Što było ŭ apošnich hałasavych paviedamleńniach Viery Kraŭcovaj, jakaja źnikła ŭ Mjanmie
«Z hatela mianie zabrali z ranicy. I my pajechali, niedzie 12 hadzin».
Biełaruska Viera Kraŭcova źnikła 4 kastryčnika. Jana jechała na pracu ŭ Tajłand, a ŭ vyniku apynułasia ŭ rabstvie ŭ skam-centry ŭ Mjanmie.
Kali Viera trapiła ŭ skam-centr, jana adpraviła hałasavyja paviedamleńni siabroŭcy. Ich źmiest ahučyli ŭ efiry STB.
U pieršym paviedamleńni dziaŭčyna kaža, što apynułasia ŭ Banhkoku (stalica Tajłanda).
«Pavinna była adtul jechać adrazu ŭ inšy horad. U vyniku zachrasła ŭ Banhkoku na 8 dzion. Paśla hetaha mianie pavieźli ŭ inšuju krainu, kštałtu Mjanma. Na mašynie ja dva dni dabirałasia da svajoj pracy. Nu, karaciej, učora pieršy pracoŭny dzień byŭ. Pakul što ŭlivajusia ŭ pracu, ulivajusia ŭ heta ŭsio, sprabuju być praduktyŭnaj».
U druhim paviedamleńni Viera raskazvaje pra toje, jak prylacieła ŭ horad Janhon.
«Ja tam zastałasia ŭ hateli, tamu što hetyja ŭžo nie paśpiavali zabrać mianie na mašynie. I potym, atrymlivajecca, z hatela pavieźli ŭ inšy horad. Potym my pierasiekli voziera. Nie voziera, heta raka. Ja tam kala raki zastałasia ŭ hateli. A potym z hetaha hatela mianie zabrali z ranicy. I my pajechali, b**, niedzie 12 hadzin. Daroha — heta prosta p***, ciabie ŭvieś čas trasie».
Paśla hetaha dziaŭčyna na suviaź nie vychodziła. Padobna, na toj momant jana jašče nie razumieła, kudy trapiła.
Krynica rasijskaha telekanała «Rien TV» paviedamlała, što Vieru znajšli miortvaj. Pavodle papiarednich źviestak, śmierć nasiła kryminalny charaktar. Rasijanka z Čyty, jakaja vyrvałasia sa skam-centra, raskazvała, što dziaŭčynu nibyta pradali na orhany. Aficyjnaha paćviardžeńnia hetaj infarmacyi nie było.
Biełaruskaje pasolstva ŭ Vjetnamie arhanizavała pošukavyja mierapryjemstvy pry sadziejničańni siłavych i dypłamatyčnych struktur krain Vjetnama i Tajłanda. Da apieracyi taksama byli padklučanyja aparaty hanarovych konsulstvaŭ respubliki ŭ Janhonie i Banhkoku.
Dźvie trahiedyi ŭ adnoj siamji. Rodnaja babula i susiedzi pra źnikłuju ŭ Mjanmie Vieru Kraŭcovu i niaščaście, što zdaryłasia čatyry hady tamu
Źnikłuju ŭ Mjanmie Vieru Kraŭcovu znajšli miortvaj
Skam-fabryki ŭ Mjanmie — što heta i jak pracujuć. Na adnu z takich, vierahodna, vyvieźli i biełarusku Vieru
Što viadoma pra 26‑hadovuju biełarusku Vieru, jakuju pradali na orhany ŭ Mjanmu
Kamientary