U Kitai pakarali śmierciu 11 členaŭ sindykata Min. Jany kiravali skam-centrami i kazino ŭ Mjanmie

U Kitai pakarali śmierciu 11 čałaviek — členaŭ sindykata Min, jaki vioŭ dziejnaść u Mjanmie, u tym liku kirujučy skam-centrami i niezakonnymi kazino. Skam-centry — surjoznaja prablema ŭ Paŭdniova-Uschodniaj Azii, i kitajcy čaściakom stanoviacca achviarami anłajn-machlarstva. Heta pieršy śmiarotny prysud, pryviedzieny ŭ vykanańnie ŭ Kitai pa takoj spravie, piša Bi-bi-si.

Prysud členam sindykata byŭ vyniesieny ŭ vieraśni 2025 hoda. U listapadzie vyšejšaja sudovaja instancyja adchiliła apielacyju, i ŭ čaćvier, 29 studzienia, kitajskija ŚMI paviedamili pra toje, što prysud byŭ pryviedzieny ŭ vykanańnie.

Skam-centry i kazino prynieśli siamji Min bolš za 10 młrd juaniaŭ (1,4 młrd dalaraŭ ZŠA) u pieryjad z 2015 pa 2023 hod. Ich dziejnaść pryviała da śmierci 14 hramadzian Kitaja, pastanaviŭ sud.

Nie ŭsich členaŭ sindykata, aryštavanych u 2023 hodzie, prysudzili da śmiarotnaj kary. Jašče 23 čałavieki atrymali ad piaci hadoŭ da pažyćciovaha źniavoleńnia.

Heta pieršaje pakarańnie śmierciu ŭ Kitai pa spravie, źviazanaj ź dziejnaściu skam-centraŭ u Mjanmie. U listapadzie da śmiarotnaj kary byli prysudžanyja piać členaŭ sindykata Baj, a sud nad dźviuma inšymi hrupoŭkami — Vej i Lu — usio jašče ŭ pracesie.

Dakładnych danych pra toje, nakolki časta karajuć ludziej u Kitai, niama: takaja statystyka ličycca dziaržaŭnaj tajamnicaj. Pravaabaroncy miarkujuć, što Kitaj — lidar pa liku śmiarotnych pakarańniaŭ u śviecie.

Sindykat Min vioŭ svaju dziejnaść u asnoŭnym u horadzie Łaukaj, jaki da listapada 2023 hoda byŭ padkantrolny vajennaj chuncie Mjanmy, a zatym — miascovym paŭstancam.

Łaukaj — stalica samakiravalnaj zony Kokan na miažy z Kitajem, dzie žyvuć birmanskija kitajcy. U 2000‑ch hadach horad pastupova pieratvaryŭsia z žabrackaj hłušy ŭ centr kazino i kvartałaŭ čyrvonych lichtaroŭ.

Zatym u im źjavilisia i skam-centry, jakija śpiecyjalizujucca na anłajn-machlarstvie. Samym viadomym takim centram była «Viła tyhra, jaki kradziecca», jakuju ŭznačalvaŭ Min Siuečan, lidar sindykata Min.

Min Siuečan zahinuŭ u listapadzie 2023 hoda, kali inšyja jaho siamiejniki byli aryštavanyja: pa słovach uładaŭ, 69‑hadovy mužčyna skončyŭ žyćcio samahubstvam, kab paźbiehnuć zatrymańnia. Jaho syn Min Hapin i ŭnučka Min Čžeńčžeń byli siarod pakaranych śmierciu ŭ čaćvier.

Pa acency Interpała, pa ŭsim śviecie (i asabliva ŭ Paŭdniova-Uschodniaj Azii) u skam-centrach vymušanyja pracavać sotni tysiač achviar handlu ludźmi. U 2023 hodzie anłajn-machlarstva pryviało da straty jak minimum 37 młrd dalaraŭ ZŠA pa ŭsim śviecie, zhodna z padlikami AAN.

U apošni čas skam-centry pieramiaścilisia z paŭnočnaha ŭschodu Mjanmy ŭ inšyja rehijony — na miažu Mjanmy i Tajłanda, a taksama ŭ Kambodžu i Łaos, dzie ŭ Kitaja našmat mienš upłyvu.

Miascovyja ŭłady ŭ apošnija miesiacy ŭzmacnili cisk na skam-centry. U kastryčniku 2025 hoda vajennaja chunta Mjanmy praviała rejd u adnym z najbujniejšych kompleksaŭ na miažy z Tajłandam, vyzvaliŭšy bolš za 2000 čałaviek. U Kambodžy ŭ studzieni 2026 hoda byŭ aryštavany, a zatym ekstradziravany ŭ Kitaj biźniesmien Čeń Čžy (ZŠA i Vialikabrytanija ličać jaho kiraŭnikom sietki skam-centraŭ u Paŭdniova-Uschodniaj Azii).

Interpał aścierahajecca, što industryja skam-centraŭ moža pieramiaścicca ŭ inšyja rehijony — Blizki Uschod, Zachodniuju Afryku abo Centralnuju Amieryku.

• 1
• 0
• 0
• 0
• 0
• 0
• 0
• 0