Chunta Mjanmy praviała rejd u adnym z najbujniejšych skam-centraŭ. Sotni jaho žycharoŭ uciakli ŭ Tajłand

Vajskoŭcy pačali nastup na sumna viadomy kompleks KK Park na miažy z Tajłandam u paniadziełak, vyzvaliŭšy bolš za dźvie tysiačy čałaviek i kanfiskavaŭšy dziasiatki spadarožnikavych terminałaŭ Starlink.

U piatnicu ŭłady tajskaj pravincyi Tak paviedamili, što ahułam miažu pierasiekli 1049 čałaviek, siarod ich byli hramadzianie Kitaja, Indyi, Pakistana, Vjetnama, Mjanmy, Tajłanda i inšych krain.

Jany pierapravilisia praz raku Maej na łodkach i byli nakiravany dla pravierki ŭ bližejšy horad Mesot, dzie ŭłady stvaryli apieratyŭny štab.

Što viadoma pra KK Park

KK Park — kompleks budynkaŭ, raźmieščany na poŭdzień ad pamiežnaha horada Mjavadzi ŭ štacie Karen. Jon akružany płotam z kalučym drotam, na jaho terytoryi znachodziacca žyłyja budynki, kramy, restarany i balnica. Kompleks achoŭvajecca ŭzbrojenymi ludźmi.

Pieršapačatkova jon zadumvaŭsia jak pamiežny biznes-park, adnak u apošnija hady staŭ viadomy jak adzin z najbujniejšych u rehijonie centraŭ anłajn-machlarstva, admyvańnia hrošaj i handlu ludźmi.

Tysiačy ludziej zamańvali tudy abiacańniami dobra apłačvanaj pracy, a zatym prymušali ŭdzielničać u składanych machlarskich schiemach i vykradać miljardy dalaraŭ u achviar pa ŭsim śviecie.

Tyja, kamu ŭdavałasia źbiehčy adtul (abo zapłacić vykup), apisvali žorstkija ŭmovy ŭtrymańnia, kali ludziej prymušali pracavać šmat hadzin, katavali i źbivali tych, chto nie vykonvaŭ płan pa prybytku.

Choć mnohija ludzi traplajuć u skam-centry ŭ vyniku handlu ludźmi, ekśpierty kažuć, što inšyja pracujuć dobraachvotna, spadziejučysia zarabić u nielehalnaj industryi bolš, čym jany mohuć atrymać u siabie na radzimie.

KK Park i inšyja padobnyja abjekty ŭ asnoŭnym kirujucca kitajskimi złačynnymi hrupoŭkami i achoŭvajucca miascovymi vajenizavanymi farmiravańniami, jakija majuć suviazi z armijaj, piša Reuters.

Miarkujučy pa kadrach ź miesca padziej i spadarožnikavych zdymkach, suviaź sa źniešnim śvietam u kompleksie zabiaśpiečvałasia za košt terminałaŭ Starlink, pryčym ich kolkaść u apošni čas rasła (aficyjna ŭ Mjanmie jany zabaronienyja).

Kampanija SpaceX zajaviła ŭ minułuju sieradu, što adklučyła bolš za 2500 pryład u machlarskich centrach Mjanmy.

Simvaličnaja apieracyja

Vajskoŭcy, mnohija ź jakich daŭno źviazanyja ź nielehalnym biźniesam, ciapier zajaŭlajuć, što zachapili kompleks i pašyrajuć kantrol nad Mjavadzi, hałoŭnym handlovym vuzłom, jaki źviazvaje krainu z Tajłandam.

U apošnija tydni vajskoŭcy adcisnuli paŭstancaŭ u niekalkich častkach Mjanmy, imknučysia maksimalna pavialičyć kolkaść miescaŭ, dzie možna pravieści zapłanavanyja na śniežań vybary.

Jany pa-raniejšamu nie kantralujuć vialikija terytoryi krainy, raździrajemaj kanfliktam z momantu vajennaha pieravarotu ŭ lutym 2021 hoda.

Ekśpierty kažuć, što vajskoŭcy Mjanmy daŭno zapluščvajuć vočy na machlarskija centry, jakija prynosiać prybytak ich sajuźnikam z apałčeńnia, jakija hrajuć klučavuju rolu ŭ baraćbie z paŭstancami.

Kirujučaja chunta sutyknułasia ź ciskam z boku Kitaja, jaki vykazvaŭ niezadavolenaść tym, što ŭ machlarstvie ŭdzielničajuć kitajskija hramadzianie, i patrabavaŭ zakryć skam-centry.

Adnak, na dumku analitykaŭ, represii suprać takich centraŭ, chutčej za ŭsio, źjaŭlajucca simvaličnymi mierami, arhanizavanymi ŭ sprobie supakoić Kitaj, pry hetym nie nanosiačy surjoznaj škody vielizarnym prybytkam ad machlarskich schiem, adznačaje AFP.

ŚMI pisali, što ŭłady Mjanmy ŭžo pravodzili rejdy ŭ KK Park, adnak paśla kompleks tolki pašyraŭsia.

U KK Park praciahvajecca machlarskaja dziejnaść, a vajskoŭcy, vierahodna, uziali pad kantrol tolki častku šyrokaha kompleksu.

Krynica taksama miarkuje, što Piekin daje vajskoŭcam Mjanmy śpisy kitajskich hramadzian, jakich jon choča vyvieźci sa skam-centraŭ i adpravić dla suda ŭ Kitaj.

• 4
• 0
• 1
• 2
• 0
• 0
• 1
• 0