U Varšavie pjanaja biełaruska jechała z čatyrochhadovym dziciom na elektrasamakacie i trapiła ŭ balnicu

U Varšavie 34‑hadovaja biełaruska i jaje čatyrochhadovaje dzicia paciarpieli padčas pajezdki na elektrasamakacie. Žančyna, u arhaniźmie jakoj paźniej znajšli ałkahol, nie spraviłasia z kiravańniem i ŭpała razam ź dziciom, piša vydańnie Most.

Zdymak ilustracyjny. Fota: magnific.com

Zdareńnie adbyłosia na ŭčastku vulicy, zakrytym dla ruchu. Samakat najechaŭ na niaroŭnaść darohi, paśla čaho žančyna straciła raŭnavahu. Pra paciarpiełych paviedamili minaki, jakija vyklikali palicyju i chutkuju dapamohu.

Maci i dzicia ahledzieli miedyki i dastavili ich u balnicu dla dadatkovych abśledavańniaŭ. Pravierka pakazała, što ŭ vydychanym pavietry žančyny było amal 1 pramile ałkaholu.

Palicyja taksama zafiksavała inšyja parušeńni: pieravozku pasažyra na elektrasamakacie, adsutnaść abaviazkovaha šlema i stvareńnie avaryjnaj situacyi. Sabranyja materyjały pieradadzienyja dla dalejšaha razhladu.

U Polščy praviły karystańnia elektrasamakatami zabaraniajuć pieravozić na ich pasažyraŭ, žyvioł abo hruzy.

Akramia taho, z 3 sakavika 2026 hoda dzieciam da 13‑ci hadoŭ dazvolena karystacca elektrasamakatami tolki ŭ žyłych zonach i pad nahladam darosłych. Vyjezd na darohi dla ich zabaronieny.

Z 3 červienia dzieci da 16‑ci hadoŭ pry jaździe na rovarach i elektrasamakatach pavinny być u šlemach. Za jaho adsutnaść praduhledžany štraf u 100 złotych (kala 27 dalaraŭ), jaki vypłačvajuć baćki abo apiekuny.

Patrabavańnie adnosna šlemaŭ taksama raspaŭsiudžvajecca na dziaciej da siami hadoŭ, jakich pieravoziać na rovary ŭ dziciačym kreśle abo na dadatkovym siadzieńni, za asobnymi vyklučeńniami.

Kamientary da artykuła