjanmy ŭvioŭ śmiarotnaje pakarańnie dla arhanizataraŭ skam-centraŭ

Parłamient Mjanmy, jaki znachodzicca pad kantrolem vajskovych uładaŭ, pryniaŭ novy zakon ab baraćbie ź internet-machlarstvam. Dakumient praduhledžvaje śmiarotnaje pakarańnie dla arhanizataraŭ złačynnych schiem, jakija prymušajuć ludziej pracavać u tak zvanych skam-centrach — śpiecyjalnych kompleksach, dzie pad prymusam zajmajucca internet-machlarstvam, piša Bi-bi-si.

Telefony i kampjutary, zabranyja padčas adnaho z palicejskich rejdaŭ suprać skam-centraŭ u Mjanmie. Fota: AFP via Getty Images 

Takija centry za apošnija hady šyroka raspaŭsiudzilisia ŭ Mjanmie. Ich achviarami stanoviacca karystalniki internetu pa ŭsim śviecie, jakich padmanvajuć praz falšyvyja ramantyčnyja znajomstvy, inviestycyjnyja prapanovy i inšyja machlarskija schiemy, u tym liku źviazanyja z kryptavalutami.

Pavodle paviedamleńniaŭ ludziej, jakija viarnulisia z Mjanmy, zamiežnikaŭ niaredka prymušali pracavać u takich centrach suprać ich voli. Ich utrymlivali ŭ rabstvie, padviarhali katavańniam i prymušali ŭdzielničać u internet-machlarstvie.

Pad ciskam mižnarodnaj supolnaści, u tym liku ZŠA i Kitaja, ułady krainy paabiacali ŭzmacnić baraćbu z hetaj złačynnaj industryjaj. Adnak dahetul palicejskija apieracyi i aryšty ŭ asnoŭnym pryvodzili tolki da pieramiaščeńnia machlarskich centraŭ u inšyja rajony, a nie da spynieńnia ich dziejnaści.

Pryniaty zakon praktyčna bieź źmienaŭ paŭtaraje prajekt, pradstaŭleny jašče ŭ mai. Jon praduhledžvaje pakarańnie ad dziesiaci hadoŭ pazbaŭleńnia voli da pažyćciovaha źniavoleńnia, a taksama śmiarotnaje pakarańnie za prymus ludziej da ŭdziełu ŭ internet-machlarstvie z vykarystańniem hvałtu, katavańniaŭ abo niezakonnaha ŭtrymańnia.

Śmiarotnaje pakarańnie taksama praduhledžana dla ŭdzielnikaŭ złačynnych hrupovak, kali ich dziejańni pryviali da hibieli paciarpiełych. Asoby, jakija kirujuć skam-centrami abo arhanizujuć machlarstva z kryptavalutami, mohuć być asudžanyja až da pažyćciovaha źniavoleńnia.

Heta pieršy zakon, pryniaty novym uradam Mjanmy na čale ź Min Aun Chłajnam. Jon uznačaliŭ vajskovy pieravarot u 2021 hodzie, paśla jakoha było zrynuta abranaje cyvilnaje kiraŭnictva krainy i pačałasia hramadzianskaja vajna. U krasaviku 2026 hoda Min Aun Chłajn staŭ cyvilnym prezidentam paśla vybaraŭ, jakija prajšli biez udziełu apazicyi i byli raskrytykavanyja zachodnimi krainami.

Pavodle acenak ekśpiertaŭ, parłamient Mjanmy ciapier faktyčna zaćviardžaje ŭsie rašeńni vajskovych uładaŭ, pakolki bolšaść jaho členaŭ składajuć vajskoŭcy.

Paśla prychodu da ŭłady novaha kiraŭnictva ŭ krainie adnaviłasia prymianieńnie śmiarotnaha pakarańnia paśla doŭhaha pierapynku. Pravaabarončyja arhanizacyi śćviardžajuć, što jano vykarystoŭvajecca pieravažna suprać praciŭnikaŭ vajskovaha režymu. Pavodle danych AAN, užo da 2022 hoda ŭ Mjanmie bolš za 130 čałaviek byli prysudžanyja da śmiarotnaha pakarańnia.

U toj ža čas Kitaj taksama ŭzmacniaje baraćbu z transhraničnym internet-machlarstvam. Pavodle najaŭnaj infarmacyi, sioleta ŭ krainie byli pakaranyja śmierciu jak minimum 15 čałaviek, asudžanych za machlarstva, źviazanaje sa skam-centrami ŭ Mjanmie.

Kamientary da artykuła